1Mandaj Dioslla, imashna llaquichishcashnallata
llaquichij Taita Diosmi cangui.
Imashna llaquichishcashnallata llaquichij
Taita Dioslla, ricuripairi.
2Cai pachapi causajcunapaj Juezlla.
Canga jatumbachamari capangui.
Jariyashpa jatun tucushcacunaman,
imata cunatallata cupairi.
3Mandaj Dioslla, canda na manllajcunataca,
¿ima punllacamanda saquigripangui?
Canda na manllajcunaca, ¿ima
punllacamanda cushijunajungalla?
4¿Ima punllacamanda shinlli shimicunata
rimashpa parlanajungalla?
Nalita tucui rurajcunaca, ¿ima
punllacamanda cushijunajunga?
5Mandaj Dioslla, chai gentecunaca
can agllashcacunatami llaquichinajun.
Cambajlla cachun agllashcacunatami llaquichinajun.
6Sapalla huarmigutapash, shuj llactamanda
runatapashmi huañuchinajun.
Taita mama illaj huahuatapashmi, causaita quichunajun.
7Shina rurashpaca, cashnami ninajurca:
“Mandaj Diosca, na ricungachu.
Jacobopaj Taita Diosca, na yachangachu” ninajurcami.
8Tucui gente puracunapi shinlli
shungu runacuna, aliguta yarichiyari.
Muspa runacuna cangunapash, ¿ima
punllashi alipacha yachajushca canguichi?
9Rinrita ruraj Diosca, ¿nachu uyanga?
Ñavita ruraj Diosca, ¿nachu ricunga?
10Llactacunata llaquichijca, ¿nachu
jarcashpa rimanga?
Runacunaman yachaita cujca, ¿nachu yachanga?
11Runacunapaj yuyaicunataca, yangalla
cajtami Mandaj Diosca ricujun.
12Mandaj Dioslla, can jarcashpa rimajpi,
can mandashcata yachachijpi causaj
runaca, ninandami cushijun.
13Canga, llaqui punllacunapi
samachingapajmi chashna rurajungui.
Ashtahuangarin canda na manllaj
runapaca, utujutami allangui.
14Mandaj Diosca, pai agllashcacunataca na jichungachu.
Paipajlla cachun agllashcacunataca, napacha saquingachu.
15Ashtahuangarin llaquichinaca, imatapash
cashcatapacha ruranamanmi tigranga.
Shungupi alitalla tucui yarijcunami,
chaitaca catinajunga.
16Nalita rurajcunahuanga, ¿pita ñucamanda shayaringa?
Nalita rurajcunahuan ñucamanda
shayaringapaca, ¿pita tiangayari?
17Mandaj Dios ñucata na ayudajpica,
ñuca almaca ñapashmi chulunllapi causajunman carca.
18“Mandaj Dioslla, ñuca chaqui lluchajunmi”
nishpa villajpica, can llaquishpami charihuarcangui.
19Ñuca shungu ucupi ashtaca yuyaicunahuan
musparijujpica, can cushichishcacunami,
ñuca almatapash cushichihuarca.
20¿Jatun nalita rurashpa mandajcunaca,
canhuan tandanajungachu?
Mandashcata ruraj tucushpallami,
ashtahuan nalita ruranajun.
21Paicunaca, imatapash cashcatapacha ruraj
runatarami tandanajushpa huañuchinajun.
Ima nalita ruranatapash, na yachajtarami
huañuchi tucunapachami ninajun.
22Ashtahuangarin ñucataca, Mandaj Diosmi pacahuashca.
Ñuca Taita Diosca, ñuca yariashpa
causana jatun Rumishnami.
23Paicuna nalita rurashcataca, paillatami
paicunapaj jahuapillata tigrachimunga.
Paicuna nalita rurashcahuanllatami tucuchinga.
Ñucanchita Mandaj Taita Diosca tucuchingapachami.
Who We AreWhat We EelieveWhat We Do
2025 by iamachristian.org,Inc All rights reserved.
