1Shamuichi, Mandaj Diospajman tigrashunchi. Paimi ñucanchitaca, ñutunshna tucuchirca. Paillatami jambinga. Pai chugrichishcataca, paillatami huatachishpa jambinga.
2Ishcai punlla jipaca, ñucanchiman causaita cungami. Quimsa punlla jipaca causachijpimi, paipaj ñaupajpi causashun.
3Chaipica, Mandaj Diostaca ashtahuanmi rijsishpa catishun. Paica, tutamanda ña punchalla shitagrijunshna, jipa tamia, punda tamia alpapi urmanshnami, ñucanchipajman shamunga.
4“Efraín aillu gentecunalla, Judá llactapi causajcunalla, ¿cangunataca imatata rurashayari? Canguna juyanaca, tutamanda fuyushna, tutamanda jamzi paramushna chinganllamari.
5Chaimandami, ñuca ima nishcata villajcunahuan villachishpa, paicunataca chingachircani. Ñuca shimihuan rimashpami huañuchircani. Cangunata llaquichinacunaca, micha punchapamba shitanshnami canga.
6Animalta ñucaman cushpa huañuchingapaj randica, shujcunata llaquij cachunmi munani. Animalta ñucaman cushpa tucuillata rupachinamanda yalica, Taita Dios ñucata rijsichunmi ashtahuan munani.
7Ashtahuangarin paicunaca, Adanshnallatami ari ninajushcatapash, na cazunajurca. Chaipimi, paicunaca yachashpata na cazunajurca.
8Galaad pueblopica, nalita rurajcunalla causanajushpami, yahuarhuan mapayashca.
9Shuhuajcuna shuj runata chapashpa shuhuanshnami curacunapash tandanajushpa, Siquem shuti puebloman rina ñambi chapashpa huañuchinajun. Chashnami, millanayaicunata ruranajurca.
10Israelcunapica, jatun mapatami ricushcani. Chaipimi, Efraín ailluca huainayarca. Israelcunapashmi mapayanajurca.
11Judá llactapi causajcunalla, ñuca agllashcacuna prezu tiajushcamanda tigrachimui punllacunami, cangunapajpash cozechanshna llaquichingapaj alichishcalla tiajun.
Who We AreWhat We EelieveWhat We Do
2025 by iamachristian.org,Inc All rights reserved.
