1Saulpaj familiacunahuan, Davidpaj familiacunahuanga, unaitami macanajushpa causarca. Shina cajpipash Davidpaj familiacunaca, ashtahuanmi shinlliyashpa catinajurca. Ashtahuangarin Saulpaj familiacunaca, ushai illajmi tucunajurca.
Hebrón shuti pueblopipashmi, Davidca churicunata charishca(1 Crón. 3:1-4)2Hebrón shuti pueblopi huacharishca Davidpaj churicunaca, caicunami: Punda churica, Jezreel pueblomanda Ahinoam shuti huarmipaj churimi carca. Paica, Amnón shutimi carca.
3Jipa churica, Carmel shuti pueblomanda Nabal shuti runa huañujpi David cazarashca Abigail shuti huarmipaj churimi carca. Paica, Quileab shutimi carca. Ishcaipaj cati churica, Gesur shuti pueblota jatun mandaj Talmai shuti runapaj ushi Maaca shuti huarmipaj churimi carca. Paica, Absalón shutimi carca.
4Quimsapaj cati churica, Haguit shuti huarmipaj churimi carca. Paica, Adonías shutimi carca. Chuscupaj cati churica, Abital shuti huarmipaj churimi carca. Paica, Sefatías shutimi carca.
5Pichapaj cati churica, Egla shuti huarmipaj churimi carca. Paica, Itream shutimi carca. Egla shuti huarmipash, Davidpaj huarmillatami carca. Cai churicunatami Davidca, Hebrón pueblopi causajushpaca charirca.
Abner runaca, Davidhuan tandanajungapajmi ari ninajushca6Saulpaj familiacunahuan, Davidpaj familiacunahuan macanajushpa catinajujpillatami, cashna tucurca: Abner runaca shinlli tucushpami, Saulpaj huasi ucu purataca pushajurca.
7Saulca, Aja shuti runapaj ushi, Rizpa shuti caishuj huarmitami charishca carca. Chai huarmimandami, Is-boset runaca:
—¿Imashpata ñuca taitapaj caishuj huarmipi chayarcangui?— nishpami, Abner runata rimarca.
8Is-boset runa chashna rimajpimi, Abner runaca ninanda fiñarishpa, cashna nijurca:
—¿Ñucaca, Judá llactapi causajcunapaj alcu umashnachu cani? Ashtahuangarin ñucami, cambaj taita Saulpaj huasi ucu puratapash, paipaj huauquicunatapash, paipaj cumbacunatapash llaquishpa candaca, Davidpaj maquipi na churarcani. ¿Cunanga, chai huarmipaj juchamandallachu ñucata juchachihuangui?
9Taita Diosca cashna rurahuachun. Davidman imatalla rurashapacha nishpa, Mandaj Dios juramentushcata paihuan ñuca na pactachijpica, ashtahuan llaquichihuachun.
10Saulpaj familiacuna mandajushcata quichushpami, Israel llactatapash, Judá llactatapash, Dan pueblomanda callarishpa, Beerseba pueblocaman shinllitapacha mandachun, Davidman cugrini— nijurcami.
11Shina nijpica, Abner runata manllashpami Is-boset runaca, imata tigrachitapash na usharca.
12Shinamandami Abner runaca: “¿Pipajta cai llactaca?” nishpa Davidta tapuchun, shuj villajcunata cacharca. Cashnatapashmi nichun cacharca: “Ñucahuan ali tucungapaj ari nilla. Ricui, tucui Israel llactataca, ñucallata ñuca maquihuan canman tigrachishallami” nichunmi cacharca.
13Shina nijpimi Davidca, cashna nirca: “Ñucaca, canhuan chaita pactachingapaj ari nishami. Ashtahuangarin caitami ningapaj munani: Ñucata ricungapaj shamushpaca pundaca, Saulpaj ushi Mical huarmitara pushashpa shamuchun” nircami.
