2 REYES 14 - Quichua Imbabura Bible

Amasías shuti runami mandajushca(2 Crón. 25:1-28)

1Israel llactata jatun mandaj Joacaz shuti runapaj churi Joás shuti runaca, ña ishcai huatatami mandajurca. Chai huatapimi, Judá llactata jatun mandaj Joás runapaj churi Amasías shuti runaca, Judá llactata mandai callarirca.

2Amasías runaca, ishcai chunga picha huatata charishpami, mandai callarirca. Paica, ishcai chunga iscun huatatami, Jerusalenbi mandajurca. Paipaj mamaca, Jerusalenmanda Joadán shutimi carca.

3Amasías runaca, Mandaj Diospaj ñaupajpica, alitallami rurashpa causajurca. Shina cashpapash, paipaj ñaupa taita David rurashcashnapachaca, na rurarcachu. Amasías runaca, paipaj taita Joás imashna rurashcashnallatami, tucuita rurajurca.

4Tucuita chashna rurashpapash, lomacunapi altarcunataca, na anchuchircachu. Chai altarcunapimi, gentecunaca animalcunata huañuchishpa, inciensotapash cushnichishpa catinajurca.

5Amasías runaca, ña shinllitapacha mandajushpaca, jatun mandaj paipaj taitata huañuchishca servijcunatapashmi huañuchirca.

6Ashtahuangarin Moisés mandashpa escribishca libropi tiajunshnallatami, chai huañuchijcunapaj churicunataca, na huañuchirca. Chaitaca, Mandaj Diosmi cashna nishpa mandarca: “Churicunapaj juchamandaca, taitacunataca na huañuchinachu. Shinallata taitacunapaj juchamandapash, churicunataca na huañuchinachu. Ashtahuangarin maijan cashpapash paipaj juchamandami huañunga” nircami.

7Amasías runaca, chunga huaranga edomitacunatapashmi, Cachi tiaj pugru Pambapi macanajushpa huañuchirca. Chai macanajuipi, Sela shuti pueblota quichushpami chai pueblotaca, Jocteel shutita shutichirca. Chai puebloca, cunangamanmi chai shutihuanllata.

8Chai jipami Amasías runaca, Israel llactata jatun mandaj Joás runapajman: “Shamui, ñavi ñavi ricurishun” nichun, villaj runacunata cacharca. Joás runaca, Joacaz runapaj churimi carca. Joacaz runaca, Jehú shuti runapaj churimi carca.

9Shina cachajpimi, Israel llactata jatun mandaj Joás runaca, Judá llactata jatun mandaj Amasías runaman cashna nichun tigrachirca: “Líbano urcupi tiaj uchilla casha yurami, Líbano urcupillata tiaj cedro quirutaca: ‘Cambaj ushitaca, ñuca churihuan cazarachingapaj cuhuai’ nichun cacharca. Ashtahuangarin Líbano urcumanda millai animalcuna yalishpami, chai casha yurataca sarunajurca.

10Edom llactapi causajcunataca mishashcanguipachami. Shinamandami, cambaj shungupipash jariyashpa tiajungui. Shina cashcamanda jatun tucushpa cushijushpa, ashtahuangarin cambaj huasipillata tiajuilla. ¿Imapajta cambash, Judá llactapash canhuan llaquipi urmanataca mascajunguiyari” nichunmi cacharca.

11Ashtahuangarin Amasías runaca, na uyanayachircachu. Chaimandami Israel llactata jatun mandaj Joás runaca vichai shamurca. Shina shamushpami paipash, Judá llactata jatun mandaj Amasías runapash, Judá llactapi tiaj Bet-semes shuti pueblopi, ñavi ñavi ricurinajurca.

12Ashtahuangarin Judá llactamanda runacunaca, israelcunapaj ñaupajpi mishai tucushpami, tucuicuna paicunapaj carpacunaman pacajushpa calpanajurca.

13Chashna mishashca jahuami, Israel llactata jatun mandaj Joás runaca, Judá llactata jatun mandaj Amasiastaca, chai Bet-semes shuti pueblopi prezu japirca. Amasías runaca, Joás runapaj churimi carca. Joás runaca, Ocozías runapaj churimi carca. Judá llactata jatun mandajca, Jerusalenman shamushpami, Jerusalén pircataca, Efraín shuti pungumandaca, pirca tigranapi tiaj pungucaman, patsaj pusaj chunga metrota urmachirca.

