JOSUÉ 22 - Quichua Imbabura Bible

Jordán yacu ladopimi altarta rurashca

1Shinamandami Josueca, Rubenbaj, Gadpaj aillucunatapash, Manasespaj chaupi aillutapash cayashpa,

2cashna nijurca: “Cangunaca, Mandaj Diosta servij Moisés mandashcatapash, tucuitami pactachishcanguichi. Shinallata tucui imatalla ñuca mandashca shimicunatapashmi cazushcanguichi.

3Cangunapaj huauquicunataca, cai tucui huatacunata na saquishpami, cunan punllacaman caipi canguichi. Ashtahuangarin cangunata Mandaj Taita Dios mandashcacunata pactachingapajmi, aliguta yarishpa causarcanguichi.

4Cunanga, cangunata Mandaj Taita Diosca, pai carasha nishcashnallatami, cangunapaj huauquicunamambash casilla ali causaita carashca. Cangunamambash, Mandaj Diosta servij Moisesca, Jordán yacu chimba ladopimi, alpacunata cararca. Cangunaca, cangunapaj carpacunaman tigraichilla.

5Cangunaca, Mandaj Diosta servij Moisés mandashca shimicunataca, na quillanayachishpa, aliguta yarishpa pactachinatallami charinguichi. Moisesca cashnami nirca: ‘Cangunata Mandaj Taita Diosta juyashpa, tucuita pai yachachishcacunata cazushpa causanguichi. Pai mandashcacunata pactachishpa, paitalla catinguichi. Shinallata tucui shunguhuan, tucui almahuan servishpa causanguichi’ nircami” nijurcami.

6Chai jipaca, paicunata bendiciashpa cayacaman nishpa Josué rijpimi, paicunapaj carpacunaman tigranajurca.

7Moisesca, Manasespaj chaupi aillumambashmi, Basán shuti llactapi alpacunata, paicunapaj cachun cushca carca. Ashtahuangarin caishuj chaupi aillumambash, Josuemi Jordán yacumanda indi huashajuj chai ladoman paicunapaj huauquicunapaj chaupipillata alpacunata curca. Paicunatapash bendiciashca jipami Josueca, carpacunaman cacharca.

8Paicunataca, cashnami nijurca: “Cunanga, cangunapaj carpacunaman, cai tucui charishcacunandi tigraichilla. Ashtaca animalcunata, orota, culquita, bronceta, ashtaca churajunacunata apashpa richilla. Cangunata fiñajcunata quichushcacunataca, cangunapaj huauquicunahuan chaupiringuichi” nijurcami.

9Shinami Rubenbaj, Gadpaj aillucunapash, Manasespaj chaupi aillupash, Canaán llactapi Silo shuti pueblopi causanajuj israelcunamanda anchurishpa, paicunapaj Galaad shuti llactaman tigranajurca. Chai llactatami, paicunapaj cachun japinajushca carca. Mandaj Dios mandashcashnallata Moisés villajpimi, chai llactaca paicunapaj cachun japinajushca carca.

10Rubenbaj, Gadpaj aillucunapash, Manasespaj chaupi aillupash, Canaán llactata yalijuj Jordán yacuhuan lindero ladoman chayashpami, chai Jordán yacu ladopi shuj altarta ruranajurca. Chai altarca, jatumbachami ricurijurca.

11Israelcunaca, cashna nijtami uyarca: “Rubenbaj, Gadpaj aillucunapash, Manasespaj chaupi aillupash, Canaán llacta chimba purapi, Jordán yacuhuan linderopimi, israelcunapaj ladoman shuj altarta rurashca” nijtami uyarca.

12Israelcunaca chaita uyashpami, tandanajushca tucui israelcuna paicunahuan macanajungapaj vichai ringapaj, Silo shuti pueblopi tandanajurca.

13Chaimandami israelcunaca, Galaad llactapi causanajuj Rubenbaj, Gadpaj aillucunapajman, Manasespaj chaupi aillupajmambash, Eleazar shuti curapaj churi Finees shuti runata cacharca.

14Finees shuti runahuanga, chunga mandajcunatapashmi cacharca. Tucui Israel aillucunapaj taitacunapaj tucui familiacunata mandajcunatami cacharca. Tucui paicunaca, huaranga huaranga israelcunapi paicunapaj taitacunapaj huasi ucu puracunata mandajcunami carca.

15Paicunami, Rubenbaj, Gadpaj aillucunapajman, Manasespaj chaupi aillupajman, Galaad llactaman rinajurca. Paicunami, cashna nishpa rimanajurca:

16—Mandaj Diospaj tucui tandanajushcacunami, ñucanchitaca cashna nichun cachamun: ‘¿Yachashpata na cazushpa, israelcunapaj Taita Diosta fiñachishpa, nalita rurashcacunaca, imata? ¿Cunanga, Mandaj Diosta catinata saquingapajchu, pai Mandaj Diosta na cazushpa, shuj altarta rurarcanguichi?

