1Ñuca alicachina Taita Dioslla,
ama upalla capaichu.
2Canda na manllaj runapash, umachij
runapashmi ñucata fiñashpa rimanajurca.
Ñucamandaca, llulla jalluhuanmi parlanajurca.
3Ñucata na ricunayachishpami, nali shimicunahuan
muyundi rimanajurca.
Shinallata yangamandami, ñucahuan macanajunajurca.
4Paicunata ñuca juyashcamandaca,
ñucata fiñajcunami tucunajurca.
Ashtahuangarin ñucaca, candami mañajurcani.
5Paicunaman alita rurashcamandaca, nalitami tigrachihuan.
Paicunata juyashcamandaca, ninandami na ricunayachihuan.
6Paita llaquichijuchunga, canda na
manllaj runata churapai.
Paipaj ali ladopica, Satanás shayajuchun.
7Juezpaj ñaupajpi tapuchijpica,
llaquitaca apanallata llujshichun.
Pai canda mañashcapash, juchallata ricurishca cachun.
8Pai causana punllacunapash, ashalla cachun.
Pai ruranataca, shuj runa japichun.
9Paipaj huahuacunaca, taita mama illaj tucuchun.
Paipaj huarmipash, sapalla tucuchun.
10Paipaj huahuacunaca, maipipash purishpa mañanajuchun.
Llaquinayaita tucuchi tucushca paicunapaj
huasicunamandaca, caruman llujshishpa
micunata mascanajuchun.
11Tucui imata charishcataca, culquita
paiman mañachij runa apachun.
Pai imatalla rurashpa imata charishcacunatapash,
na rijsishcacuna apanajuchun.
12Paita llaquichunga, pitapash ama charichun.
Taita mama illaj tucushca paipaj huahuacunata
llaquijpash, ama tiachun.
13Paipaj jipa miraicunaca, tucurishca cachun.
Cati miraipica, paipaj shutipash
anchuchi tucushca cachun.
14Paipaj taitacuna jatun nalita rurashcataca,
Mandaj Diospash yariajuchunlla.
Paipaj mamapaj juchatapash,
ama anchuchishca cachun.
15Chai juchacunaca, tucui causaipi Mandaj
Diospaj ñaupajpi tiachun.
Cai pachapi paita ama ashtahuan
yarinajuchunga, Diosllata anchuchijuchun.
16Llaquinataca, yaritapash na
yarishcamandami chashna tucunga.
Ashtahuangarin llaquilla causaj, imagupash
illaj runagutami catiriashpa llaquichijurca.
Llaquilla shunguhuan causaj runataca,
huañuchingapajmi catiriajurca.
17Pitapash llaqui japichun munashpallami purirca.
Chai llaquica, paipaj jahuapillatami shamurca.
Bendiciachunga na munarcachu.
Chaimandami bendiciai tucunaca,
paimandapash anchurirca.
18Ninanda nalicachi tucushca canataca,
churajunata churajunshnami churajurca.
Paipaj vijsa ucumambash, yacushnami yaicurca.
Tullucunapipash, aceiteshnami yaicurca.
19Shinallata pai churajushpa quilparinashna cachun.
Chumbipaj randica, tucui causaipi
chaihuan chumbilirinshna causachun.
20Ñucata fiñashpa rimajcunataca, Mandaj
Diosca chashna llaquichijuchun.
Ñucata nalicachishpa rimajcunatapash,
chashnallata llaquichijuchun.
21Ñucata Mandaj Jatun Dioslla.
Canga, cambaj shutita juyaimanda ñucata ayudahuayari.
Cambaj llaquinaca aligumari, cacharichihuayari.
22Ñucaca, llaquilla causaj imagupash illajmari cani.
Ñuca shungupash, chugrishcamari cani.
23Llandu yalijunshnami, ñucaca tucurijuni.
Langosta jurushnami, caiman chaiman apai tucujuni.
24Na micushcamanda, ñuca cunguricunapash chujchujunmari.
Ñuca aichapash, vira illajpimi jamziyashpa tucurijun.
25Ñucaca, paicunapaca nalicachishpa
rimai tucunapajllami carcani.
Ñucata ricushpaca, umata cuyuchishpami
asishpa ricunajurca.
26Ñucata Mandaj Taita Dioslla, ayudahuayari.
Can llaquij cashcashnallata quishpichihuayari.
27Chashna rurajpimi, cambaj maquihuan
rurashcata yachanajunga.
Can Mandaj Diosllata, chashna rurashcatami yachanajunga.
28Paicunaca, llaqui japishpami ali canman
nijpipash, canga bendiciapanguilla.
Llaquichingapaj jatarijcunaca, pingai tucushca cachun.
Ashtahuangarin canda servijca, cushijushca cachun.
29Ñucata yangata juchachijcunaca, ninanda pingai
tucunahuan churajushcashna cachun.
Pandachi tucunahuanga, jahualla churajunahuan
quilpachi tucushcashna cachun.
30Ñucapash, ñuca shimihuanga, Mandaj
Diostami ninandapacha alicachisha.
Ashtaca gentecunapaj chaupipimi alicachisha.
31Paica, imagutapash na charij runapaj
ali ladomanmi shayaringa.
Juchachishpa llaquichij runacunamanda, paipaj
almata quishpichingapajmi shayaringa.
Who We AreWhat We EelieveWhat We Do
2025 by iamachristian.org,Inc All rights reserved.
