1 CRÓNICAS 28 - Quichua Imbabura Bible

Davidpaj randica, Salomonmi mandai callarishca

1Davidca, israelcunata tucui mandajcunatami, Jerusalenbi tandachirca. Aillucunata mandajcunata, shicanyachishca soldadocunata mandashpa jatun mandajta servijcunata, huaranga soldadocunata, patsaj soldadocunata mandajcunatapashmi tandachirca. Shinallata jatun mandajpaj jazindapi, paipaj churicunapaj alpacunapi paicuna imata charishcacunata ricushpa mandajcunatapash, paipaj soldado puracunapi ashtahuan alicachi tucushca, ninan shinlli soldadocunatapashmi tandachirca.

2Chai tandanajuipimi, jatun mandaj Davidca, shayarishpa cashna nijurca: “Ñuca huauquicuna, ñuca llacta puracuna, ali uyahuaichi. Mandaj Dios ñucanchihuan ari ninajushpa escribishcata alichishca arcapash aliguta tiajuchunmi, shuj huasita shayachisha yajurcani. Ñucanchi Taita Diospaj ali lado chaqui ñaupajpi tiajuchunmi, shina shayachingapaj munarcani. Chaimandami chai huasita shayachingapaca, tucuillata alichircani.

3Ashtahuangarin Taita Diosmi, ñucataca cashna nihuarca: ‘Ñuca shutipi mañana huasitaca, canga na shayachinguichu. Canga, macanajuj runa cashcamandami, ashtaca yahuarta jicharcangui’ nihuarcami.

4Ashtahuangarin israelcunata Mandaj Taita Diosca, ñuca taitapaj tucui huasi ucu puramanda agllashpami, ñuca tucui causaipi Israel llactata jatun mandaj cachun churahuarca. Paimi, Judá aillu puramanda juez cachun agllashca. Judá aillu puramandaca, ñuca taitapaj familiatami agllashca. Ñuca huauqui puramandaca, ñucatami agllashpa, tucui israelcunata jatun mandaj cachun churahuarca.

5(Mandaj Diosca, ashtaca churicunatami ñucaman carahuarca). Ñuca churi puramandaca, ñuca churi Salomondami, pai Mandaj Dios mandashpa tiarinapi tiarishpa, israelcunata mandachun churarca.

6Paillatami, ñucataca cashna nihuarca: ‘Cambaj churi Salomonmi, ñuca huasitapash, ñuca patiocunatapash ruranga. Paitami, ñuca churishna cachun agllarcani, ñucapash paipaca taitashnami casha.

7Ñuca mandashcacunata, imata rurachun ñuca villashcacunata, cunan punllacaman cazujunshnallata cazujpica, pai mandana llactataca paipaj tucui causaipi shinllitapachami churasha’ nihuarcami.

8Cunanga, Mandaj Diospajlla tandanajushca cai tucui israelcunapash, ñucanchi Taita Diospash uyajujpimi, cashna nini: Cangunata Mandaj Taita Dios imata rurai nishcatapash pactachinguichi. Chashna rurashpallami, pai cangunaman carashca cai juyailla llactagutaca cangunallata japinguichi. Shinallata cangunapaj huahuacuna japinajuchumbashmi, tucui causaipaj saquinguichi.

9Salomón, ñuca huahualla. Cambaj taitapaj Taita Diostaca, pactarallapash cunganguiman. Paitaca, ali shunguhuan, tucui munaihuan servishpa causangui. Mandaj Diosca, tucuicunapaj shungutami callarishpa ricujun. Imata rurangapaj yarijushcatapash, tucuitami yachan. Can paita mascashpaca, taringuimi. Ashtahuangarin paita can saquijpica, paipashmi candaca causaita causaicaman saquinga.

10Ricui, cunanga Mandaj Diosmi, candaca shuj huasita shayachishpa paipajlla shicanyachijuchun agllarca. Chaitaca, shinlli tucushpa rurangui” nijurcami.

11Chashna nishpami Davidca, Diospaj huasi corredortapash, Diospajlla huasi ucutapash, imatalla alichina ucucunatapash, caishuj ucucunatapash, juchamanda cushca yahuarta chafsina arca tiajuj ucutapash, imashna ruranata ricuchishpa paipaj churi Salomonman saquirca.

12Shinallata Mandaj Diospaj huasi patiocunata, chai huasi muyundi ucucunata, Taita Diospaj huasipi imalla tiashcata alichina ucucunata, Diospajlla shicanyachishcacunata alichinacunatapash, imashna shayachingapaj yarijushcatami ricuchishpa saquirca.

13Shinallata Mandaj Diospaj huasipi, Diospajta rurangapaj huashan huashan yaicunajuj curacunapaj, levitacunapaj ucucunatapash, Mandaj Diospaj huasipi Diospajta rurangapaj imalla charinacunata alichina ucucunata rurachumbashmi ricuchishpa saquirca.

14Diospaj huasipi shuj shuj ruranacunata rurangapaj ima minishirishcata, oromanda imata rurachumbash orota pezashpami curca. Shinallata Diospaj huasipi shuj shuj ruranacunata rurangapaj ima minishtirishcacunata, culquimanda imata rurachumbash culquita pezashpami curca.

15Oro candelerota, chai candeleropi churana lamparacunata rurachumbash, orota pezashpami curca. Cada candelerota, chai candeleropi churana cada lamparacunata rurachumbash, orota pezashpami curca. Culqui candelerocunata rurachumbash, chai candeleropi churana lamparacunata rurachumbash, culquita pezashpami curca. Cada candelerota, imashna servichinata ricushpami, pezashpa curca.

16Shinallata Diospajlla shicanyachishca tandata churana mezacunata rurachumbash, tucui mezapajmi orota pezashpa curca. Culqui mezacunata rurachumbash, culquitaca shinallatami pezashpa curca.

17Garfio nishcacunata, lavacaracunata, copacunata, oro tastacunata rurachumbash, tucui tastacunapajmi ashtahuan ali orota pezashpa curca. Culqui tastacunapajpash, tucui tastacunapajmi culquita pezashpa curca.

18Shinallata inciensota cushnichina altarta, oro querubín nishcacunata rurachumbash, ashtahuan ali orotami pezashpa curca. Chai querubingunami, Mandaj Dioshuan ari ninajushpa escribishcata alichishca arcata, alashuan quilpashpa tianajun. Chai oro querubingunapaj carretata rurachumbashmi, shinallata curca.

19Davidca, cashnami nirca: “Tucui caicunatami, Mandaj Diosca paipaj maquihuan rurashpa ricuchihuarca. Paimi, imashna ruranataca tucuillata aliguta rurashpa ricuchishpa yachachihuarca” nircami.

20Davidca, paipaj churi Salomondaca, cashnatapash nijurcarami: “Ashtahuan ali yuyaita japishpa, shinlli tucushpa chaitaca ña rurai callarilla. Na manllanachu cangui. Na rurai ushashachu yashpaca, ama saquinguichu. Mandaj Taita Dios, ñuca Taita Diosca canhuanmi. Mandaj Diosca, paipaj huasita tucuita aliguta rurashpa tucuchingacaman, candaca napacha saquingachu. Candaca, na jichushpa saquingachu.

21Ricui, shicanyachishpa churashca curacunapash, levitacunapash, Taita Diospaj huasipi tucui imatalla rurashpa, servinapica canhuanmi canga. Shinallata paicunapaj tucui munaihuan servijcunapash, tucui imatapash ruranata ali yachajcunapash canhuanmi. Tucui mandajcunapash, tucui israelcunapash, can mandashcata tucuita rurangapaca cambaj maquipimi” nijurcami.