14Chai jipami Davidca, Saulpaj churi Is-boset runata, cashna nichun shuj runacunata cacharca: “Ñuca huarmi Micalta tigrachihuai. Paitaca, patsaj filisteo runacunata huañuchishpa, paicuna charishca asha aicha carata fitishpa, Saulman cushpami cazararcani” nichunmi cacharca.
15Shina nijpimi Is-boset runaca, Mical huarmita quichumuchun, chai huarmipaj cusa Paltiel shuti runapajman cacharca. Chai runaca, Lais shuti runapaj churimi carca.
16Shina quichushpa apamujpimi, paipaj cusaca paipaj huarmita catishpa, Bahurim shuti pueblocaman huacai huacai rijurca. Shina catijujpimi, Abner runaca: “Tigrashpa rilla” nirca. Shina nijpimi, Paltiel shuti runaca tigrarca.
17Chai jipami Abner runaca, israelcunata mandaj rucucunahuan cashna nishpa parlanajurca: “Cangunaca, pundallatami Davidtaca cangunata jatun mandaj cachun munarcanguichi.
18Cunanga chashna ruraichilla. Mandaj Diosllatami, Davidman cashna nishca: ‘Ñucata servij Davidpaj maquihuanmi, ñuca agllashca Israel llactataca filisteocunapaj maquimandapash, paicunata tucui fiñajcunapaj maquimandapash quishpichisha’ nishcami” nishpami parlanajurca.
19Abner runaca, Benjamín aillu runacunamambashmi parlajurca. Shinallata israelcunapaj, tucui Benjamín aillu runacunapaj imalla ali cana cajta parlashcatami Abner runaca, Davidman villangapaj, Hebrón shuti puebloman rirca.
20Shinami Abner runaca, ishcai chunga runacunandi, Hebrón pueblopi causajuj Davidpajman shamurca. Shina shamujpimi Davidca, Abner runamambash, paihuan shamuj runacunamambash, jatun micuita rurarca.
21Chai jipami Abner runaca, Davidtaca cashna nirca:
—Ñuca caimanda jatarishpa rishpaca, tucuilla israelcunatami, jatun mandaj ñuca amopajman tandachisha. Paicunataca, canhuan ari ninajuchun tandachijpimi, cambaj shungupi yarijushcashnallata, mandashpa causangui— nircami.
Cayacaman nishpa David cachajpimi Abner runaca, pipash na llaquichijpi aliguta tigrarca.
Joab runami, Abner runata huañuchishca22Davidta servijcunapash, Joab runapash macanajuimanda shamushpami, imalla tiashcacunata quichushpa apamunajurca. Ashtahuangarin Abner runaca, na Hebrón pueblopi Davidhuan carcachu. Paitaca, cayacaman nishpa cachajpimi paica, pipash na llaquichijpi aliguta ña rishca carca.
23Chai jipaca Joab runapash, paihuan purij tucui soldadocunapash chaiman chayajpimi, cashna nishpa Joab runaman villanajurca: “Ner shuti runapaj churi Abner runami, jatun mandajpajman shamurca. Ña tigrajujpimi jatun mandajca, cayacaman nishpa cacharca. Shinamandami, pipash na llaquichijpi aliguta tigrarca” ninajurcami.
24Shina nijpimi Joab runaca, jatun mandajpajman shamushpa cashna nirca:
—¿Imatata rurashcangui? Ricui, Abner runa cambajman shamujpica, ¿imashpata richun saquircanguillayari?
25Ner shuti runapaj churi Abner runataca, canllata rijsinguimi. Paica, canda umachingapajllami shamushcanga. Can maiman rishpa, cutin tigramujtapash, imatalla rurajtapash ricungapajllami shamushcanga— nircami.
26Shina nishca jipaca, Davidpaj ñaupajmanda llujshishpami, Abner runata catishpa richun, villaj runacunata Joab runaca cacharca. Chai runacunaca, yacuta llujchingapaj allashca Sira shuti jatun utuju ladopi Abner runata japigrishpami, David na yachajta cutin tigrachimurca.
