GÉNESIS 37 - Quichua Imbabura Bible

1Jacoboca, paipaj taita maipi causashca Canaán llactapimi causajurca.

2Caipica, Jacobopaj mirai familiacuna imashna causashcatami villajun: Joseca, chunga canchis huatata charishpami, paipaj huauquicunahuan llamacunata michishpa purirca. Chairalla viñai Joseca, Bilha shuti huarmipaj churicunahuan, Zilpa shuti huarmipaj churicunahuanmi purirca. Chai huarmicunaca, paipaj taitapaj huarmicunami carca. Joseca, paipaj huauquicuna nalita rurashpa purijpi, shujcuna parlanajujta uyashpami, paipaj taitaman villan carca.

3Taita Israelca, pai ña rucugu cashpa charishca churi cajpimi Josetaca, tucui paipaj churicunata yali ninanda juyan carca. Shina juyashpami, tauca colorhuan ahuashca túnica nishca jahualla churajunata rurarca.

4Paipaj huauquicunaca, tucui paipaj huauquicunata yali Joseta paipaj taita juyajta ricushpami, Josetaca millanayachirca. Chaimandami paitaca, aliguta juyaihuan rimaitaca na ushanajurca.

5Joseca, shuj muscuita muscushpa, paipaj huauquicunaman villajpimi, paitaca ashtahuan millanayachirca.

6Joseca cashnami nijurca: —Uyaichi, cunanga cai muscuitami muscushcani:

7Ricuichi, pamba chaupipimi trigota huangunajushcanchi. Chashna huangunajujpica, ñuca huanguca ñapash jatarishpami ali shayarirca. Cangunapaj huangucunaca muyundi tianajushpami, ñuca huangu ñaupajpi cumurinajurca— nircami.

8Shina nijpimi paipaj huauquicunaca, cashna nishpa tigrachirca: —¿Canllu ñucanchita mandaj tucugringui, na cashpaca ñucanchita mandashpachu charigringui?— ninajurcami. Paipaj muscuicunamandapash, paipaj parlocunamandapashmi, paitaca ashtahuambacha millanayachirca.

9Joseca, shuj muscuitapash muscushpami, paipaj huauquicunaman cashna nishpa parlarca: —Ricuichi, cutinmi shuj muscuita muscurcani. Caipica indipash, lunapash, chunga shuj luzerocunapash, ñuca ñaupajpi ñapash cumurimunajujtami muscurcani— nircami.

10Chai muscushcataca, paipaj taitamambash, paipaj huauquicunamambashmi parlajurca. Shina parlajujpimi, paipaj taitaca, cashna nishpa rimarca: —¿Ima muscuitata muscushcanguiyari? ¿Ñucapash, cambaj mamapash, cambaj huauquicunapashchu cambaj ñaupajpi, cai alpapi cungurij shamuna canchi?— nircami.

11Josepaj huauquicunaca, paitaca ashtahuanmi fiñashpa ricunajurca. Ashtahuangarin paipaj taitaca, chai muscuita parlashcataca aligutapachami yarijurca.

12Chai jipami Josepaj huauquicunaca, paicunapaj taitapaj llamacunata, Siquem shuti pueblo ladopi michingapaj rirca.

13Taita Israelca, Josetaca cashnami nirca: —Cambaj huauquicunaca, Siquem shuti pueblopimi llamacunata michinajun. Canda paicunapajman cachangapaj shamui— nircami. Shina nijpimi, Joseca: —Caipimi cani— nishpa tigrachirca.

14Taita Israelca, Josetaca cashnami nirca: —Cunanda rishpa, cambaj huauquicunapash, llamacunapash imashna cajta ricushpa, ñucaman villangapaj tigramugri— nircami. Shina nishpa Hebrón pueblomanda cachajpimi, Siquem shuti puebloman chayagrirca.

15Shuj runami Josetaca, pambapi chingashca purijujta tuparirca. Chai runami, Josetaca: —¿Imatata mascangui?— nirca.

16Shina nijpimi Joseca, cashna nishpa tigrachirca: —Ñuca huauquicunatami mascajuni. ¿Maipi michinajujtapash nachu ricupangui?— nircami.

17Shina nijpimi chai runaca, cashna nishpa tigrachirca: —Ñami caimandaca rishca. ‘Dotán shuti puebloman jacuchi’ ninajujtami uyarcani— nircami. Shina nijpimi Joseca, paipaj huauquicunata catishpa rishpa, paicunataca Dotán pueblo ladopi tuparirca.

18Paicuna Joseta carumanda ricushpaca, narapash paicunapajman chayajpillatami, Joseta huañuchingapaj pacalla parlarinajurca.

