JOSUÉ 15 - Quichua Imbabura Bible

Judá aillupaj llactatami villajun

1Suerteta rurajpi Judá aillupaj mirai familiacuna imashna cashcashnallata, paicunapaj urmashca llactacunaca, Edom llacta linderocamanmi carca. Ura pundamambash, Zin nishca jichushca pambacamanmi paicunapaj tucurca.

2Urai lado linderoca, Cachi tiaj Cucha chupayashca manña ura ladomanda,

3uraiman rishpaca, Acrabim shuti vichaicaman rishpami, Zin nishca jichushca pambaman yalijurca. Urai ladomanllata linderoca, Cades-barnea shuti pueblota vichai rishpaca, Hezrón shuti pueblocamanmi yalijurca. Shinallata Adar shuti pueblota vichai rishpami, Carca shuti puebloman muyujurca.

4Chaimandaca, Asmón shuti puebloman yalishpami, Egipto ladota rijuj jatun larca yacuman llujshishpa, mama cuchapi tucurigrirca. Urai ladoman linderoca, chaimi cangunapaj canga.

5Indi llujshimuj lado linderoca, Cachi tiaj Cucha chaquimanda Jordán yacu yaicujuj ladocamanmi canga. Jahua lado linderoca, Jordán yacu yaicujuj cucha chupayashca ladomandami callarijun.

6Chai linderoca, Bet-hogla shuti pueblota vichai rishpami, Bet-arabá shuti pueblo jahua ladoman yalijun. Chaimandaca, Rubenbaj churi Bohán shuti runapaj jatun rumicamanmi vichai rijun.

7Chaimandaca, Acor shuti pugru pambamanda Debir shuti pueblocamanmi vichai yalijun. Jahua ladotaca, Gilgal shuti pueblo chimba puratami yalijun. Chai puebloca, jatun larca yacu ura ladoman tiaj Adumín shuti vichai rina ñanda vichai rina chimba purapimi. Chaimandaca, En-semes shuti yacuta yalishpami, Rogel shuti pugyucaman rijun.

8Chai linderoca, Hinom shuti runapaj churipaj pugru pambata vichai rishpami, jebuseocuna causanajuj Jerusalén pueblo ura ladota yalijun. Chaimandaca, Hinom shuti runapaj churipaj pugru pamba chimba purapi tiaj urcu pundatami vichai rijun. Chai urcuca, indi huashajuj ladoman tiaj Refaim shuti pugru pamba jahua lado manñamanmi.

9Chai linderoca, urcu pundamandaca, Neftoa shuti pugyucamanmi muyujun. Chaimandaca, Efrón shuti urcu ladollapi tiajuj pueblocunata yalishpami, Baala nishca Quiriat-jearim shuti pueblota muyujun.

10Chai jipami chai linderoca, Baala shuti pueblomandaca, indi huashajuj ladoman tiajuj Seir shuti urcu ladoman muyujun. Jearim shuti urcu jahua ladota yalishpami, Quesalón shuti puebloman chayajun. Chaimandaca, Bet-semes shuti puebloman urai rishpami, Timna shuti puebloman yalijun.

11Chaimandaca, Ecrón shuti pueblo ladota jahuaman rishpa, Sicrón shuti pueblota muyushpami, Baala shuti urcuta yalijun. Chaimandaca, Jabneel shuti pueblota yalishpami, mama cuchaman chayajun.

12Indi huashajuj lado linderoca, Mama Cuchami. Judá aillupaj linderocunaca, paicunapaj familiacuna imashna cashcashnallatami, cai tucui muyundicuna paicunapaj carca.

Caleb shuti runaca, Hebrón shuti, Debir shuti pueblocunatami japijushca(Jue. 1:10-15)

13Jefone shuti runapaj churi Caleb shuti runamanga, Mandaj Dios imashna Josueta mandashcashnallatami, Judá shuti runapaj miraicuna japinajushca llactapillata alpacunata curca. Anac shuti runapaj taita shayachishca Quiriat-arba shuti pueblotami curca. Chai puebloca, Hebrón shutimi.

14Caleb shuti runami, Anac shuti runapaj Sesai, Ahimán, Talmai shuti quimsa churicunataca, chai llactamanda llujchishpa cacharca.

15Chai llactamandaca, Debir shuti pueblopi causajcunahuan macanajungapajmi, vichai rirca. Chai Debir shuti puebloca, pundaca Quiriat-sefer shutimi carca.

16Chaipimi Caleb shuti runaca, cashna nirca: “Maijambash Quiriat-sefer shuti pueblopi causajcunata macanajushpa mishashpa, chai pueblota japijpica, Acsa shuti ñuca ushitami, paipaj huarmi cachun cusha” nircami.

17Chai llactataca, Caleb shuti runapaj huauqui Cenez shuti runapaj churi Otoniel shuti runami japirca. Chaimandami Caleb shuti runaca, Acsa shuti paipaj ushitaca, Otoniel runapaj huarmi cachun curca.

18Paipaj huarmita ña pushajujpimi, cashna tucurca: Otoniel runaca, paipaj huarmitami, tarpuna alpacunata cambaj taitata mañai nishpa, ari nichirca. Chaimandami chai huarmica, burropi tiajushcamanda uriajurca. Chashna uriajujpimi, paipaj taitaca:

—¿Imatata ningui?— nishpa tapurca.

