1Caihuanga ishcai viajetami Mandaj Diosca, cai shimicunata cashna nishpa Jonasman villarca:
2“Jatari, chai jatun Nínive shuti pueblopi causajcunapajman ri. Ñuca imatalla villai nishcata villagri” nircami.
3Shina nijpimi, Jonasca jatarishpa, Mandaj Dios mandashcashnallata, Nínive pueblopi causajcunaman villagrirca. Nínive puebloca, quimsa punllata purinashna ninambacha jatun pueblomi carca.
4Jonasca, ña chai puebloman yaicushpa, shuj punllata purijushpami, cashna nishpa villajurca: “Cunanmanda chuscu chunga punllacamanga, cai Nínive puebloca tucuringami” nijurcami.
5Chashna villajta uyashpami, Nínive pueblopi causajcunaca, Taita Diosta crinajurca. Paicuna purapica, rucumanda callarishpa uchillacunacamanmi, cañamuta churajushpa, na micunachu nishpa villanajurca.
6Nínive pueblota jatun mandajpash, chashna villashcata yachashpami, pai mandashpa tiajunamanda jatarishpa, paipaj churajunata llujchirca. Paipash cañamuta churajushpami, uchufapi tiarirca.
7Jatun mandajca, pai churashca mandajcunandimi, Nínive pueblopi causajcunaman cashna villachun mandarca: “Maijanllapash na micunachu canguichi. Huagracunaman, llamacunaman, ima shuj animalcunamambash, imatallapash na caranachu canguichi. Yacutallapash, na ufiachinachu canguichi.
8Ashtahuangarin gentecunapash, animalcunapash cañamuta churajushpa, Taita Diosta ninanda caparishpa mañaichi. Ima nalicunata rurashpa, macashpa shuhuajcuna cashpapash, tucuicuna saquichi.
9Taita Diosca, nina japirinshna ninanda fiñarishca cashpapash, chai fiñarishcamanda pai llaquirishpa, ninanda fiñarishcata pai yalichinatapash, ¿pita yachanguichi? Fiñarishcata pai yalichijpica, napash huañuringachu” nichunmi mandarca.
10Nalita rurashpa causanajushcata saquishpa Diospajman tigrarishcatami, Taita Diosca ricurca. Chaimandami, llaquichishami nishca cashpapash llaquirishpa, na llaquichishpa saquirca.
Who We AreWhat We EelieveWhat We Do
2025 by iamachristian.org,Inc All rights reserved.
