ISAÍAS 42 - Quichua Imbabura Bible

Mandaj Diosta Servij Runagumandami villajun

1Ricuichi ñucata servij, ñuca agllashca runataca ñucami cuidasha. Paipimi, ñuca almaca ninanda cushijun. Ñuca Espiritutaca, paipimi churarcani. Paimi, imatapash cashcatapacha ruranataca, llactacunaman apamunga.

2Paica, na caparijungachu, na shinllita rimajungachu. Pai rimashcapash, na ñangunapi uyaringachu.

3Chijtarishca sucustapash, na faquingachu. Huañunalla rupajuj lamparatapash, na huañuchingachu. Ashtahuangarin na llullashpa, imatapash cashcatapacha rurashpami ricuchinga.

4Paica, imatapash cashcatapacha rurana, cai pachapi tiangacamanmi na shaijunga, na samanga. Mama cucha manñacunapi causajcunapash, pai mandachunmi shuyanajunga” ninmi.

5Mandaj Taita Diosca, jahua pachata rurashpaca, telata mandanshnami churarca. Paimi, cai pachatapash, caipi tucui imalla tiajcunatapash rurarca. Cai pachapi causajcunamambash, paimi samaita cun. Tucui cai alpapi purijcunamanmi, espirituta cun. Paimi cashna nin:

6“Mandaj Dios ñucami, candaca imatapash cashcatapacha rurachun cayarcani. Ñucallatami, candaca cuidashpa, cambaj maquimanda pushasha. Candami, ñuca agllashcacunahuan ñuca ari ninajushcata rurachun, shuj llactapi causajcunapaca, michashna punchayachijuchun churasha.

7Ñausacunapaj ñavita pascachun, prezu tianajujcunatapash, yana yana ucucunapi vichai tucushcacunatapash llujchijuchunmi churasha.

8Ñucaca, Mandaj Dios shutimi cani. Ñuca ninanda alicachi tucunataca, pimambash na cushachu. Labrashpa rurashca dioscunata, ñucapaj randi alicachinajuchumbash, na saquishachu.

9Ricuichi, punda ñuca villashcacunaca, ñami pactamurca. Cunanga, nara rurashca mushujta jipaman ruranatami villani. Chaitapash rurashpa ricuchishapachami” ninmi.

Mandaj Diostaca, ninan ushaihuan quishpichij cajpimi alicachishca

10Mandaj Diostaca, mushuj candanahuan candaichiyari. Cai pacha tucuri manñacunapi causajcuna, alicachpaichiyari. Mama cuchaman urai rijcunapash, chaipi imalla tiajcunapash, mama cucha chaupipi tiaj llactacunapash, chaipi tucui causajcunapash, alicachipaichiyari.

11Jichushca pambacunapash, chaipi tiaj pueblocunapi causajcunapash, chai muyundi ladocunapi causaj Cedar shuti aillu runacunapash, candaichiyari. Sela shuti pueblopi causajcunapash, ninan cushijuihuan urcu pundacunamanda caparishpa candaichiyari.

12Mandaj Diostaca, ninanda alicachipaichiyari. Pai alicachi tucushcataca, mama cucha manñacunapi causajcunaman villaichiyari.

13Mandaj Diosca, manllanayai jatun runashnami llujshinga. Macanajunata ali yachaj soldadoshnami, juyaimanda ninanda fiñarishpa shayaringa. Paica, ninanda caparishpa shinlli tucushpami, paita fiñajcunahuanga macanajunga. Shinlli tucushpami shayaringa.

14“Ñucaca, unai huatacunatami imatallapash na nijurcani. Imatapash na ricujunshna, na uyajunshna casilla tiajurcanillami. Ungugrijuj huarmi nanachishpa caparinshnami, shinllita caparisha. Llaquinayaita huañuchishpami, tandachishpa micunshna tucuchisha.

15Urcucunapi, lomacunapi tiaj tucui jihuacunata chaquichishpami, jichushcata saquisha. Jatun yacu rijuj huaicucunatapash, chaquishca alpatami saquisha. Cuchayashca yacucunatapashmi chaquichisha.

16Ñausacunataca, paicuna na purishca ñandami pushasha. Paicuna na rijsishca chaqui ñangunatami, aliguta pushasha. Paicunapaj ñaupajpica, yana yana tutatapash, punchapamba michamanmi tigrachisha. Na puri ushanallacunatapash, llambu pambacunatami rurasha. Caicunata rurashpami, napacha jichushpa saquisha.

17Yanga dioscunata yariajlla causajcunaca, ninandapacha pingaichi tucushpami, huashaman tigrachi tucunajunga. Paicunaca, yacuyachishpa imamambash rijchajcunata rurashcatami: ‘Cangunami, ñucanchi dioscuna canguichi’ ninajun.

Israelcunaca, Dios llaquichijpipash na yachajunllu

18Rinri na uyajcuna, ali uyaichiyari. Ñausacunapash, ñavita pascashpa aliguta ricuichiyari.

19¿Pita ñausacuna tucushca? Ñucata servijcunami ñausa tucushca. ¿Pita rinri na uyajcuna? Ñuca cachashca villajcunami rinri na uyajcuna tucushca. Ñuca agllashcacunashna, Mandaj Dios ñucata servijcunashna ñausaca, ¿pipash tianllu?

20Paicunaca, imata ashtacata ricushpapash na yuyaita japinllu. Rinrita pascashpapash, imatallapash na uyanllu.

21Mandaj Diosca, imatapash cashcatapacha ruranata juyaimandami, pai mandashca shimicunataca juyailla cajta, jatun cajta ricuchinajuchun curca.

22Ashtahuangarin cai gentecunaca, tucuicunami imatapash quichui tucushpa, sarui tucushpa causanajun. Utujucunapi japi tucushpa, prezuna utujucunapi pacai tucushcami tianajun. Paicunataca, imatapash quichui tucushca causachunmi churashca. Paicunata cacharichijca, pipash na tianllu. Paicunata quichushpa apashcatapash, pipash na: ‘Tigrachichi’ ninllu” nijurcami.

23Cai tucuitaca canguna purapica, ¿pita uyashpa cazugringuichi? Jipa punlla ima tucunata villajujtaca, ¿maijanda aligutapacha rinrita mañachishpa uyagringuichi?

24Jacobopaj mirai israelcunataca, ¿pita prezu apai tucuchun saquishcanga? ¿Pita shuhuacunapaj maquipi churashcanga? Mandaj Diosta na cazushpa juchata rurashcataca, ¿nachu yaringuichi? Paipaj ñambimi, na puringapaj munanajurca. Pai mandashcatami, na uyanajurca.

25Chaimandami paica, israelcunapaj jahuapica nina japirinshna fiñarishcata, ninan ushaihuan jatun macanajuita talinshna cachamurca. Tucui muyundipimi, ninata japichirca. Shina rurajpipash, napacha yachajurcachu. Nina rupashpa tucuchijujpipash, cazuitallapash na cazunajurcachu.