LEVÍTICO 21 - Quichua Imbabura Bible

Curacunataca, Diospajlla causachunmi mandashca

1Mandaj Diosca, Moisestaca cashnami nirca:

“Aaronbaj churicunaman, cashna nishpa villai: ‘Canguna purapi maijambash huañujpi, chai huañushcapi tacarishpa na mapayanachu canguichi.

2Ashtahuangarin paipaj ladolla familia, na cashpaca paipaj mama, na cashpaca paipaj taita, na cashpaca paipaj churi, na cashpaca paipaj huauqui huañujpica mapayachunlla.

3Na cashpaca cusata nara charij, jarihuan nara tacarishca paipaj panimi, paipaj huasipi causanga. Chai pani huañujpica, mapayachunlla.

4Paipaj llactapi causajuj maijan runashnapash mapayashnaca, na mapayanachu.

5Curacunaca, uma corona ajchatapash na rutuchingachu, barbas pundatapash na ruturingachu. Paipaj cuerpotapash, na aspirishpa chugrichingachu.

6Paicunaca, Taita Diospajlla shicanyachishcami canga. Taita Diospaj shutitapash, na yangapi churangachu. Curacunaca, Mandaj Diosman imagutapash carashcata rupachishpa, Taita Diosman carashca tandata cushpami causanajunga. Shinamandami, Diospajlla shicanyachishcacuna canga.

7Culquimanda huainayaj huarmihuambash, na cashpaca shuj runahuan ña tacarishca huarmihuambash na cazarangachu. Shinallata cusa jichushca huarmihuambash, na cazarangachu. Curacunaca, Taita Diospajlla shicanyachishcacuna cashpami, na chashna ruranga.

8Curacunataca, Taita Diosman carashca tandata Diosman cunajuj cashcamanda, Diospajlla cachun shicanyachingui. Ñucaca, jucha illaj causachun, cangunata shicanyachij Mandaj Dios cajpimi, cangunapaj ñaupajpica curacunapash jucha illaj canga.

9Shuj curapaj ushi, jaricunahuanlla causai callarishpaca, paipaj taita alicachi tucushcatami huaglichin. Chaimandami, chai ushica rupachi tucunga.

10Paipaj huauqui cura puracunapi mandaj curataca, talishpa javina aceiteta, paipaj umapi talishpami javishca. Shinallata Diospajta rurangapaj churajunata churajuchunmi shicanyachishca. Shina cashcamanda paica, paipaj umapi churajushcatapash na llujchingachu, pai churajushcacunatapash na liquingachu.

11Huañushca sirijuj ucumambash, na yaicungachu. Paipaj taitapacha, mamapacha huañujpipash na mapayangachu.

12Diospajlla huasimandapash, na llujshingachu. Paipaj Taita Diospaj huasitaca, na yangapi churangachu. Paitaca, Taita Diospajlla tucuna aceiteta talishpa javishpami, Diospajlla cachun shicanyachishca. Ñucami, Mandaj Dios cani.

13Paica, jarihuan nara tacarishca cuitsagutami, paipaj huarmi cachun japinga.

14Paica, sapalla huarmita cusa jichushca huarmita, culquimanda huainayaj huarmitaca na cazarangachu. Ashtahuangarin paipaj llactamandallata, jarihuan nara tacarishca cuitsagutami, paipaj huarmi cachun japinga.

15Paipaj miraicuna paipaj gente puracunapi ama yangapi churai tucuchunmi, na chashna ruranga. Mandaj Dios ñucami, jucha illaj causachun shicanyachij Dios cani’ nishpa villai” nijurcami.

16Mandaj Diosca, Moisestaca cashnami nijurca:

17“Aaronman cashna nishpa villai: ‘Cambaj cati mirai puramanda maijan cashpapash, cuerpopi imapash huagli cashpaca, Taita Diosman tandata cungapaj na chayai ushangachu.

18Imapash huagli cashpaca, maijan runapash na Diospajman quimiri ushangachu. Ñausa runa, na cashpaca janga runa, na cashpaca paipaj cuerpomanda imatapash fiti tucushca runa, na cashpaca imapash huagli viñashca runapash na quimiri ushangachu.

19Na cashpaca chaqui faqui runa, na cashpaca maqui faqui runapash na quimiri ushangachu.

20Na cashpaca, cunga tullu llujshishca runa, na cashpaca uchilla runa, na cashpaca ñavipi yuraj tiarishca runa, na cashpaca carachalla runa, na cashpaca chupushca runa, na cashpaca paipaj lulun llapirishca runa cashpapash, na quimirita ushangachu.

21Aarón curapaj miraicunamandaca, maijan cashpapash imapipash huagli cashpaca, Mandaj Diosman carashcata rupachishpa cungapapaj quimiritaca, na chayangachu. Paipica, huagli tiashcamandami na quimiri ushanga. Taita Diosman carashca tandata cungapajpash, na quimiri ushangachu.

22Shina cashpapash, Taita Diospajlla shicanyachishpa, paipajlla cachun paiman rupachishpa carashca micunacunataca micui ushangami.

23Ashtahuangarin paipi huagli tiashcamandami, telahuan quilpashca huashamambash, altarmambash na quimiri ushanga. Ñucapajlla huasita ama yangapi churangapajmi, na quimiri ushanga. Mandaj Dios ñucami, jucha illaj causachun shicanyachini’ nishpa villai” nijurcami.

24Chaipimi Moisesca, Aaronmambash, paipaj churicunamambash, tucui israelcunamambash villajurca.