PROVERBIOS 22 - Quichua Imbabura Bible

1Alicachi tucunaca, ninan charij

canatapash ashtahuan yali alimari.

Tucuicuna rijsishca canaca, culquitapash,

orotapash ashtahuan yali alimari.

2Charij runapash, imaguta na charij runapashmi tuparinajun.

Shina cajpipash ishcanditallatami, Mandaj Dios rurashca.

3Ali yuyaita charij runaca, ima

llaqui japinata ricushpaca pacajunmi.

Ashtahuangarin na yachajushca runacunaca,

yangata rishpa llaquichi tucunllami.

4Mandaj Diosta manllashpa, na jariyashpa

causashcamandaca, charijyanatapash,

alicachi tucunatapash, causaitapashmi japinajun.

5Jatun nalita ruraj runapaj ñambica

cashacunapash, lazucunapashmi tian.

Paipaj almata huacaichijca,

chai ñangunamanda anchuringami.

6Huahuataca, ali causaita yachachingui.

Shina yachachijpica rucuyashpapash, napacha cungangachu.

7Charij runami, imagutapash na charijcunata mandajun.

Culquita mañashpa japij runapash,

culquita mañachij runapaj servijmi tucun.

8Ima nalitapash tarpunshna nalita ruraj

runaca, nalitallatami tandachinga.

Yapata jariyashpa, mandajushca vara

caspipash faquiringami.

9Llaquishpa imagutapash caraj runaca, bendiciai tucungami.

Imagutapash na charijcunaman micunata

carashcamandami, chashna canga.

10Na cazushpa asij runata llujchishpa cachajpica,

fiñanajushpa rimarinapash illangami.

Fiñanajushpa rimarinapash, pingai tucunapash tucuringami.

11Shungupi mapa illaj canata ninanda munaj runaca,

paipaj shimihuan juyaillaguta parlashcamandami,

jatun mandajpaj ali cumba tucunga.

12Mandaj Diosca, ali yachaita charijcunatami cuidariajun.

Ashtahuangarin yachashpata na cazujcuna imata

ruranajujpipash, paica pandachishpami tucuchin.

13Imata ruranatapash na munaj runaca:

“Leonmari canllapi, chapajun, ñambi

huañuchi tucushamari” nijunmi.

14Na rijsishca huarmi rimashca shimicunaca,

ucu ucuta allashca utujushnami.

Mandaj Dios fiñashca runaca, chaipimi urmanga.

15Chairalla viñai huambrapaj shungupica,

shinlli shungu canaca huatarishcashnami.

Ashtahuangarin jamzi varahuan astishpa yachachijpica,

chai yuyaicunaca anchuringami.

16Ashtahuan charijyangapaj, imagutapash na charij

runata llaquichishpa charishpapash, na cashpaca

charijman carashpapash, imatapash na charijmi tucunga.

Imatalla rurachun nishpami, shinllita tacurishca

17Alipacha yachajushcacuna yachachishca

shimicunataca, rinrira mañachishpa uyangui.

Ñuca cushca ali yachaitapash, tucui shunguhuan pactachingui.

18Cai shimicunata cambaj shungupi alichijpica, mishquillagumi canga.

Chashnami cambaj shimipipash, shinllitapacha charingui.

19Cai shimicunataca, Mandaj Diosta yariashpa

causachunmi, cunanga canmambash yachachijurcani.

20Ali yuyaita cushpapash, aliguta yachajuchumbash,

¿nachu quimsacaman escribircani?

21Cai na llullaj shimicunataca, chashnapacha cajta

can yachashpa, na llullaj shimitaca, canda

cachamujcunaman apashpa cutin tigrachunmi escribircani.

22Imagutapash na charij runataca, imagutapash na charishcamanda,

ama imagutapash shuhuanguichu.

Llaquita apaj runatapash, pueblo pungupi

mandajcunaman cushpa, ama llaquichinguichu.

23Mandaj Diosmi, paicunamandaca shayaringa.

Paicunata quichujcunataca, paillatami causaita quichunga.

24Ñapash fiñarijlla runahuanga, ama tandanajunguichu.

Fiñarijlla runahuanga, ama cumba tucunguichu.

25Pactarallapash paicunashna yachajushpara,

cambaj almapajllata lazuta churarinshna tucunguiman.

26Ari nirinajushpa maqui japirinajuj gentecunashnaca,

ama canguichu.

Paicunapaj umapi culquita llujchishpa, shujcunaman

mañachishpa divi tucuj gentecunashnapash, ama canguichu.

27Culquita na tigrachi ushajpica,

¿imashpata can puñujuj cambaj camatara quichungayari?

28Cambaj alpacunapi cambaj ñaupa taitacuna

churashca mujungunataca, ama suchuchinguichu.

29¿Imata ruranatapash ali yachaj runata ricushcanguichu?

Paica, jatun mandajcunapaj ñaupajpimi servijunga.

Yanga runacunataca, na servijungachu.