GÉNESIS 39 - Quichua Imbabura Bible

1Egiptoman José apai tucujpica, cuidaj soldadocunata mandashpa Faraonda servij, Egipto llactamanda Potifar shuti runami randirca. Chai llactaman apaj ismaelitacunapaj maquimandami randirca.

2Ashtahuangarin Mandaj Diosca, Josehuanmi carca. Chaimandami, pai imata rurashcapash ali llujshin carca. Paica, Egiptomanda paipaj amopaj huasipimi causajurca.

3Mandaj Diosca, Josehuanmi carca. Chaimandami, tucui imata José rurajpipash Mandaj Diosca, paipaj maquipillata ali llujchijurca. Chaitami, Josepaj amoca ricujurca.

4Joseca, Potifar shuti runapaj ñavipi ali ricurishpami, paita servishpa causajurca. Potifar runaca, paipaj huasipi mayordomo cachun Joseta churashpami, tucui ima charishcatapash paipaj maquipi churarca.

5Paipaj huasita, tucui ima charishcacunata ricuchun mingashca punllamandapachami, cashna tucurca: Mandaj Diosca, Egiptopi causaj runapaj huasitaca, Josemandallami bendiciajurca. Mandaj Diosca, chai runapaj huasipi, pambapi tucui imatalla charishcatami bendiciajurca.

6Chaimandami tucui ima charishcatapash, Josepaj maquipi churarca. Potifar runaca pai ricujujpimi, huasipi ima tiashcatapash na yarishpa, pai imata micunatalla yarin carca. Joseca ali ñavi, juyailla huambragumi carca.

7Chai jipacunami, cashna tucurca: Paipaj amopaj huarmica, Joseta ninanda munashpa ricushpami: —Ñucahuan puñushun— nirca.

8Shina nijpimi Joseca, chaita rurangapaj na munashpa, paipaj amopaj huarmitaca cashna nirca: —Ricui, ñuca amoca ñucahuanga cai huasi ucupi ima tiashcatapash, na yarijunllu. Tucui imatalla pai charishcatapash, ñuca maquipimi saquishca.

9Cai huasipica, shuj ñucata yalica na tianllu. Shina cajpimi, imatallapash na pacashpa alichishpa tucuita saquihuashca. Ashtahuangarin candallami, paipaj huarmi cajpi, imatapash na nihuashca. Shina cashpaca, ¿imashpata ñucaca cai jatun nalita rurashpa juchata rurashpa, Taita Diosta fiñachishayari?— nircami.

10Chai huarmica, punllandi Joseta paihuan puñungapaj siririshun nijujpipash Joseca, chai huarmihuan siririshpa, paipaj ladopi cangapaca na munarcachu.

11Chai jipami, cashna tucurca: Shuj punllami Joseca, huasi ucupi ruranacunata rurangapaj yaicurca. Chai huasipi causajcunaca, pipash illarcami.

12Chaipimi chai huarmica Josetaca, paipaj churajunamanda aisashpa: —Ñucahuan puñushun— nirca. Shina nijujpimi Joseca, paipaj churajunata chai huarmipaj maquipi saquishpa, calpashpa llujshirca.

13Paipaj maquipi churajunata saquishpa canllaman calpajta ricushpami chai huarmica,

14huasipi tiajcunata cayashpa, cashna nirca: —Ricuichi, hebreopura shuj runatami, ñucanchita nalita rurachun ñucanchipajman apamushca. Chai runaca, ñucahuan puñungapaj munashpami quimirimurca. Chaimandami, ñucaca ninanda caparircani.

15Chashna ninanda caparijpimi, paipaj churajunata caipi saquishpa, calpashpa llujshirca— nircami.

16Chai jipaca, paipaj cusa shamungacamanmi, Josepaj churajunataca paipaj ladopi charijurca.

17Cusa chayamujpimi, huasipi tiajcunaman villashcashnallata, cashna nishpa villajurca: —Ñucanchita servichun can apamushca hebreo runaca, ñuca alicachi tucushcata huaglichingapaj munashpami shamurca.

18Paica, ñuca ninanda caparijpimi, paipaj churajunata ñuca ladopi saquishpa, canllaman calparca— nijurcami.

19Chaipimi cashna tucurca: “Canda servijca, chashnami rurangapaj munarca” nishpa, paipaj huarmi villajta uyashpami Josepaj amoca, nina japirinshna ñapash fiñarirca.

20Paipaj amoca, Joseta japishpami, jatun mandaj churajpi prezu tianajuj prezuna huasipillata churarca. Joseca, chai prezuna huasipimi tiajurca.

21Ashtahuangarin Mandaj Diosca, Josehuan cashpami, paitaca ashtahuan llaquijurca. Shinamandami prezuna huasipi mandajpaj ñavipipash, ali ricurichun rurarca.

22Shina cajpimi prezuna huasipi mandaj runaca, chai prezuna huasipi prezu tiajcunataca, tucuillata José ricuchun churarca. Chaipi tucui imatalla ruranacunataca, paimi rurachijurca.

23José ricushpa cuidajushcamandaca, prezuna huasipi mandaj runaca, imata ruranatapash na charircachu. Mandaj Diosmi, Josehuan carca. Chaimandami imata pai rurajpipash, Mandaj Diosca tucuipi ali llujchijurca. Ishcai muscuicuna ima tucunatami, Joseca villashca