DANIEL 11 - Quichua Imbabura Bible

1Media shuti llactamanda Darío shuti runa mandai callarijui huatapipash, ñucallatami paitaca aliguta yarichishpa shinllichijurcani.

Jahua lado llactata, urai lado llactata jatun mandajcunamandami villajun

2Cunanga, chashnapacha tucunatami canman villagrini: Ricui, cai Persia llactapica, quimsa jatun mandajcuna mandangarami. Chai quimsapaj cati jatun mandajca, paicunatapash yali ninan charijmi tucunga. Paica, ninan charij tucushcamanda shinllipacha cashpami, Grecia shuti llactata jatun mandajhuan macanajungapaj, tucuicunata jatarichinga.

3Chai jipaca, shuj ninan shinlli jatun mandajmi, Grecia llactata mandangapaj jataringa. Paica, ninan ushaihuan mandashpami, pai munashcata rurajunga.

4Ashtahuangarin llactata mandai callarijujpillatami, tucuchi tucunga. Chai mandanataca, cai pacha chuscundi ladomanmi chaupinga. Na paipaj miraicunaman chaupingachu. Chai chaupirijcunapash, pai mandajushcashnaca na mandai ushangachu. Pai mandajushcataca tucuchishpami, shujcunaman cunga.

5Shina rurajpimi, urai lado llactata jatun mandajca, ninan shinlli tucunga. Ashtahuangarin pai churashca mandaj puramandaca shujmi, paitapash yali ninan shinlli tucushpa, ninan ushaita charij tucunga. Pai mandanaca, jatumbachami canga.

6Ña tauca huata jipami, casilla ali causangapaj nishpa ari ninajunga. Urai lado llactata jatun mandajpaj ushica, casilla ali causai tiachun parlangapajmi, jahua lado llactata jatun mandajpajman shamunga. Ashtahuangarin chai huarmipaj ushaihuanga, na unaicaman mandai ushangachu. Urai lado llactata mandajpash, na unaicaman ushaita charingachu. Chai huatacunapica, chai huarmipash, paita pushashpa shamujcunapash, paipaj churicunapash, paita ayudaj gentecunapash, shujcunapaj maquipi churai tucushcamandami, na mandai ushanga.

7Shina cajpipash chai huarmipaj huahuacunapaj miraimi, pai mandangapaj tiarinapi tiaringa. Paimi, jahua lado llactata jatun mandajhuan macanajungapaj, paipaj soldadocunahuan shamunga. Chai jipaca, shinlli torre ucuman yaicushpami, pai munashcata llaquichishpa mishanga.

8Chaipi tiaj dioscunatapash, yacuyachishpa rurashca imamambash rijchaj dioscunatapash, shinallata culquita, orota rurashca juyailla charishcacunatapashmi llujchishpa, Egiptoman apanga. Shina rurashpaca unai huatacunatami, jahua lado llactata jatun mandajhuanga, macanajushpa causanga.

9Shinami urai lado llactata jatun mandajca, chai llactaman yaicushpa, paipaj llactamanllata cutin tigranga.

10Ashtahuangarin jahua lado llactata jatun mandajpaj churicunaca, ninanda fiñarishpami, ashtaca ashtaca soldadocunata tandachinajunga. Chai soldadocunahuan ucha shamushpami, yacu jundamunshna macanajushpa ñapash ñaupajman yalinga. Chai jipa cutin tigramushpa macanajushpami, shinlli torre ucuman yaicunga.

11Shinamandami, urai lado llactata jatun mandajca, ninanda fiñarishpa, jahua lado llactata jatun mandajhuan macanajungapaj llujshinga. Ashtaca ashtaca soldadocunata tandachishpami llujshinga. Shina llujshishpami, chai tucui soldadocunandi, urai lado llactata jatun mandajpaj maquipi churai tucunga.

12Ashtaca soldadocunahuan rishpami, paipaj shungupica ninanda jariyashpa, ashtaca huaranga huarangacunata huañuchijunga. Chashna cashpapash, na unaicaman mandangachu.

13Ashtahuangarin jahua lado llactata jatun mandajca, cutin macanajungapajmi pundatapash yali ashtaca soldadocunata tandachinga. Tauca huatacuna jipami, ashtaca soldadocunahuan, ashtaca charishcacunahuan ucha tigramunga.

14Chai huatacunapica, ashtaca llactacunami urai lado llactata jatun mandajta jariyanajunga. Cambaj llacta puramandapash yapa jariyaj runacunami, muscuipishna Dios ricuchishcata pactachishun nishpa jatarinajunga. Ashtahuangarin paicunapashmi huañunga.