14Chai jipami, Mandaj Diospaj huasipi, jatun mandajpaj huasipi ninan valishcacunata alichishca ucupi tiashca tucuilla orota, culquita, ashtahuan tucui ima charishcacunatapash aparca. Shinallata churicunatapash prezu apashpami, Samaria puebloman tigrarca.

15Joás runa imatalla ashtahuan rurashcacunapash, pai macanajungapaj imatalla rurashcapash, Judá llactata jatun mandaj Amasías runahuan imashnalla macanajushcapash, ¿nachu Israel llactata jatun mandajcuna imatalla rurashcacunata escribishca libropi tiajun?

16Joás runa huañushpa, paipaj ñaupa taitacunahuan tandanajujpica, Israel llactata jatun mandajcunata pambashca ladopillatami, Samaria pueblopi pambarca. Paipaj randica, paipaj churi Jeroboam runami mandajurca.

17Judá llactata jatun mandaj Joás runapaj churi Amasías runaca, Israel llactata jatun mandaj Joacaz runapaj churi Joás runa huañushca jipaca, chunga picha huatacamanmi causajurca.

18Amasías runa ashtahuan imatalla rurashcacunapash, ¿nachu Judá llactata jatun mandajcuna imatalla rurashcacunata escribishca libropi tiajun?

19Amasías runata huañuchingapajmi, Jerusalenbi pacalla parlarishpa jatarinajurca. Chaimandami paica, Laquis shuti puebloman pacajushpa rirca. Laquis shuti puebloman rijpipash, chaiman catishpami, chai pueblopi huañuchirca.

20Paitaca, caballocunapi churashpa apamushpami, paipaj ñaupa taitacunata pambashca ladopillata, Davidpaj pueblo Jerusalenbi pambarca.

21Shinamandami, Judá llactapi causaj tucui gentecunaca, paipaj taita Amasías runapaj randi, jatun mandaj cachunga Azarías runata churarca. Azarías runaca, chunga sucta huatatami charirca.

22Jatun mandaj huañushpa, paipaj ñaupa taitacunahuan tandanajushca jipami Azarías runaca, Elat shuti pueblota cutin shayachishpa, Judá llactapajllata cachun cutin tigrachirca.

Caishuj Jeroboam shuti runami, Israel llactataca mandajushca

23Judá llactata jatun mandaj Joás shuti runapaj churi Amasías runaca, chunga picha huatata ña mandajujpimi, Joás runapaj churi Jeroboam runaca, Israel llactata mandai callarirca. Paica, chuscu chunga shuj huatatami, Samaria pueblopi mandajurca.

24Paica, Mandaj Diospaj ñaupajpica, nalitallami rurajurca. Nabat shuti runapaj churi Jeroboam runa, israelcunata juchata rurachishca, tucui chai juchacunataca na saquircachu.

25Paimi, Israel llactapaj punda linderotaca, Hamat puebloman yaicuna ladomandaca, Arabá shuti mama cucha ladocaman cutin japirca. Israelcunata Mandaj Taita Dios, paita servij Jonás runahuan imashna villachishcashnallatami, cutin japirca. Jonasca, Amitai shuti runapaj churimi carca. Paica, Gat-hefer shuti pueblomandami carca.

26Israelcunaca, ninan llaquipi causanajujtami, Mandaj Diosca ricurca. Chaipica, servishpa causajpash, na servishpa causajpash illarcami. Israelcunata ayudajca, pipash na tiarcachu.

27Mandaj Diosca, israelcunataca cai pachamandaca na chingachingapaj munashcachu carca. Chaimandami, Joás runapaj churi Jeroboam runapaj maquihuan quishpichirca.

28Jeroboam runa imatalla ashtahuan rurashcacunapash, tucui imatalla rurashcapash, pai ninan shinlli cashcapash, tucui macanajuicunata rurashcapash ¿nachu Israel llactata jatun mandajcuna imatalla rurashcacunata escribishca libropi tiajun? Shinallata Damasco pueblota, Judá llactapaj Hamat shuti pueblota, Israel llactapajllata cachun imashna cutin tigrachishcatapash, ¿nachu escribishca libropi tiajun?

29Jeroboam runa huañushpa, israelcunata jatun mandajcunahuan tandanajujpica, paipaj randica paipaj churi Zacarías runami mandajurca.