JOSUÉ 23 - Quichua Imbabura Bible

Israelcunatami Josueca rimashca

1Tauca punlla jipacuna, Mandaj Diospash israelcunaman, paicunapaj muyundipi causanajuj, paicunata tucui fiñajcunamanda samachijujpi Josuepash, tauca huatacunata causashpa, ña rucugu cajpimi, cashna tucurca:

2Josueca, tucui israelcunata, paicunata mandaj rucucunata, paicunata mandajcunata, juezcunata, shuj mandajcunatapash cayashpami, cashna nijurca:

“Ñucaca, tauca huatacunata charij, ña rucumi cani.

3Cangunata Mandaj Taita Diosca, cangunamanda shayarishpa, tucui cai llactacunapi causajcunata, tucui imatalla rurashcataca, cangunallata ricurcanguichimi. Cangunata Mandaj Taita Diosmi, cai llactapi causajcunahuanga, cangunamanda macanajurca.

4Ricuichi, cai llacta alpacunataca, suerteta rurashpami, ña quichushca llactacunatapash, nara quichushca llactacunatapash, cangunapaj aillucunapaj cachun chaupishpa curcani. Indi llujshimuj lado Jordán yacumandaca, indi huashajuj ladoman tiaj Mama Cuchacamanmi, cangunaman curcani.

5Cangunata Mandaj Taita Diosmi, chai gentecunataca cangunapaj ñaupamanda llujchishpa cachanga. Canguna ricujtami, llujchishpa shitanga. Cangunaca, cangunata Mandaj Taita Dios villashcashnallatami, paicunapaj alpacunata japinguichi.

6Moisés mandashcata escribishca libropi tucui tiajujta pactachingapaca, ninanda shinlli tucushpa aliguta yaringuichi. Chai mandashcamandaca, ali ladomambash, lluqui ladomambash ama anchurishpa catinguichi.

7Cai llactapi cangunahuan puchushca gentecunahuan ama tandanajungapaj, paicunapaj dioscunapaj shutitaca, rimaitapash ama rimangapaj, paicunapaj shutipica ama juramentungapajmi, chashna aliguta catina canguichi. Chai dioscunataca, na servinachu canguichi, na cungurinachu canguichi.

8Ashtahuangarin cunangaman catinajushcashnallata, cangunata Mandaj Taita Diostalla catinguichi.

9Mandaj Diosmi jatun, ninan shinlli llactacunataca, cangunapaj ñaupajmanda llujchishpa cacharca. Chaimandami cunangaman cangunahuanga, pipash na chimbapurashpa macanajui ushashca.

10Canguna puramandaca, shuj runallami huaranga runacunata catinga. Cangunata Mandaj Taita Diosca, pai villashcashnallata cangunamanda macanajujpimi, chashna ruranguichi.

11Cangunata Mandaj Taita Diosta juyangapajmi, na quillanayachishpa tucui almahuan cazuna canguichi.

12Diosmanda anchurishpara, cangunahuan puchushca gentecunahuan tandanajunguichiman. Shinallata cangunapash, paicunahuan caishujmanda chaishujmanda cazarachishpara chapuringuichiman.

13Cangunata Mandaj Taita Diosca, cai llactapi causajcunata cangunapaj ñaupajmanda na ashtahuan llujchishpa cachanatami yachana canguichi. Paicunaca, cangunapaca lazushna, nitijashpa pandachinashna, cangunapaj huashapi astina angushna, ñavipi yaicushca cashashnami canga. Cangunata Mandaj Taita Dios, cangunaman carashca cai juyailla llactamanda tucuringacamanmi, chashna canga.

14Ricuichi cunanga, cai pachapi tucui causajcuna rina ñanda japishpami, ña huañugrini. Chaimandami, cashna nini: Cangunata Mandaj Taita Diosca, pai imashna aliguta rurasha nishcataca tucuitami pactachishca. Pai imashna nishcata tucuita pactachishcamandaca, tucui shunguhuan, tucui almahuanmi pashi nina canguichi. Tucuitami cangunaman pactachishca, imatallapash na saquishcachu.

15Cangunata Mandaj Diosca, tucui ima alicunata pai carasha nishcashnallatami, Mandaj Taita Diosca llaquichina tucui shimicunata cangunapajman cachamunga. Cangunata Mandaj Taita Dios carashca juyailla llactamanda tucuchingacamanmi, chashna cachamunga.

16Cangunata Mandaj Taita Dioshuan ari ninajushcata na cazushpami, shuj dioscunatara mañangapaj rishpa, paicunapaj ñaupajpi alicachishpa cunguringuichi. Chashna rurajpimi Mandaj Diosca, cangunahuanga nina japirinshna fiñaringa. Chaimandami, pai carashca cai juyailla llactamandaca, ñapash chinganguichi” nijurcami.