15Jahua lado llactata jatun mandaj urai shamushpami, baluarte nishcacunata shayachishpa macanajushpa, muyundi shinlli pircahuan pueblotaca mishanga. Urai lado llacta soldadocunaca, na chimbapura macanajui ushangachu. Agllashca, ashtahuan ali soldadocunapash ushaita na charishcamanda, na macanajui ushangachu.

16Paicunahuan macanajungapaj shamuj jatun mandajca, pai munashcatami llaquichinga. Paihuan chimbapura macanajuitaca, pipash na ushangachu. Paica, juyailla llactapi cashpami, tucui imatapash paipaj ninan ushaihuan tucuchinga.

17Chai jipaca, pai mandajushca tucui ushaihuanmi, urai lado tucui llactata japingapaj alipacha alichiringa. Chai jatun mandajhuan ama macanajungapajmi, ari ninajunga. Paita huañuchingapajmi, paipaj ushita chai jatun mandajpaj huarmi cachun cunga. Ashtahuangarin pai imata yarijushcapash, na unaicaman cangachu, imapash na ali llujshingachu.

18Chai jipaca, mama cucha manñacunapi tiaj tauca llactacunatami mishashpa japinga. Ashtahuangarin shuj mandajmi, pai llaquichijujtaca saquichinga. Pai nalicachishpa rimajushcataca, paimanllatami tigrachinga.

19Chai jipami paica, paipaj llactapi tiaj shinlli torrecunaman tigranga. Chaipi cashpapash, huañuchi tucushpami, cutinga na ricuringa.

20Paipaj randica, shuj mandajmi jataringa. Chai mandajca, pai mandana llactata juyaillata rurangapajmi, impuestota japishpa purichun churanga. Chai mandajca, na pipash fiñashpa, jatun macanajuita rurashpa na huañuchijpipash, narapash unayajpillatami huañuchi tucunga.

21Paipaj randica, yangapi churai tucushca runami mandangapaj tiaringa. Pai mandana llactataca, pipash na alicachingachu. Ashtahuangarin juyailla shimicunata rimashpa, cungashcapi shamushpami mandana llactataca japinga.

22Paita fiñaj soldadocunaca, yacu jundamushpa urai apajpishnami, paipaj ñaupajpillata tucuringa. Paihuan ari ninajushca mandajhuanmi, tucuilla tucuchi tucunga.

23Paihuan ari ninajushca jipami umachinga. Shina umachishpami, huaquinlla soldadocunahuan cashpapash, vichai rishpa mishanga.

24Chai llactapica, ninanda charijyashpa casilla aliguta causanajujpi yaicushpami, paipaj taitacunapash, chai taitacunapaj taitacunapash na rurashcata rurashpa llaquichinga. Ima charishcacunatapash, juyailla charishcacunatapash quichushpami, paipaj soldadocunaman chaupinga. Shinlli torrecunapi macanajuj shamunatapashmi yarijunga. Ashtahuangarin huaquin punllacunacamanllami, chashna ruranga.

25Nina japirinshna fiñarishpami, paipaj ushaita charishcata ricuchingapaca, urai lado llactata jatun mandajhuan macanajungapaj ashtaca soldadocunahuan ringa. Urai lado llactata jatun mandajpash, ninan shinlli, ashtaca soldadocunahuanmi macanajungapaj shayaringa. Ashtahuangarin paitaca, paipaj soldadocunallata umachijpimi, na mishai ushanga.

26Paipaj micunatallata micujcunapash, paitaca llaquichingallami. Paipaj soldadocunapash, tucuchi tucunajungami. Shina llaquichijpimi, ashtacacuna huañushpa urmanajunga.

27Chai ishcai jatun mandajcunapaj yuyaipica, nalita rurana yuyaillami canga. Shinamandami chimbapura mezapi micunajushpapash, llullashpalla parlanajunga. Ashtahuangarin punlla nara pactashcamandami, chai parlashcacunaca yangalla canga.

28Jahua lado llactata jatun mandajca, ashtaca charishcacunata apashpami, paipaj llactaman tigranga. Paipaj shungupica, jucha illaj Dioshuan ari ninajushcata fiñashpami saquichinata yaringa. Pai munashcata llaquichishpami, paipaj llactaman tigranga.

29Ña tigrana punlla chayajpimi, urai lado llactaman tigranga. Ashtahuangarin jipaman shamushpaca, na pundashna mishai ushangachu.

