MATEO 25 - Quichua Imbabura Bible

Jarihuan nara tacarishca chungapura cuitsacunahuan chimbapurashpa parlashcami

1Shinallata jahua pachapi Dios mandajujpi causajcunaca, chai punllacunapimi jarihuan nara tacarishca chungapura cuitsacunashna canga. Chai cuitsacunaca, cumba cuitsata cazarangapaj shamuj noviota tuparingapajmi, michacunata japichishpa llujshinajurca.

2Chai chunga puramanda picha cuitsacunaca, aligutapacha yarishpa purijcunami carca. Shinallata picha cuitsacunaca, juizu illajcunami carca.

3Juizu illaj purij cuitsacunaca, michata apashpapash, aceite tucurijpi cutin churangapaca, na apashpami rishca carca.

4Ashtahuangarin aligutapacha yarishpa purij chai cuitsacunaca, aceitehuan, uchilla funducunata japishpami rishca carca.

5Chai cuitsacunaca, novio na ucha shamujpimi, puñuimanda shitarinajushpa tucuilla puñunajurca.

6Ña chaupi tuta tucujujpimi: ‘¡Novio shamujunmi, tuparingapaj llujshichi!’ nishpa, caparijta uyarca.

7Shina caparijpimi, chai cuitsacuna jatarishpa, michacunata alichi callarinajurca.

8Shina alichinajushpami, chai juizu illaj purij cuitsacunaca: ‘Ñucanchipaj michaguca huañugrinmari. Asha aceiteguta carahuaichi’ nishpa, chai aliguta yarishpa purij cuitsacunata mañanajurca.

9Shina mañajpica, cashnami nirca: ‘Cangunaman carajpica, ñucanchipajpash, cangunapajpash na pactangachu. Richilla, aceiteta jatuj huasipi randinguichi’ nishpami, chai aligutapacha yarishpa purij cuitsacunaca tigrachirca.

10Ashtahuangarin chai picha cuitsacuna aceiteta randingapaj rinajujpimi, novioca chayamurca. Shina chayamujpimi, chai alichirishcalla shuyanajuj cuitsacunaca, noviohuan boda huasiman yaicurca. Paicuna yaicujhuanmi, pungutaca vicharca.

11Chai jipallami, jarihuan nara tacarishca chai pichapura cuitsacuna chayamushpaca: ‘¡Amo taitalla, amo taitalla! ¡Punguguta pascapai!’ nishpa caparinajurca.

12Ashtahuangarin novioca, cashnami nirca: ‘Na llullashpami, cangunataca cashna nini: Cangunataca na rijsinichu’ nircami.

13Shinallatami, Runa Aichayu tucushca ñuca ima punlla, ima hora shamunatapash na yachanguichi. Chaimandami, na puñushpa chapariana canguichi.

Culquihuan chimbapurashpa parlashcami

14Jahua pachamanda Dios mandajujca, culquita mingaj amoshnallami mandajun. Chai amoca, caru llactaman rigrijushpami, paita servijcunata cayashpa, pai imatalla charishcacunataca mingarca.

15Chai amo mingashpaca, paicuna imashna rurai ushanata ricushpallami mingarca: Shujman picha talento nishca culquita, caishujman ishcai talento culquita, chaishujman shuj talento culquitami mingarca. Shina mingashpami amoca, caru llactaman rirca.

16Picha talento culquita japij runaguca randishpa, jatushpa purijushpami, ashtahuan shuj picha talento culquita mirachijurca.

17Shinallata ishcai talento culquita japij runagupashmi, ashtahuan shuj ishcai talento culquita mirachirca.

18Ashtahuangarin shuj talento culquita japij runaca, alpata allashpami, amo mingashca culquitaca pambarca.

19Tauca huatacunapi tigramushpami, chai amoca paita servijcunataca, mashna culquita mirachishcatapash yachangapaj tapujurca.

20Shina tapujpica, picha talento culquita japij runaguca, ashtahuan shuj picha talento culquita mirachishcata apashpami shamurca. Shina shamushpaca: ‘Amo taitalla, canga ñucaman picha talento culquigutami mingahuarcangui. Chaitaca, ashtahuan shuj picha talento culquitami mirachiparcani’ nishpami curca.

21Shina cujpimi chai amoca, cashna nirca: ‘Canga, aliguta pactachij, aliguta ruraj runagumi cashcangui. Ashagutalla mingajpipash, aliguta cuidashpami mirachishcangui. Cunanga, ashtahuan ashtacatami canman mingapasha. Cushijungapaj ucuman ripashun’ nircami.

22Shinallata chai ishcai talento culquita japij runagupash shamushpami: ‘Amolla, canga ishcai talento culquigutami mingahuarcangui. Chaitaca, ashtahuan shuj ishcai talento culquigutami mirachiparcani’ nishpami curca.

23Shina cujpimi chai amoca, cashna nirca: ‘Canga, aliguta pactachij, aliguta ruraj runagumi cashcangui. Ashagutalla mingajpipash, aliguta cuidashpami cashna mirachishcangui. Cunanga, ashtahuan ashtacatami canman mingapasha. Cushijungapaj ucuman ripashun’ nircami.

24Ashtahuangarin shuj talento culquita japij runa shamushpaca, amotaca cashnami nirca: ‘Amo, canga fiñajlla cajtami yacharcani. Shinallata tarpuchun na muyuta cushpapash, tandachijpi chaupingapaj shamujllami cangui.

