ISAÍAS 22 - Quichua Imbabura Bible

Muscuipishna ricurij pugru pambata llaquichinatami villashca

1Muscuipishna ricurij pugru pambata llaquichinata Dios villashcatami villashca. ¿Imashpata cunanga, cangunapaj llacta puracunandi, huasi jahuaman llujshinguichi?

2Cai pueblopi causajcunaca, tucuicuna manllanayaita caparishpami llujshinguichi. Imashnallapash cushijushpami caparinajunguichi. Caipi causajcunaca, na espadahuan huañuchi tucurcachu, na jatun macanajuipi huañunajurcachu.

3Cangunata mandajcunapashmi, arcocunahuan huañuchinamandaca, paicunahuan pacajushpa calpanajurca. Shina calpanajujpimi, japishpa huatanajurca. Caipi causajcunaca, pacajungapaj llujshishpa, caruman rishca cashpapash, tucuillami japi tucushpa huatai tucunajurca.

4Chaimandami cashna nircani: “Ñuca llacta puracuna llaquichi tucushcamandaca, ninandapacha huacajuchun saquihuaichilla. Ñucataca, chaillata huacai nishpa cushichinataca, na yarinachu canguichi.

5Ninanda caparishpa, manllarishpa musparina punllatami, tucuita Mandaj Jatun Diosca cachamushca. Pueblo muyundi jatun pircata urmachingapajmi, muscuipishnalla ricurij pugru pambapi shayanajun. Lomaman uyarijtami, ninanda caparinajun” nircanimi.

6Elam llactamandaca, flechacunata alichinata apashpami, carretacunandi, caballopi tiarishca soldadocunandi rinajurca. Kir shuti llactamanda soldadocunaca, jarcarina escudocunatami llujchinajurca.

7Cangunapaj juyailla pugru pambacunapica, carretacunallami jundarca. Cangunapaj pueblo pungu ñaupajpica, caballocunapi tiarij soldadocunami, carpacunata shayachishpa tianajurca.

8Judá llactapi causajcunata jatanashna jarcajujtaca, ña anchuchircami. Chai punllapica, urcu caspicunahuan shayachishca huasipi macanajunacunatami, alichishca tiajuj ricurcanguichi.

9Davidpaj pueblo pircacunatapash, caipi chaipi ashtahuan chijtarishcatami ricurcanguichi. Uraman tiajuj tanquepimi, yacutapash tandachircanguichi.

10Jerusalén pueblo huasicunatapash callarishpa cuentashpami urmachircanguichi. Chai huasicunataca, muyundi jatun pircata ashtahuan shinllita rurangapajmi urmachircanguichi.

11Mauca tanquemanda yacuta tandachingapajpash, jatun pircacuna chimbapurashca chaupipimi allarcanguichi. Chaita ruraj Diostaca, na cazurcanguichica. Chaita rurajtaca, ashatallapash na yarircanguichica.

12Shinamandami tucuita Mandaj Jatun Diosca, chai punllapica ninanda llaquirichun, yarishpa yarishpa huacachun, ajchata ruturichun, cañamuta churajuchun cayarca.

13Ricuichi, ninanda cushijushpami huagracunata, llamacunata huañuchishpa, aichata micushpa, vinota ufiashpa, cashna ninajunguichi: “Micushunchi, ufiashunchi. Cayapaca huañuringami” ninajunguichimi.

14Chaicunata rurashcamandami, tucuita Mandaj Diosca, ñuca rinripi cashna nihuarca: “Cai juchata rurashcataca, canguna huañungacamambash, napacha cungashachu” nircami tucuita Mandaj Jatun Diosca.

Sebna shuti runapaj randica, Eliaquim shuti runatami churanga

15Tucuita Mandaj Diosca, cashnami nin: “Culquita alichij Sebna shuti mayordomopajman rishpa, cashna nigri:

16‘¿Canga, caipica imatata charingui? Caipica, ¿pitata charingui? Shina cashpaca, ¿imashpata lomapi utujuta rurachijcunashna, can huañujpi pambana utujuta caipi rurachircangui? Paillata causangapaj jaca rumipi juyailla utujuta rurachinshnami rurachishcangui.

17Ricui, candaca shuj llactaman apai tucushpa shinllita llaquichi tucushpa prezu causachunmi, Mandaj Diosca cachanga. Chaipica, cambaj ñavi quilpashna pingaichingapachami.

18Candaca, jatun pambapi pelotata shinllita urai cachanshnami, caruta cachanga. Canga chaipimi huañungui. Chaipimi, can jariyashpa purina carretacunapash tucuringa. Cambaj amopaj huasitapash, canmi jatun pingaipi churangui.

19Can tiajuj pushtumandaca, anchuchishpami shitasha. Can tiajushcamandaca, t'angashpami anchuchisha.

20Chai punllapica, Hilcías shuti runapaj churi, ñucata servij Eliaquim shuti runatami cayasha.

21Cambaj churajunacunataca, paimanmi churachisha. Cambaj cinturaspi huatarina caratapash, paimanmi huatachisha. Cambaj ushaitapash, paimanmi cusha. Paica, Jerusalenbi causajcunapajpash, Judá aillupajpash, taitashnami canga.

22Davidpaj huasi llavetaca, paipaj maquipimi churasha. Pai pascashcataca pipash na vichangachu, pai vichashcataca pipash na pascangachu.

23Paitaca, shinlli shinlli pushtupi clavota tacashcashnami, shinllita churasha. Chaipi paita tiachijpimi, paipaj taitapaj huasi ucu purapash alicachi tucunga.

24Paipaj taitapaj huasi ucu purapash, paicunapaj churicunapash, nietocunapash ima alicachi tucushcataca, tucuitami paiman cunga. Uchilla tazacunamanda, vasocunamanda callarishpa, jatun jarrocunacamanmi, tucuillata paipi huarcunajunga’ nigri” ninmi.

25Tucuita Mandaj Diosca, cashnatapashmi nin: “Chai punllapica, shinlli caspipi tacashca tiajuj clavoca, anchuchi tucungallami. Paipi huarcushca tiajuj chai charishcacunaca, urmashpa tucuillami ñuturinga” ninmi Mandaj Diosca.