27Hebrón puebloman Abner runa tigramujpimi Joab runaca, chai pueblo pungu ladoman pacalla parlangapaj jacu nishpa pusharca. Chaipimi, paipaj huauqui Asaelta huañuchishcamandaca ninanda fiñarishpa, picha costillas ladopi chugrichijpi huañurca.
28Chaita David jipalla yachashpami, cashna nijurca: “Ner shuti runapaj churi Abnerta huañuchishpa yahuarta jichashcamandaca ñucapash, ñuca mandajushcapash, Mandaj Diospaj ñaupajpica, causaita causaicaman imagutallapash na juchachi tucunachu canchi.
29Jatun llaquicunaca, Joab runapaj jahuapi, paipaj taitapaj tucuilla huasi ucu purapaj jahuapi urmachun. Joab runapaj familia puracunamandaca, yahuar llujshijujlla ung:uihuanga, pipash ama illachun. Shinallata lepra ung:uihuambash, taunahuan purij suchupash, espadahuan huañuchi tucuj runapash, yarjaimanda llaquita apaj runapash ama illachun” nijurcami.
30Joab runapash, paipaj huauqui Abisai shuti runapashmi, Abner runataca huañuchirca. Gabaón shuti pueblopi macanajui tiajpi, paicunapaj huauqui Asaelta huañuchishcamandami, chashna huañuchirca.
31Chaimandami Davidca, Joab runatapash paihuan purij runacunatapash cashna nishpa mandarca: “Cangunapaj churajushcacunata liquirichi, cañamuta churajushpa huatarichi. Abner huañushcamandaca, ninanda llaquirichi” nircami. Abner runata pambangapaj huandushpa rinajujpica, jatun mandaj Davidpashmi huashata catijurca.
32Shina rishpami Abner runataca, Hebrón pueblopi pambarca. Abner runata pambashca ladopimi, jatun mandaj Davidca, ninanda caparishpa huacajurca. Shinallata tucuilla gentecunapashmi huacanajurca.
33Jatun mandajca, cashna nishpami Abner runamandaca, yarishpa yarishpa huacajurca:
“Abnerca, ¿shuj nali runashnachu huañuna carca?
34Cambaj maquipash, na huatashca carcanguica.
Cambaj chaquipipash, na grillo nishca
jirrucunata churachishca carcanguica.
Nalita ruraj runacuna japishpa,
huañuchijpishnami huañushcangui” nishpami huacajurca.
Shinallata tucuilla gentecunapashmi, paimandaca cutin huacanajurca.
35Shina huacajujpillatami, punllapash nara chishajpillata tucuilla gentecuna Davidpajman shamushpaca, imagutallapash micupairi ninajurca. Ashtahuangarin Davidca, cashna nishpami juramenturca:
—Taita Diosca, cashnatapacha rurahuachun. Nara indi huashajujpillata tandata cashpa, shuj ima micunata cashpapash ñuca micujpica, pai Diosca ashtahuan llaquichihuachun— nircami.
36Shina nishcata tucui gentecuna yachashpami, alimi ninajurca. Jatun mandaj David tucui imatalla rurashcatapash, tucuicunami alicachinajurca.
37Shinamandami tucui Israel gentecunaca, Ner shuti runapaj churi Abner runata huañuchinajuchunga, jatun mandajca na mandashcata yacharca.
38Jatun mandajca, paita servijcunatapashmi cashna nijurca:
—Israel llactapi alicachi tucushca mandaj cunan huañushpa urmashcataca, ¿nachu yachanguichi?
39Jatun mandaj cachun aceiteta talishca javi tucushca cashpapash, cunanga imata ruraitapash na ushanichu. Sarvia shuti huarmipaj churicunaca, ñucapaca yapa shinllicunami. Paicuna nalita rurashcamandaca, Mandaj Diospash paicuna nalita rurashcashnallata llaquichishpami ali canman— nijurcami.
Who We AreWhat We EelieveWhat We Do
2025 by iamachristian.org,Inc All rights reserved.
