JOB 21 - Quichua Imbabura Bible

Job runaguca, nalita rurajcunarami imapipash ali llujshin nishcami

1Shinamandami Job runaguca, cashna nishpa tigrachirca:

2“Ñuca rimashcata ali uyaichi. Cai rimashcata uyashpami, ñucata cushichihuanguichi.

3Ñuca rimashcataca, upalla uyahuaichilla. Ñuca rimashca jipara, nalicachishpa asinguichi.

4Ñucaca, ¿maijambash shuj runatachu aij nishpa rimajuni? Shina cashpaca, ¿imashpata ñuca shungupica, na llaquirishayari?

5Ñucata ricushpa manllarichiyari. Shimita maquihuan quilparichiyari.

6Yarishpaca ñucallatapashmi, ninanda manllarini. Chaita yarishpami, ñuca cuerpopash chujchushpa manllarini.

7¿Imashpata Diosta na manllajcunara causanajunlla? Rucuyashpapash, ashtahuanmi charijyan.

8Paipaj miraicunaca, paipaj ricuipica, shinllitapachami viñanajun. Paipaj nietocunapash, paipaj ladopimi causanajun.

9Paipaj huasicunapipash, ima manllaimandapash quishpirishcami. Paicunataca, Taita Diospash na llaquichinllu.

10Paipaj jari huagracuna puñushpaca, na yangalla puñunllu, chichuchinllami. Huarmi huagracunapash na shullushpa, ali huahuacunatallami huachan.

11Paipaj uchilla huahuacunaca, ashtaca llamacunashnami llujshinajun. Paipaj churicunaca, fahuashpa fahuashpami purinajun.

12Paicunaca uchilla tamborta, citarata tocashpami fahuanajun. Gaitata tocashpami cushijunajun.

13Tucui punllacunami, imapipash ali llujshin. Casilla aliguta huañushpami, Seolman urai rinajun.

14Taita Diostaca, cashna nishpami rimanajun: ‘Ñucanchimanda anchuri. Can imatalla rurachun mandashcata yachangapaca, na munanchichu.

15Tucui Ushaita Charij Diosta servingapaca, ¿pitayari? ¿Paita mañashpaca, imatashi japishun?’ ninajunmi.

16Ricuichi, Dios carashca alicunaca na paicunapaj maquipichu. Amalla ñucaca, Diosta na manllajcunashna yarijusha.

17¿Mashnacamanllari, Diosta na manllajcunapaj lamparapash huañuchi tucumbash? Paicunataca, llaquicuna japinllami. Taita Dios ninanda fiñarishpami, nanaicunata caiman chaiman cachamun.

18Paicunaca, huaira apanalla jupashnami canga. Jatun acapanahuan apai tucunalla jupashnami canga.

19Paicuna ninanda llaquichishcamandami, llaquicunata paicunapaj huahuacunaman Taita Diosca alichinga. Paicuna yachachunmi, paicuna japina cashcata cunga.

20Paipaj llaquitaca, paipaj ñavihuambachami ricunga. Tucui Ushaita Charij Dios ninanda fiñarishpa cachamushcataca ufiangapachami.

21Paipaj causai quillacunata fitijpi, pai huañushca jipaca paipaj huasipica paica, ¿ima cushijuitashi charinga?

22¿Taita Diostaca, ali yachaita pipash yachachi ushangachu? Jatun tucushcacunatapash, paimi ricushpa llaquichinga.

23Paica, juyailla shinllipacha cashpallatami, aliguta casilla causashpa, imatapash na manllashpa huañunga.

24Paipaj funducunapash, leche jundami canga. Paipaj tullucunapash, ñutuju talirijujmi canga.

25Ashtahuangarin caishujca, manllanayai llaquita apashpami huañunga. Paica, ima horallapash na mishquilla micushpallatami huañunga.

26Shina cashpapash, ishcandillatami ñutu alpapi pambai tucushpa siringa. Ishcanditallatami, jurucuna quilpanga.

27Ricuichi, ñucaca canguna imatalla yarinajujtaca yachanimi. Ñucata fiñashpa juchachingapaj, yarinajujtaca yachanimi.

28Cangunaca, cashnami ninguichi: ‘Mandaj runapaj huasica, ¿imata tucushcayari? Diosta na manllajcuna causanajushca carpaca, ¿maipitayari?’ ninguichimi.

29Cangunaca, ñanda yalijcunataca, ¿nachu tapushcanguichi? Paicuna imatalla tigrachijtaca, ¿nachu yachashcanguichi?

30Dios tucuchijui punllapi nalita ruraj runa pacai tucunatapash, ¿nachu tapushcanguichi? Paicunaca, Dios ninanda fiñarishca punllapica, alichi tucungami.

31Maijanda pai nalita rurashcataca, ¿ñavipi ricuchingayari? Pai imatalla rurashcamandaca, ¿pita japina cashcata cunga?

32Paica, pambana utujumanmi apai tucunga. Paita pambashca alpa mundun jahuapimi pacarinajunga.

33Paipaca, sirina pugru pamba alpapica, mishquillagumi canga. Paita catishpami, tucui runacuna apai tucunajunga. Paita ñaupashpaca, na cuentai ushanalla ashtacacunami rishca.

34Ñucataca, ¿imashpata yanga cushichihuanguichi? Canguna tigrachishca shimicunaca, umachingapajllamari” nijurcami.