25Chashna cajpimi manllashpa, cambaj culquitaca alpata allashpa pacarcani. Jaica, cambaj culquitaca japipailla’ nircami.

26Shina nijpimi amoca, cashna nirca: ‘Canga, yanga yanga causaj, nali runamari cashcangui. Tarpuchun muyuta na cushpapash, tandachijpi chaupingapaj shamuj cajtaca yachahuashcanguimi.

27Shina yachashca cashpaca, ñuca culquitaca bancopi churashpami ali canguiman carca. Shina churajpimi, ñuca shamushpaca, mama culquimanda mirashca culquindi japiman carcani.

28Cunanga, cai runa charijuj talento culquita quichushpa, chunga talento culquita charij runaman cuichi.

29Ashtacata charij runami carajpi, ashtahuan charinga. Ashtahuangarin na charij runataca, ashatalla charishcatapash tucuillatami quichunga.

30Cai runa na valitaca, yana yana canllaman shitaichi. Chaipimi ninanda huacashpa, quirutapash canirishpa causajunga.

Tucuilla gentecunata tapuchinatami villajun

31Runa Aichayu tucushca ñucami, punchapamba shamusha. Jucha illaj ñuca angelcunapashmi ñucahuan shamunga. Shina shamushpami, punchapamba mandangapaj tiarinapi tiarishpa mandajusha.

32Ñuca ñaupajmanmi, tucui llactacunapi causajcuna tandanajumunga. Chaipimi llamacunata, chivocunata michij runa agllanshna, chai gentecunataca shican shican churasha.

33Llamacunashna alicunataca, ñuca ali ladomanmi churasha. Chivocunashna nalicunataca, ñuca lluqui ladomanmi churasha.

34Shina churashpami, ñuca ali ladoman shayanajujcunataca, Jatun Mandaj ñucaca cashna nijusha: ‘Ñuca Taita bendiciashcacuna, cangunapash ñucahuan mandanata japij shamupaichi. Cai mandanataca, Diosmi cai pachata churai punllamandapacha cangunaman alichishcalla charijurca.

35Ñuca yarjachishpa purijujpica, cangunami micunaguta carahuarcanguichi. Yacunayachijpipash, cangunami yacugutaca carahuarcanguichi. Caru llactamanda shamushpa purijujpipash, cangunami mingachihuarcanguichi.

36Churajunagu illaj purijujpipash, cangunami churajunagutaca carahuarcanguichi. Huañujujpipash, cangunami ricuj shamuhuarcanguichi. Prezuna huasipi cajpipash, ricungapaj shamuhuarcanguichimi’ nijushami.

37Shina nijpimi, imatapash cashcatapacha rurashpa causajcunaca, cashna nihuanga: ‘Apunchi Jesús, ¿ima punllata can yarjachishpa purijujta ricushpa, micunata caraparcanchi? ¿Ima punllata can yacunayachijujta ricushpa, yacuta caraparcanchi?

38¿Ima punllata caru llactamanda shamushpa purijujta ricushpa, candaca mingachiparcanchi? ¿Ima punllata churajuna illaj purijujta ricushpa, can churajuchun caraparcanchi?

39¿Ima punllata can huañujujp, prezuna huasipi can tiajujpi ricungapaj shamuparcanchi?’ ninajuhuangami.

40Shina nijpimi, ñuca mandashpa tiajushpa paicunataca, cashna nisha: ‘Na llullashpami, cangunataca cashna nini: Huahuacunashna ñucata cazuj cai huauquicunaman imaguta carashpapash, ñucamanmi chashna carahuarcanguichi’ nishami.

41Chai jipami, ñuca lluqui ladoman shayanajujcunataca, cashna nijusha: ‘Ninanda nalicachi tucushcacuna, ñuca ñaupajmanda anchurichi. Cangunaca, causaita causaicaman na huañushpa rupajuj ninaman richi. Chai ninataca diabloman, paita ayudaj angelcunamanmi alichishca.

42Yarjachishca purijujpipash, cangunami micunagutapash na carahuarcanguichi. Yacunayachishca purijujpipash, cangunami yacugutapash na carahuarcanguichi.

43Caru llactamanda shamushpa purijujpipash, cangunami ñucataca na mingachircanguichi. Churajunagu illaj purijujpipash, cangunami churajunataca na carahuarcanguichi. Huañujujpipash, prezuna huasipi tiajujpipash, cangunami na ricuj shamuhuarcanguichi’ nijushami.

44Shina nijpimi paicunaca, cashna ninajuhuanga: ‘Apunchi Jesús, ¿ima punllata can yarjachishpa, yacunayachishpa purijujta ricushpapash, na caraparcanchi? ¿Ima punllata caru llactamanda can shamushpa purijujta ricushpapash, na mingachiparcanchi? ¿Ima punllata churajuna illaj purijujta ricushpapash, can churajuchun na caraparcanchi? ¿Ima punllata can huañujujpipash, prezuna huasipi tiajujpipash, na ricuj shamuparcanchi?’ ninajuhuangami.

45Shina nijpimi paicunataca, cashna nisha: ‘Na llullashpami, cangunataca cashna nini: Huahuacunashna ñucata cazuj cai huauquicunaman na carashpaca, ñucamanmi na carahuarcanguichi’ nishami.

46Chashnacunaca, causaita causaicaman ninanda llaquichi tucungapajmi ringa. Ashtahuangarin imatapash cashcatapacha rurashpa causajcunami, causaita causangapaj ringa” nijurcami.