JOB 9 - Quichua Imbabura Bible

Job runaguca, Taita Diostaca imatallapash na tigrachi ushashcachu

1Job runaguca, cashna nishpami tigrachirca:

2“Chashna canataca, ñucaca yachanipachami. ¿Imashnata runaca, Taita Diospaj ñaupajpica, imatapash cashcatapacha rurashca ricuringayari?

3Paihuan chimbapura rimangapaj munashpapash, huaranga shimicunamandaca shujllatapash na tigrachi ushangachu.

4Paipaj shungupica, alipacha yachajushcami. Paica, ninan ushaitami charin. Maijambash paita na cazushpa shayarij runaca, ¿tucuipi ali causashcachu?

5Paica ninandapacha fiñarishpami, urcucunatapash tugyachin. Shina llaquichijtaca, pipash na yachanllu.

6Paimi alpatapash, maipi tiajushcamandaca cuyuchin. Alpata vichai charijuj pilarcunatapashmi chujchuchin.

7Indi ama llujshichun pai mandajpica, na llujshinllu. Luzerocunatapash sellashcashnami saquin.

8Paillami, jahua pachataca, telata chutanshna churarca. Paica, caiman chaiman cuyujuj, mama cucha jahuatami purin.

9Osa, Orión, Pléyades shuti luzerocunatapash, paimi rurarca. Shinallata urai ladomambash, pipash na yachai ushanalla pushtucunatami rurarca.

10Paica, pipash na yachai ushanalla manllarinacunatami ruran. Maitapash na cuentai ushanalla juyaillacunatami ruran.

11Ricui, ñuca ñaupajta pai yalijujpipash, paitaca napacha ricushachu. Pai yalijujtapash, napacha yachai ushashachu.

12Pai imata quichujpipash, ¿pita cutin tigrachi ni ushangayari? ¿Pita: ‘Imata rurajungui’ ningayari?

13Taita Diosca, ninanda pai fiñarishcataca na saquingachu. Jariyashpa jatun tucuj runacunata ayudajcunaca, paipaj chaqui ucupimi, ñavita urai cumuchi tucunajun.

14¿Ñucacarin, imatata tigrachishpa rimashayari? ¿Paihuanga, agllashca shimicunatachu rimasha?

15Ñucaca, imatapash cashcatapacha ruraj cashpapash, na imata tigrachi ushaimanllu. Ashtahuangarin ñuca Jueztaca, llaquihuayari nijuimanllami.

16Ñuca mañajujta uyashpa pai tigrachijpipash, ñuca mañajujta uyashcataca, nara crimanllu.

17Paica, ninan huairahuan tamiashnami llaquichihuarca. Yangamandami ñuca chugricunataca, ashtahuan mirachirca.

18Paica, ñucataca samaita aisachumbash, na saquihuarcachu. Ashtahuangarin jatun llaquicunatallami jundachihuarca.

19Paipaj ninan ushaita charijta parlajpica, tucuita rurai ushambachami. Imata rurashcata ricujpica, ¿pita ñucapaj randica, shayari ushangayari?

20Ñucaca, imatapash cashcatapacha rurajmi cani nijujpica, ñuca shimillatami llaquipi churaiman. Ñucaca, ima pandatapash na ruranichu nijushpaca, nalita ruraj runami caiman.

21Ñucaca, ima nalitapash na ruraj cashpaca, ñucallatami na cazuriman. Ñuca causaitapashmi, yangapi churaiman.

22Ñucaca, caitallami ningapaj munani: ‘Paica, ima pandata na ruraj runatapash, paita na manllaj runatapash tucuchinllami’ ningapajmi munani.

23Astishpaca, ñapash huañuchinllami. Ima nalitapash na ruraj runa llaquihuan cajpipash, asinllami.

24Cai pachaca, Diosta na manllajcunapaj maquipimi churai tucushca. Paica, paipaj juezcunapaj ñavitapash quilpanllami. Na pai cajpica, ¿pita canga? ¿Maipita canga?

25Ñuca causana punllacunaca, cartacunata apaj runatapash yali uchamari calpashca. Ima alitapash nara ricushpallatami rishca.

26Ñapash rij barcocunashnami rishca. Aichata micungapaj ñapash uriajuj jatun angashnami calpashca.

27Ñucaca: ‘Aij nijushcata cungashpa, llaquilla ñavi canata saquishpa, shinlli tucushallami’ nimanmi.

28Ashtahuangarin cai tucui nanaicunaca, muspachijuhuanmari. Ima alitapash rurajtashna, na ricunataca yachanimi.

29Ñucaca, Diosta na manllajmi cani. ¿Imapajta yangaca, imatapash rurashayari?

30Rasu yacucunahuan armashca cajpipash, maquita yurayajta maillarishca cajpipash,

31ñucataca utujupimi shitahuanguiman. Chaipica, ñuca churajunallatami, ñucataca millanayachinga.

32Paica, napacha ñucashna runallachu. Shinamandami, imata tigrachitapash na ushani. Imata rurashcata paihuan randimanda ricuitapash, na ushanichu.

33Ñucanchi ishcandipaj jahuapi maquita churashpa alichij juezca, pipash na tianllu.

34Paipaj varata ñuca jahuamanda anchuchishpami ali canman. Pai cachamushca manllaipash ñucataca, ama manllachihuachun.

35Shina cajpica, na manllashpa rimashallami. Cunanga, cashna llaquipi cashpaca, na ñucapichu cani.