1 SAMUEL 24 - Quichua Imbabura Bible

1Filisteocunahuan macanajushpa Saúl tigramujpica, cashna nishpami villanajurca: “Ricui Davidca, En-gadi shuti jichushca pambapimi” ninajurcami.

2Shina nijpimi Saulca, tucui Israel puramandaca, quimsa huaranga agllashca runacunata pushashpa, Davidtapash, paipaj runacunatapash mascangapaj rirca. Paicunaca, sacha chivocuna causaj, jaca rumicuna tiaj jahua urcucunapimi mascagrirca.

3Shina mascajushpami, llamacuna shayaj corral ladoman chayarca. Chai ladopimi, shuj jatun utuju tiarca. Chai utujumanmi Saulca, tiaringapaj yaicurca. Chai utujupillatami Davidpash, paipaj runacunandi ashtahuan ucu juchucunapi pacajushpa tianajurca.

4Chaipimi Davidpaj runacunaca, cashna ninajurca: —‘Ricui, canda fiñajtaca, cambaj maquipimi churasha. Paitaca, can imata yarijushcata ruranguilla’ nishpa, Mandaj Dios villashca punllami chayashca— ninajurcami. Shina nijpimi Davidca, upalla jatarishpa, Saulpaj jahualla churajuna pundata cuchurca.

5Saulpaj jahualla churajuna pundata, chashna cuchushca jipami Davidca, paipaj shungupi ninanda musparirca.

6Chaimandami paipaj runacunataca, cashna nijurca: —Mandaj Dios agllashpa churashca, ñuca amota ñuca maquihuan huañuchinamandaca, Mandaj Diosllata jarcahuachun. Paica, Mandaj Dios agllashpa churashcami— nijurcami.

7Shina rimashpami Davidca, paipaj runacuna Saulta huañuchinajuchunga, na saquirca. Shinallata Saulca, chai utujumanda llujshishpaca rircallami.

8Chai jipallami, Davidpash jatarishpa, chai utujumanda llujshishpaca: —¡Jatun mandaj, ñuca amo!— nishpa, Saulpaj huashamanda caparirca. Shina caparijpi, Saúl tigrarishpa ricujpimi Davidca, paita manllan cajta ricuchingapaj, cungurishpa alpaman chayajta cumurirca.

9Chaipimi Davidca, Saultaca cashna nijurca: —‘Ricui: Davidca, candaca huañuchingapajmi munajun’ nijcunataca, ¿imashpata cazunguiyari?

10Ricui, cai utujupi canda imashna ñuca maquipi, Mandaj Dios churashcatapash, cambaj ñavihuambachami ricungui. Canda huañuchijuchunmi, ñucataca mandanajuhuarca. Shina mandanajujpipash, cashnami nircani: ‘Ñuca amoca, Mandaj Dios agllashpa churashcami. Shina cashcamanda ñuca maquihuanga na huañuchishachu’ nircanimi. Shina nishpami, candaca na huañuchishpa saquircani.

11Ricui, ñuca taitalla. Ricui, cambaj jahualla churajuna pundata cuchushcataca, ñuca maquipimi charijuni. Shina cuchushpapash, candaca na huañuchircanichu. Cunanga, na canda huañuchingapaj mascashpa purijushcatapash, shinallata canda na umachishpa, na fiñashpa ima juchata na rurashcatapash yachanguimi. Ashtahuangarin canmari ñucataca, huañuchisha nishpa mascashpa purijungui.

12Candapash, ñucatapash Mandaj Diosllata ricuchun. Ñucata can llaquichishcamandaca, Mandaj Diosllata candapash llaquichishca cachun. Ashtahuangarin ñuca maquihuanga, na candaca llaquichishachu.

13Ñaupa taitacunapaj yarichij shimicunapica: ‘Diosta na manllajcunami, ima nalitapash ruran’ nijunmi. Ashtahuangarin ñuca maquihuanga, candaca na llaquichishachu.

14Israelcunata jatun mandajca, ¿pitata catishpa llujshimushca? ¿Pitata catiriajungui? ¿Huañushca alcuta, na cashpaca shuj piquitachu catiriajungui?

15Mandaj Diosllata ricuchun. Paillata candapash, ñucatapash ricuchun. Imata rurashcatapash, paillata ali ricushpa ñucata mitsashpa, cambaj maquimanda quishpichihuachun— nijurcami.

16Chaipica cashnami tucurca: Chai shimicunata Saulman David chashna nishpa tucuchijhuanmi, Saulpash cashna nirca: —¿Nachu ñuca huahua Davidllata, cashna nijuhuangui?— nishpami Saulca, ninandapacha caparishpa huacarca.

17Shina huacashpami Davidtaca, cashna nijurca: —Canga, ñucatapash yali imatapash cashcatapacha rurajmari cangui. Canda nalita rurashpa, ñuca llaquichijujpipash, canga ñucahuanga alitallami rurashcangui.

18Cunambashmi, canga ñucahuan alita rurashcata ricuchihuashcangui. Mandaj Diosca, cambaj maquipi ñucata churajpipash, na huañuchishpami saquihuashcangui.

19¿Maijan runashi paita fiñajhuan tuparishpaca, na chugrichishpa na huañuchishpa saquinman? Cunan punlla ñucata na huañuchishcamandaca, Mandaj Diosllata canman imatapash aliguta cupachun.

20Shinallata cunanga, can mandaj tucunatapash alimi yachani. Cambaj maquipimi, israelcunata mandanaca, pipash na cuyuchi ushanalla, shinllipacha tucunga.

21Cunanga, ñuca huañushca jipapash, ñuca miraicunataca na tucuchishachu. Ñuca taitapaj familiacunatapash, na chingachishachu nishpa, Mandaj Diospaj shutipi juramentuhuai— nijurcami.

22Shina nijpimi Davidca, Saulman juramenturca. Chai jipaca Saulca, paipaj huasiman rircallami. Shinallata Davidpash, paipaj runacunandimi, pacajungapaj pircashca huashaman vichai rinajurca. Davidmanda, Abigail shuti huarmimandami villajun