1Mandaj Dioslla, canmi ñuca Taita Dios cangui. Cambaj shutita jatunyachishpami alicachisha. Canga, ninan juyaillagucunatamari rurashcangui. Imata rurangapajpash, punda can nijushcataca na llullashpami, chashnatapacha pactachishcangui.
2Pueblocunataca, rumi mundundallami saquircangui. Jatun pircahuan muyundi jarcashca pueblocunataca, tucuillatami urmachircangui. Shuj llactacunapaj jatun torrecunataca, cutinga ama pipash alichinajuchunmi, tucuillata ñuturcangui.
3Chaimandami ninan shinlli runacunapash, candaca alicachinajunga. Pueblocunapi causanajuj ninan ushaita charij gentecunapashmi, candaca manllanajunga.
4Imagutapash na charijcunapash, imagupash illajcunapash jatun llaquipi cajpica, canmi jatun torreshna pacarcangui. Shinlli huairahuan tamiamandapash, canmi pacarcangui. Indi rupaimandapashmi llandurcangui. Nalicunapaj samaica, shinlli huairahuan tamia shamushpa, patapi huactarinshnami tucun.
5Chaquishca pambapi indi rupachijunshnami, shuj llactacunapi causaj jariyashcacunataca, urai cumuchingui. Shinlli runacunapaj miraitaca, fuyu ucupi rupachinshnami anguyachingui.
6Tucuita Mandaj Diosca, cai urcupimi tucui gentecunaman jatun micuita ruranga. Chaipica, mishqui mishqui micunacunatami caranga. Alipacha vinotapash, racuta fitishca aichatapash, tullu ñutujucunandi, imahuambash na chapushca juyailla vinotapashmi caranga.
7Mandaj Diosca, cai urcupimi tucuicunata jahualla quilpashca tiajujtaca tucuchinga. Tucui llactacunapi causajcunapaj ñavita quilpashca telatapashmi tucuchinga.
8Huañuitapash, causaita causaicamanmi tucuchinga. Mandaj Jatun Diosca, tucuicunapaj ñavimandami viquita fichanga. Pai agllashcacuna, tucui cai pachapi pingaichi tucushpa catinatapashmi anchuchinga. Chaitaca, Mandaj Diosmi chashna villarca.
9Chai punllapica, cashnami ninajunga: “Ricuichi, paimi ñucanchi Taita Dios, paitami shuyarcanchi. Paimi, ñucanchitaca quishpichirca. Pai Mandaj Diostami, ñucanchica shuyashcanchi. Pai quishpichijpimi, ninanda cushijushunchi” ninajungami.
10Cai urcupimi, Mandaj Diosca paipaj maquihuan cuidashpa mandanga. Ashtahuangarin Moab shuti llactapi causajcunataca, mapata shitana pambapi jupata sarunshnami, chai pushtupillata sarunga.
11Chashna rurajujpipash, Moab shuti llactapi causajcunaca, yacupi huambuj runa huambungapaj maquita chutanshnami chutanajunga. Chaipimi, paicuna jariyashpa causashcataca urai cumuchinga. Imatapash ñapash rurai ushajlla paicunapaj maquitapash, imatapash na rurai ushajtami ruranga.
12Shinallata paicunapaj pueblocunapi muyundi jatun shinlli pircacunatapash, tucuillami urmachinga. Paicunataca, alpaman urai cumuchishpami, ñutu alpapi shitanga.
Who We AreWhat We EelieveWhat We Do
2025 by iamachristian.org,Inc All rights reserved.