19Paicunaca, caishuj chaishujmi cashna ninajurca: —Ricuichi, muscushpa causajca shamujunmi.

20Cunanga paita huañuchishpa, shuj jatun utujupi shitangapaj shamuichi. Shina shitashpaca: ‘Imapash millai animalmi, paitaca micushcanga’ nishunchillami. Chai jipaca, pai muscushcacunaca imami tucun ricushunchi— ninajurcami.

21Chashna ninajujta Rubén uyashpami, paipaj huauquicunapaj maquimanda cacharichishpa: —Paitaca, na huañuchinachu canchi— nirca.

22Rubenga, ashtahuan cashnatapash nircarami: —Yahuarta na jichanachu canguichi. Paitaca, yacuta tandachingapaj rurashca cai jichushca pambapi tiaj jatun utujupilla shitaichi. Cangunapaj maquihuanga, imatapash na ruranachu canguichi— nircami. Paipaj huauquicunapaj maquimanda Joseta chashna cacharichishpa, paipaj taitapajman tigrachingapajmi cashnaca nijurca.

23Chai jipami, cashna tucurca: Paipaj huauquicunapajman José chayajpimi, tauca colorhuan ahuashca túnica nishca, Josepaj jahualla churajunata quichunajurca.

24Chai jipami Joseta japishpa, yacuta tandachingapaj rurashca jatun utujupi shitanajurca. Chai utujupica, yacuca na tiashcachu carca.

25Chai jipaca, micungapajmi tiarinajurca. Shina tianajushpa vichai ricushpami, taucapura ismaelitacuna Galaad llactamanda shamunajujta ñapash ricunajurca. Paicunapaj camellocunaca, mishquillagu ashnajuj jambicunata, balsamo nishca, mirra nishca jambicunatapash aparishcami, Egiptoman apashpa shamunajurca.

26Chaimandami Judá runaca, paipaj huauquicunataca cashna nirca: —¿Ñucanchi huauquita huañuchishpa na villashpa upalla pacashpaca, imatata tarina canchi?

27Shamuichi, paitaca ismaelitacunaman jatushunchi. Paita jatushpaca, ñucanchi maquihuanga na llaquichishunllu. Paica ñucanchi huauqui, ñucanchi aichapachamari— nircami. Shina nijpimi paipaj huauquicunapash, pai nishcataca alicachinajurca.

28Randishpa, jatushpa purij madianitacuna yalinajujpimi Josetaca, yacuta tandachingapaj rurashca jatun utujumanda llujchinajurca. Shina llujchishpa vichai pushamushpami, ishcai chunga culquipaj ismaelitacunaman jatunajurca. Shina jatujpimi Josetaca, Egiptoman apanajurca.

29Chai jipami, Rubenga chai jatun utujuman cutin tigrashpa, Joseta chaipi na tarishpaca, pai churajushcata liquirca.

30Paipaj huauquicunapajman tigrashpami, cashna nirca: —Chairalla viñai Joseca na ricurinllu. Ñucaca, ¿maimanda rishayari?— nircami.

31Shinamandami paicunaca túnica nishca, Josepaj jahualla churajunata japirca. Shina japishpami, túnica nishca jahualla churajunataca, huarmi chivopaj shuj huahua chivota cungata muchushpa, chai yahuarpi javinajurca.

32Shina rurashpami, tauca colorhuan ahuashca túnica nishca jahualla churajunata paipaj taitapajman cachajpi apamushpa, cashna ninajurca: “Caitami tarircanchi. ¿Cambaj churipaj churajunachu, nachu cambaj churipaj churajuna imata? Cunanga rijsilla” ninajurcami.

33Jacoboca, chai churajunata rijsishpami cashna nirca: “Túnica nishca jahualla churajunaca, ñuca churipajmi capan. Paitaca, imapash millai animalmi micushcanga. Joseca, caita chaitamari fiti tucushcanga” nircami.

34Shinamandami Jacoboca, pai churajushcacunata liquishpa, cañamuta churajushpa, paipaj churimandaca tauca punllacunata llaquilla carca.

35Shina llaquilla cajpimi, paipaj tucuilla churicuna, paipaj tucuilla ushicuna paita cushichingapaj rinajurca. Ashtahuangarin Jacoboca, cushijuita japingapaj na munashpami, cashna nirca: “Seolpi ñuca churihuan tuparingapaj ringacamanmi, cashna llaquilla churajunahuan causasha” nishpami, paipaj taitaca huacajurca.

36Madianitacunaca Josetaca, cuidaj soldadocunata mandashpa, Faraonda servij Potifar shuti runamanmi, Egiptopi jaturca. Judá runamandapash, Tamar huarmimandapashmi villajun