DANIEL 10 - Quichua Imbabura Bible

Yacu manñapi cashpami, Danielca muscuipishna ricushca

1Persia shuti llactata jatun mandaj Ciro shuti runaca, ñami quimsa huatata mandajurca. Chai huatapimi, Beltsasar nishca Danielman, cai shimicunata villarca. Chai shimicunaca, na llullachu carca. Llaqui shamunata villaj shimicunami carca. Ashtahuangarin Danielca, chai shimicunataca ali yuyaita charishpami, muscuipishna ricushcataca yachai usharca.

2Chai punllacunapica, Daniel ñucaca, quimsa semanacamanmi llaquilla carcani.

3Quimsa semana yalingacamanmi, ima mishqui micunatapash na micurcani. Ñuca shimipica aichatapash, vinotapash na churarcanichu. Mishquillagu ashnajuj jambihuambash, na javirircanichu.

4Huata callari quilla ishcai chunga chuscu punllapimi ñucaca, Hidekel shuti jatun yacu manñapi shayajurcani.

5Chaipi shayajushpami, ñuca ñavita vichai alsashpa ricushpaca, lino churajunata churajushca runa shayajujta ricurcani. Paica, Ufaz shuti llactamanda orota rurashca chumbihuan chumbilirishcami carca.

6Paipaj cuerpoca, berilo nishca rumishnalla juyaillagumi carca. Paipaj ñavica, punchapamba shitamunshnami carca. Shinallata michunda japichishcashnami ricujurca. Rigrapash, chaquipash llambulla bronceshna punchapambami carca. Pai rimashcapash, ashtaca gentecuna rimashcashnami uyarijurca.

7Chaitaca, Daniel ñucallami muscuipishna ricurcani, ñucahuan shayanajuj runacunapash na ricurcachu. Ashtahuangarin paicunataca, ninan manllai japijpimi, pacajungapaj calpanajurca.

8Chaimandami ñucalla quedashpa, cashna manllarinataca muscuipishna ricurcani. Chaipica, ñuca ushaipash tucurircami. Ñuca ushai tucurijpimi, huañungashna tucushpa, imatapash na rurai usharcani.

9Ashtahuangarin pai rimashca shimicunataca uyarcanimi. Chai shimicunata uyashpaca, uraisinga urmashpami, ñavita alpapi churashpa ninanda puñujurcani.

10Shina puñujujpimi, shuj maqui tacarishpaca cungurichishpa, maquihuan taunarichihuarca.

11Chai jipaca, cashnami nihuarca: “Daniel, canga ninanda juyai tucushca runami cangui. Ñuca rimashca shimicunata, shayarishpa aliguta uyahuai. Cunanga, cambajmanmi ñucata cachamuhuarca” nihuarcami. Shina nijpimi, ñucaca ninanda chujchushpa shayarircani.

12Chaipimi cashna nihuarca: “Daniel, ama manllaichu. Pipash na yachai ushanallacunata yachangapaj munashpa, tucui shunguhuan cambaj Taita Diosta cumurishpa mañai callari punllamandapachami, paica can mañashcacunata uyarca. Can mañashcamanda cachamujpimi, cambajman shamurcani.

13Shina cajpipash Persia llactata mandajmi, ishcai chunga shuj punllacunata jarcahuarca. Chaimandami, angelcunata mandaj puramanda Miguel shuti angelca, ñucata ayudangapaj shamurca. Pai ayudajpimi, Persia llactata jatun mandajcunahuan chaipi quedarcani.

14Ñucaca, tucurimui punllacunapi cambaj llacta purapajman, imalla shamuna cashcata can yachachunmi, villangapaj shamurcani. Muscuipishna can ricushcacunaca, chai punllacunapajmi” nihuarcami.

15Chai shimicunata pai chashna nijujpica, imatapash na rimai ushashpami, alpatalla ricushpa upashna shayajurcani.

16Shina shayajujpica, Runa Aichayuman rijchajmi, ñuca shimipi ñapash tacarirca. Chaimandami, ñuca ñaupajpi shayajujtaca, ñuca shimita pascashpa cashna nircani: “Ñucata mandajlla, muscuipishna ricushcamandami, ninanda llaquirina shamuhuashca. Ushaipash illajmi cani.

17Ñucata mandaj canda servij ñucaca, ¿maitata can ñuca mandajhuanga rimai ushashayari? Can rimajta uyashpaca, samai ñapash tucurijpimi, ushaipash illaj carcani” nircanimi.

18Chai Runa Aichayuman rijchajca, cutin tacarishpami shinllichihuarca.

19Chaipimi cashna nihuarca: “Canga, ninanda juyai tucushcami cangui, ama manllaichu. Casilla ali causai tiachun. Canga, shinlli tucushpa ushaita japilla” nihuarcami. Pai chashna nijpillatami, cutin ushaita japishpa, cashna nircani: “Cunanga, ñami ushaita carahuarcangui, rimahuailla ñucata mandajlla” nircanimi.

20Shina nijpimi paica, cashna nihuarca: “¿Cambajman ñuca imashpa shamushcata yachanguichu? Cunanga, Persia llactata mandajhuan cutin macanajungapajmi tigrana cani. Paita mishashca jipaca, Grecia llactata mandajmi, macanajuj shamunga.

21Ashtahuangarin ñucaca, na llullaj libropi escribishca tiajuj shimicunataca, canmanmi villagrini. Ñucataca, paicunahuan macanajuipica, pipash na ayudangapaj shamunllu. Ashtahuangarin cangunata mandaj Miguelmi ayudajun.