19Shina tapujpimi, paica cashna nishpa tigrachirca:

—Ñuca mañashcata carahuayari. Neguev pambapica, ñami alpacunata carahuarcangui. Shinallata pugyu yacucuna tiaj alpacunatapash carahuayari— nircami.

Shina nijpimi Caleb shuti runaca, pugyucuna tiaj alpacunata janajmambash, uramambash cararca.

Judá llactapi tiaj pueblocunamandami villajun

20Judá aillupaj miraicunaca, cai llactacunatami, paicunapaj familiacuna imashna cashcashnallata, paicunapaj cachun japinajurca.

21Judá aillupaj miraicunaca, urai lado manñaman tiajuj Edom shuti llactahuan linderopica, cai pueblocunatami japirca: Cabseel, Edar, Jagur,

22Cina, Dimona, Adada,

23Cedes, Hazor, Itnán,

24Zif, Telem, Bealot,

25Hazor-hadata, Queriot, Hazor nishca Hezrón,

26Amam, Sema, Molada,

27Hazar-gada, Hesmón, Bet-pelet,

28Hazar-sual, Beerseba, Bizotia,

29Baala, Iim, Esem,

30Eltolad, Quesil, Horma,

31Siclag, Madmana, Sansana,

32Lebaot, Silhim, Aín, Rimón shuti pueblocunatami japinajurca. Tucuimandaca, ishcai chunga iscun pueblocunatami, muyundi uchilla llactacunandi japinajurca.

33Jatun pambacunapica: Estaol, Zora, Asena,

34Zanoa, En-ganim, Tapúa, Enam,

35Jarmut, Adulam, Soco, Azeca,

36Saaraim, Aditaim, Gedera, Gederotaim shuti pueblocunatami japinajurca. Chunga chuscu chai pueblocunataca, muyundi uchilla llactacunandimi japinajurca.

37Shinallata Zenán, Hadasa, Migdal-gad,

38Dileán, Mizpa, Jocteel,

39Laquis, Boscat, Eglón,

40Cabón, Lahmam, Quitlis,

41Gederot, Bet-dagón, Naama, Maceda shuti pueblocunatapashmi japinajurca. Chunga sucta chai pueblocunataca, muyundi uchilla llactacunandimi japinajurca.

42Shinallata Libna, Eter, Asán,

43Jifta, Asena, Nezib,

44Keila, Aczib, Maresa shuti pueblocunatapashmi japinajurca. Chai iscun pueblocunataca, muyundi uchilla llactacunandimi japinajurca.

45Ecrón shuti pueblotaca, muyundipi tiaj huasicunandi, muyundi uchilla llactacunandimi japinajurca.

46Ecrón shuti pueblomandaca, mama cuchacamanmi, Asdod shuti pueblo myundipi tiaj huasicunandi, muyundi uchilla llactacunandi japinajurca.

47Asdod shuti pueblotaca, myundipi tiaj huasicunandi, muyundi uchilla llactacunandimi japinajurca. Gaza shuti pueblotapash, muyundipi tiaj huasicunandi, muyundi uchilla llactacunandimi japinajurca. Chai pueblocunataca, Egipto llacta jatun yacucamanmi, Jatun Cucha manñacunandi japinajurca.

48Urcucunapica: Samir, Jatir, Soco,

49Dana, Debir nishca Quiriat-sana,

50Anab, Estemoa, Anim,

51Gosén, Holón, Gilo shuti pueblocunatami japinajurca. Chunga shuj chai pueblocunataca, muyundi uchilla llactacunandimi japinajurca.

52Shinallata Arab, Duma, Esán,

53Janum, Bet-tapúa, Afeca,

54Humta shuti, Hebrón nishca Quiriat-arba shuti pueblotapash, Sior shuti pueblotapashmi japirca. Chai iscun pueblocunataca, muyundi uchilla llactacunandimi japinajurca.

55Shinallata Maón, Carmel, Zif, Juta,

56Jezreel, Jocdeam, Zanoa,

57Caín, Gabaa, Timna shuti pueblocunatapashmi japinajurca. Chai chunga pueblocunataca, muyundi uchilla llactacunandimi japinajurca.

58Shinallata Halhul, Bet-sur, Gedor,

59Maarat, Bet-anot, Eltecón shuti pueblocunatami japinajurca. Chai sucta pueblocunatapash, muyundi uchilla llactacunandimi japinajurca.

60Shinallata Quiriat-jearim nishca Quiriat-baal shuti, Rabá shuti chai ishcai pueblotapash, muyundi uchilla llactacunandimi japinajurca.

61Jichushca pambapica: Bet-arabá, Midín, Secaca,

62Nibsán shuti pueblocunata, Cachi tiaj Pueblota, En-gadi shuti pueblotapashmi japinajurca. Chai sucta pueblotaca, muyundi uchilla llactacunandimi japinajurca.

63Ashtahuangarin Judá shuti runapaj miraicunaca, Jerusalenbi causanajuj jebuseocunata llujchishpa cachaitaca na ushanajurcachu. Chaimandami jebuseocunaca, cunangaman Judapaj miraicunahuan Jerusalenbillata causanajun.