30Paihuan macanajungapaca, Quitim shuti llactamandami jatun barcocunapi shamunga. Paicuna mishajpimi, llaquirishpa tigranga. Jucha illaj Dioshuan ari ninajushcata fiñashpa saquichina yuyaihuambachami tigranga. Shinamandami, pai munashcashna llaquichinga. Cutin tigrashpaca, jucha illaj Dioshuan ari ninajushcata saquijcunahuanmi, shujlla yuyai tucunga.

31Diospaj huasitapash, shinlli torretapash yangapi churaj, paipaj lado soldadocunami jataringa. Diosman cushpa punllandi rupachinatapashmi anchuchinga. Chaipica, yapa millanayachishpa llaquinayaita tucuchijtami churanga.

32Dioshuan ari ninajushcata na cazujcunataca, uyanayaita llullashpa parlajushpallatami crichinga. Ashtahuangarin paicunapaj Taita Diosta rijsij gentecunaca, shinlli tucushpami, imatapash alita ruranajunga.

33Chai gente puramandallata alipacha yachajushcacunaca, ashtaca gentecunatami yachachinajunga. Paicunaca, tauca punllacunatami espadahuan huañuchijpi, rupachijpi, prezu apajpi, imatapash quichushpa llaquichijpi causanajunga.

34Chai llaquipi urmajpica, ashaguta ayudanajungami. Chaipica ashtacacunami, uyanayaita llullashpa parlangapaj paicunahuan tandanajunga.

35Shinallata alipacha yachajushca puramanda huaquingunaca, ninandami llaquichi tucunajunga. Paicunaca, Dios agllashca punllacuna tucuringacamanmi, mapa illaj cachun tucui mapata anchuchishpa, yurajyachishcashna canga. Chaicunata rurangapajpash, punllacuna tiangarami.

36Chai jatun mandajca, pai munashcata rurashpami jariyashpa, tucui dioscunatapash yali jatun tucunga. Tucui dioscunapaj Taita Diostapash, jatun nali shimicunahuanmi rimajunga. Dios fiñarishpa llaquichina punlla pactangacamanmi, tucui imapipash paipaca ali llujshinga. Paita imashna llaquichina cajpipash, pactangami.

37Paipaj taitacunapaj Taita Diostaca na cazungachu, huarmicunapaj juyaitapash na munangachu. Maijan diostapash na manllangachu. Tucui imatapash yalimi jatun tucunga.

38Ashtahuangarin Taita Diospaj randica, macanajuicunapi shinllichij nishca diostarami alicachinga. Paipaj taitacunapash na rijsishca diostami alicachinga. Chaitami, paica orota, culquita, juyailla rumicunata, ashtaca valishca charishcacunata cushpa alicachinga.

39Shuj diosta mañashpami, pipash na urmachi ushanalla, shinlli torrecunapi macanajushpa mishanga. Paita alicachijcunataca, ashtaca alicunata carashpami charinga. Alpacunatapash chaupishpami, culquipaj jatujunga.

40Ashtahuangarin tucurimui huatacunapica, urai lado llactata jatun mandajmi, paihuan macanajugringa. Shinallata jahua lado llactata jatun mandajpash, carretacunahuan, caballocunapi tiarishca soldadocunahuan, ashtaca barcocunahuanmi, macanajungapaj ninan huairahuan tamiashna jataringa. Shina jatarishpami, yacu jundashpa yalinshna, llactacunaman yaicushpa tucuchinga.

41Juyailla llactamambashmi yaicunga. Chaipimi, tauca llactacuna llaquichi tucunajunga. Ashtahuangarin cai llactacunallami, paipaj maquimandaca quishpiringa. Edom shuti, Moab shuti llactacuna, shinallata Amón shuti llactapi causajcunallami, ashtacapacha quishpiringa.

42Paipaj maquita chutashpa, shuj llactacunatapash llaquichishpa catijpimi, Egipto llactapash na quishpiringa.

43Egiptomandaca, alichishca tiajuj orota, culquita, ima juyailla charishcacunatapashmi apanga. Libia shuti, Etiopía shuti llactacunaca, paitami catinajunga.

44Ashtahuangarin indi llujshimuj lado llactamandapash, jahua lado llactamandapash, macanajungapaj shamushcami nishpa villajpimi, ninanda manllarinajunga. Chaimandami, ninanda fiñarishpa tucuchingapaj rishpaca, ashtacacunata huañuchinga.

45Pai mandashpa tiajuna carpacunataca, mama cuchacunahuan, Diospajlla juyailla urcuhuan chaupipimi shayachinga. Ashtahuangarin paipaj tucurimui chayamujpica, maijan ayudajtapash na charingachu.