JEREMÍAS 26 - Quichua Imbabura Bible

Jeremiastaca huañuchingapajmi munashca

1Josías shuti runapaj churi jatun mandaj Joacim shuti runa, Judá llactata mandai callari huatapimi Mandaj Diosca, cai shimicunata Jeremiasman cashna nishpa villajurca:

2“Mandaj Dios ñucami, cashna nini: Judá llactapi tiaj tucui pueblocunamandami, Mandaj Dios ñuca huasipi ninanda alicachingapaj shamunajun. Paicunaman ñuca imatalla villagri nishcata, Mandaj Dios ñuca huasi patiopi shayarishpa, tucuita villai. Shuj shimitallapash ama saquishpa, tucuita villangui.

3Can villashcata cazushpaca, tucuicuna paicunapaj nali causaita saquingapashchari. Paicuna uyajpica, paicuna nalita rurashcamanda imashna llaquichingapaj munajushcamandaca, ñucapash llaquirishpami jarcarisha.

4Shina cashcamanda, cashna villangui: Mandaj Diosca, cashnami nin: ‘Ñuca rimashcata uyaichi. Ñuca mandashcataca, cangunapaj ñaupajpimi churarcani. Chai mandashcatami cazuna canguichi.

5Ñaupa huatamandapachami, ñuca ima nishcata villaj, ñucata servijcunataca, na shaijushpa cangunaman villachun cachamurcani. Paicuna villajpipash, na uyanayachishpami causarcanguichi.

6Chashnalla catinajujpica, imashnami Silo shuti pueblota tucuchircani, chashnallatami cai huasitapash rurasha. Cai pachapi tiaj tucui llactacunapi causajcunaca, cai pueblotaca ima llaquipash japishpachari ali canman ninajuchunmi churasha’ ninmi” nijurcami.

7Mandaj Diospaj huasipi, Jeremías cai shimicunata villajujtaca, curacunapash, villajcunapash, tucui gentecunapashmi uyanajurca.

8Tucui gentecunaman villachun, Mandaj Dios mandashcatami, Jeremiasca villai tucuchirca. Chaita villajpimi curacunapash, villajcunapash, tucui gentecunapash, Jeremiasta japishpa cashna ninajurca: “Huañunapachami cangui.

9¿Imamandata canga: ‘Cai huasica, Silo shuti pueblopi tiashca huasishnami tucunga. Cai pueblopash, llaquinayaitami tucuchi tucunga. Shujllapash causajca, na puchungachu’ nishpa, Mandaj Diospaj shutipi villangui?” ninajurcami. Shina ninajushpami, Jeremiasta llaquichingapaca, tucuicuna Mandaj Diospaj huasipi tandanajurca.

10Judá llactata mandajcuna chaita uyashpami, jatun mandaj mandashpa tiajuna huasimandaca, Mandaj Diospaj huasiman vichai rinajurca. Shina vichai rishpaca, Mandaj Diospaj huasiman yaicuna mushuj pungu ladopimi tiarinajurca.

11Chaipi tianajujpimi curacunahuan, villajcunahuanga, chai mandajcunatapash, chai tucui gentecunatapash cashna ninajurca: “Cai runaca, huañuchi tucunapachami. Paica, cai pueblota fiñashpami, cai puebloca llaquichi tucungami nishpa villajun. Cangunallata cangunapaj rinrihuambachami uyarcanguichi” ninajurcami.

12Shina ninajujpimi Jeremiasca, tucui mandajcunatapash, tucui gentecunatapash, cashna nijurca: “Mandaj Diosmi, cai huasitapash, cai pueblotapash fiñashpa chashna villachun cachamuhuarca. Canguna uyanajushca shimicunaca, pai villachun cachamushca shimicunami carca.

13Shina cashcamanda cunanga, nalita rurashpa causanajushcamanda alichirishpa, cangunata Mandaj Taita Dios rimashcata cazuichi. Shina rurajpimi Mandaj Diosca, cangunata llaquichingapaj munashpa villajushcamandaca, llaquirishpa jarcaringa.

14Ricuichi, ñucamanda parlashpaca ñucaca, cangunapaj maquipimi cani. Ñucataca, cangunapi ima ashtahuan ali cajpipash, chaita rurahuaichilla.

15Ashtahuangarin cangunaca, caitami yachana canguichi. Ima nalitapash na ruraj ñucata huañuchijpica, ñuca yahuarca cangunapaj, cai pueblopaj, cai pueblopi causajcunapaj jahuallatami canga. Ñucataca, Mandaj Diospachami chai tucui shimicunata, na llullashpa canguna uyajta villachun cachamuhuarca” nijurcami.

16Shina nijpimi mandajcunapash, tucui gentecunapash, curacunata, villajcunataca cashna ninajurca: “Cai runaca, ñucanchita Mandaj Taita Diospaj shutipimi villashca. Shinamanda, imamanda huañuchi tucunatapash na charinllu” ninajurcami.

17Paicuna shina nijpimi, Judá llactapi mandaj rucucunamanda huaquinguna jatarishpa, chaipi tucui tandanajushca gentecunataca, cashna ninajurca:

18“Judá llactata jatun mandaj Ezequías mandajui huatacunapica, Moreset shuti pueblomanda Miqueas shuti villaj runagumi, Judá llactapi tucui causajcunaman, Dios villashcata villajurca: Tucuita Mandaj Diosca, cashnami nin: ‘Sion shuti urcuca, tarpuna alpashnami yapui tucunga. Jerusalén pueblopash, rumi mundungunallami tucunga. Ñuca huasi shayajuj lomapash, sachayashca urcushnallami tucunga’ ninmi nijurcami.

19Shina villajpipash Miqueastaca, ¿Judá llactata mandaj Ezequías shuti runapash, Judá llactapi tucui causajcunapash huañuchircachu? ¿Nachu Mandaj Diosta manllashpa, Mandaj Diospaj ñaupajpi mañarca? Shina mañajpica, ¿nachu Mandaj Diosca, paicunata llaquichingapaj munajushcamanda llaquirishpa jarcarirca? Shina cashpaca, ¿imamandata cai runata huañuchishpa, ñucanchillata jatun llaquipi yaicushun?” ninajurcami.

20Quiriat-jearim shuti pueblomanda Urías shuti shuj runapashmi, Mandaj Diospaj shutipi villan carca. Paica, Semaías shuti runapaj churimi carca. Paica cai pueblopash, cai llactapash llaquichi tucunataca, Jeremías villashcashnallatami villajurca.

21Jatun mandaj Joacim shuti runapash, pai churashca mandajcunapash, tucui caishuj mandajcunapashmi, pai villashcataca uyanajurca. Shinamandami jatun mandajca, Urías shuti runata huañuchingapaj munajurca. Chaita Urías runa yachashpami manllashpa, pacajushpa Egiptoman rirca.

22Chaimandami jatun mandaj Joacim shuti runaca, Acbor shuti runapaj churi Elnatán shuti runataca, shuj runacunandi Egiptoman cacharca.

23Paicunaca, Urías shuti runata Egiptomanda llujchimushpami, jatun mandaj Joacim shuti runapajman pushamurca. Paitaca, espadahuan huañuchishpami, imagutapash na charijcuna huañujpi pambana utujupi shitarca.

24Ashtahuangarin Safán shuti runapaj churi Ahicam shuti mandajca, Jeremiasta ama huañuchinajuchunmi, chaipi tandanajushcacunapaj maquipi churachun na saquirca.