1 SAMUEL 8 - Quichua Imbabura Bible

1Samuel ña rucugu cajpimi, cashna tucurca: Paica, israelcunapaj juezcuna cachunga, paipaj churicunatami churarca.

2Paipaj punda churica, Joel shutimi carca. Jipa churica, Abías shutimi carca. Paicunaca, Beerseba pueblopimi juezcuna carca.

3Ashtahuangarin chai churicunaca, na paicunapaj taitashna aliguta causanajurcachu. Paicunaca, charij tucungapajlla munashpami, culquita pacalla cujpi japishpa, alita ruranata huaglichinajurca.

4Shinamandami, israelcunata mandaj rucucunaca, tucuilla tandanajushpa Samuelhuan parlangapaj, Ramá shuti puebloman shamunajurca.

5Chaipica, cashnami ninajurca: “Ricui, cambash ñami rucu cangui. Cambaj churicunapash, na can causashcashna aliguta causanajunllu. Chaimanda cunanga, tucui caishuj llactacuna charinshnallata, ñucanchipaj juez cachun, shuj jatun mandajta churayari” ninajurcami.

6“Ñucanchipaj juez cachun, shuj jatun mandajta churayari” nishpa mañajpimi, Samuelca ninanda llaquirirca. Chaimandami Samuelca, Mandaj Diosta mañarca.

7Chashna mañajpimi Mandaj Diosca, Samueltaca cashna nirca: “Gentecuna imata mañashcata cazushpa, tucuita rurailla. Paicunaca, na candaca yangapi churanajunllu. Ashtahuangarin ñucatami yangapi churanajun. Paicunata na ashtahuan ñuca mandachun munashpami, chashna ninajun.

8Paicunaca, Egiptomanda ñuca llujchimushca punllamandapacha cunan punllacaman, tucui imatalla paicuna rurashcashnallatami, shujcunapaj dioscunatara servishpa, ñucata saquinajun. Candapash, chashnallatami ruranajun.

9Cunanga, paicuna imata mañashcata rurailla. Ashtahuangarin shuj jatun mandaj yaicushpaca, paicunata imashna mandashpa charinatalla aligutapacha yarichishpa villangui” nijurcami.

10Samuelca, jatun mandajta churai nishpa mañanajuj gentecunamanmi, Mandaj Diospaj Shimicunataca tucuita villarca.

11Paica cashnami nijurca: —Cangunata mandagrijuj jatun mandajca, cashnami ruranga: Cangunapaj churicunata apashpami, macanajuna carretacunata, caballocunapi tiarishca gentecunata ñaupashpa calpanajuchun churanga.

12Shujcunataca, huaranga soldadocunata mandachun, caishujcunataca, picha chunga soldadocunata mandachunmi churanga. Shinallata huaquingunataca, paipaj alpacunapi yapushpa tarpunajuchun, chai granocunatapash tandachinajuchunmi churanga. Shujcunataca, macanajunacunata ruranajuchumbash, carretacunapaj imalla minishtirishcacunata ruranajuchumbashmi churanga.

13Shinallata cangunapaj ushicunatapash apashpami huaquingunataca, mishquillagu ashnajuj jambicunata ruranajuchun, shujcunataca yanunajuchun, caishujcunataca tandata ruranajuchun churanga.

14Shinallata cangunapaj ashtahuan ali alpacunata, ashtahuan ali uvascunata fucuj, ashtahuan ali olivos yuracuna shayanajuj alpacunata quichushpami, paita servijcunaman caranga.

15Cangunapaj granocunatapash, uvascunatapash, chungamanda shujta japishpami, pai churashca mandajcunaman, paita servijcunaman caranga.

16Cangunata servij jaricunatapash, huarmicunatapash, chairalla viñai ashtahuan ali huambracunatapash, ali burrocunatapashmi apanga. Paicunahuanmi imatalla ruranacunataca, tucuita rurachinga.

17Cangunapaj llamacunatapash, chungamanda shujtami japinga. Cangunapash, paita servishpami causanguichi.

18Cangunallata agllashca, jatun mandaj llaquichijui punllacunapica caparishpa mañanajujpipash, Mandaj Diosca napacha uyangachu— nijurcami.

19Ashtahuangarin gentecunaca, Samuel chashna nijujta na uyanayachishpami, cashna ninajurca: —Ima cachumbash, jatun mandajta charingapajpachami munanchi.

20Ñucanchipash, tucui llactacunapi causajcunashna cangapajmi munanchi. Ñucanchita jatun mandajmi, ñucanchitaca mandanga. Paimi, ñucanchi ñaupajpi rishpa, ñucanchipaj jatun macanajuicunatapash ruranga— ninajurcami.

21Gentecuna tucui imatalla nishcata uyashpami Samuelca, Mandaj Diosman villangapaj cutin rirca.

22Shina villajpimi Mandaj Diosca, Samueltaca: —Paicuna nishcata uyashpa, jatun mandajta churailla— nirca. Shina nijpimi Samuelca, Israel runacunataca: —Canguna causanajuj pueblocunaman, tucuilla tigraichilla— nishpa cacharca. Jatun mandaj cachunga, Saultami churashca