JOB 34 - Quichua Imbabura Bible

Eliú shuti runaca, Taita Diosca imatapash cashcatapachami ruran nishcami

1Eliú shuti runaca, cashnatapashmi nijurca:

2“Alipacha yachajushcacuna, ñuca rimashca shimicunata uyahuaichi. Ali yuyaita charijcuna, cangunapash ñucata ali uyahuaichi.

3Shimihuan mishquilla micunshnami, rinripash rimashcataca uyanayachin.

4Ñucanchica, alita ruranata agllashunchi. Imalla ali cajtaca, ñucanchipura rijsishunchi.

5Job runaca, cashnami nijurca: ‘Ñucaca, imatapash cashcatapacha ruraj runami cani. Ashtahuangarin Taita Diosca, ñuca imatalla japina cashcatami quichuhuarca.

6¿Ñuca ali yarijushcataca, pacashpachu llullasha? Napash ima juchata rurashca cashpatami, ninanda nanachij chugrihuan cani’ nijurcami.

7¿Maijan runashi, Job runashna tian? Paica, yacuta ufianshnami, asishpa ricujun.

8Paica, nalita rurajcunahuan cumba tucushpami purin. Nali runacunahuanmi purin.

9Paica cashnami nijurca: ‘Taita Diospaj munaita shuj runa rurashcapash, imapajpash na alichu’ nijurcami.

10Shina cashcamanda, ali yuyaita charij runacuna, ali uyahuaichi: Diosta na cazunaca, Taita Diosmanda carupi cachun. Nalita ruranaca, Tucui Ushaita Charij Diosmanda carupi cachun.

11Paimi runamanga, pai imatalla rurashcamandaca, cunatallata cunga. Runa imashna causashcashnallatami, chaitallata cunga.

12Taita Diosca, na yangamandapacha juchachingachu. Tucui Ushaita Charij Diosca, japina cashcatallata cunataca, na shujman tigrachingachu.

13¿Pita cai pachataca, paipaj randi ricuj shamushca? ¿Pita tucui cai pachataca, aligutapacha churashca?

14Runapi shunguta pai churashpaca, paillata paipaj espirituta, paipaj samaita quichujpica,

15causaita tucui charijcunami, chai punllallata huañushpa tucuringa. Runaca, alpallatami tigranga.

16Can ali yuyaita charishpaca, caita uyai. Ñuca rimashca shimicunata ali uyai.

17Aliguta ricushpa mandanata fiñaj runaca, ¿mandai ushangachu? ¿Imatapash cashcatapacha ruraj runataca, canllu llaquichinguiman?

18¿Jatun mandajtaca: ‘Jatun nalita ruraj’ ningachu? ¿Cati mandajcunatapash: ‘Diosta na manllajcuna’ ningachu?

19¿Mandajcunatapash, na ñavita ricushpalla alicachij Diosta, imagutapash na charij runatara charij runatapash yali alicachij Diostacarin, imatashi ninman? Tucuicuna Diospaj maquihuanllata rurashcacunami.

20Runacunaca ñapash huañungallami. Chaupi tutapi, gentecuna caparinajushcapash chingangallami. Ninan ushaita charijpash, maquihuan na anchuchijpillatami, anchuringa.

21Diospaj ñavica, runa maita purijujtapash ricuriajunmi. Chaqui sarujtapash, tucuitami ricuriajun.

22Jatun nalita rurajcuna pacajungapaca, yana yana tutapash, huañui japinalla llandupash, na tianllu.

23Taita Diosta ama juchachi ushachunmi paica, runa na rurai ushanallataca na mandan.

24Paica, ninan shinllicunatapash, na tapuchishpallata tucuchinga. Paicunapaj pushtupica, shujcunatami churanga.

25Shinamandami Diosca, imatalla paicuna rurashcacunata ricuchishpaca, shuj tutallapi llaquichishpa tucuchinga.

26Tucuicuna ricunalla pushtupimi, nalita ruraj runacunatashna chugrichinga.

27Paicuna Diosmanda caruyashpa, pai imatalla rurachun mandashcataca, shujllapash na yarishcamandami, chashna ruranga.

28Imaguta na charij runaguta llaquichijpimi, Diospaj ñaupajcaman uyarijta caparirca. Imagupash illaj runagu caparishcatapash, Diosca uyarcami.

29Dios samachijpica, ¿pita fiñachi ushangayari? Ñavita pai pacajpica, ¿pita ricui ushangayari? Paica, llactata cashpa, shuj runatalla cashpapash, chashnallatami ricujun.

30Nalita ruraj runataca, llactapi causajcunata ama llaquichishpa mandachunmi jarcajun.

31Taita Diostaca, cashnatapacha nishpami ali canguiman: ‘Ñami cai tucui llaquita apashcani, candaca na ashtahuan fiñachingapaj munapanichu.

32Taita Dioslla, ñuca na ricushcacunata yachachihuayari. Punda nalita rurashcataca, na ashtahuan rurashachu’ nishpami ali canguiman.

33¿Chaimandaca Diosca, can munashcashnachu caranga? Paimi, can japina cashcataca cunga. Chaitaca, chasquina cashpapash, na chasquina cashpapash, canmi ningui. Ñucaca na nishachu. Can yachashcataca, ari nishpapash, na nishpapash canllata nilla.

34Ali yuyaita charij runacunapash, ñucata uyaj alipacha yachajushca runapash, ñucahuanmi cashna ninga:

35‘Job runaca, na ali yachaihuan rimanllu. Pai rimashca shimicunaca, napacha ima yuyaitapash cunllu’ ninajungami.

36Ñucaca, Job rimashcataca, ali yachashcaiman yanimi. Pai tigrachishpa rimashca shimicunaca, nalita ruraj runacuna rimashcashna cajpimi, chashna yani.

37Paica, juchata rurashca jahuami, ashtahuan na cazujurca. Ñucanchitapash fiñashpami, maquita huactarijurca. Taita Diostapash fiñashpami, nali shimicunatalla ninandapacha rimajurca” nijurcami.