17¿Peor shuti diosta mañashpa nalita rurashcapash, imapash na canllu yashpachu causanguichi? Chai nalita rurashcamandami, cunangaman mapayashca canchi. Chaimandami Mandaj Diospaj tandanajushcapica, huañui chayamurca.

18Mandaj Diosta catinata canguna saquishpaca, pai Mandaj Diostami cunanga na cazunguichi. Chaimandami Mandaj Diosca, jipa punllacunaca tandanajushca tucui israelcunahuan fiñaringa.

19Canguna japinajushca cai llactaca mapami yashpaca, Mandaj Diospaj jatun carpa shayajuj, Mandaj Diospaj alpaman yalimuichilla. Chaipica, ñucanchi purapillata alpacunata japinguichillami. Ashtahuangarin ñucanchita Mandaj Taita Diospaj altar tiashca jahua, shuj altarta rurashpami, Mandaj Diostapash na cazushpa, ñucanchitapash na cazushpa llaquichinguichi.

20¿Nachu Zera shuti runapaj churi Acán shuti runaca, Dios tucuchingapaj shicanyachishcata yachashpata japishpa na cazurca? ¿Nachu chashna rurashcamanda Dios ninanda fiñarishcapash, tandanajushca tucui israelcunapaj jahuapi shamurca? Chai runaca, pai jatun nalita rurashcamandaca, na pailla huañurcachu’ nichunmi cachamun— ninajurcami.

21Shina nijpimi Rubenbaj, Gadpaj aillucunapash, Manasespaj chaupi aillupash, huaranga huaranga israelcunata mandajcunataca, cashna nishpa tigrachirca:

22—Mandaj Diosca, dioscunapaj Taita Diosmi. Mandaj Diosca, dioscunapaj Taita Diosmi. Paimi tucuita yachan. Paica, na cazushcata, na cashpaca yachashpata na cazushpa, Mandaj Diosta fiñashcata yachachunmi, israelcunaman villachin. Shina cajpica cunanga, ñucanchitaca ama quishpichinguichu.

23Ñucanchica, Mandaj Diosmanda caruyashpa, Diosman animalta cushpa huañuchishpa, Diosman animalta cushpa tucuillata rupachishpa, na cashpaca Diosman imagutapash cushpa rupachishpa, na cashpaca Dioshuan ali cangapaj carashpa chaipi rupachishpaca na causashunllu. Chaicunata rurangapaj, chai altarta rurashca cajpica, ñucanchitaca Mandaj Diosllata llaquichijuchunlla.

24Ashtahuangarin jipa punllacunapi cangunapaj huahuacuna ñucanchi huahuacunata cashna ninajunata manllashpami, chai altartaca rurarcanchi: ‘Cangunaca, israelcunata Mandaj Taita Dioshuanga, ¿imata ricunatata charinguichi?

25Rubenbaj, Gadpaj miraicunalla, ñucanchihuan cangunahuan lindero cachunga, Jordán yacutami Mandaj Diosllata churarca. Chaimandami Mandaj Diosmandaca, imata japinatapash na charinguichi’ ninajungami. Cangunapaj huahuacunaca chashna nishpami, ñucanchi huahuacunataca Mandaj Diosta manllashpa causanata saquichinga.

26Chaimandami cashna ninajurcanchi: ‘Cunanga, shuj altarta rurashunchi. Ashtahuangarin Diosman cushpa tucuillata rupachina altarta, na cashpaca animalta carashpa huañuchina altartaca, na ruranachu canchi’ ninajurcanchimi.

27Ashtahuangarin ñucanchipajpash, cangunapajpash, ñucanchipaj jipa miraicunapajpash, shuj ricuchina cachunmi rurarcanchi. Chai altarmi, Mandaj Diospaj ñaupajpi animalcunata cushpa tucuillata rupachishpa, paiman animalcunata carashpa huañuchishpa, Dioshuan ali cangapaj imatalla carashpa servi ushanata ricuchinga. Shinallata jipa punllacunapica, cangunapaj huahuacunapash, ñucanchi huahuacunataca: ‘Cangunaca, Mandaj Diosmandaca imata japinatapash na charinguichica’ nishpa ama rimanajuchunmi, chashna rurarcanchi.

28Chaimandami ñucanchica, cashna ninajurcanchi: ‘Ñucanchita cashpa, na cashpaca ñucanchipaj miraicunata cashpa, shamui punllacunapi chashna nalicachijpica, cashna nishpami tigrachishun: Ricuichi, ñucanchi taitacunaca Mandaj Diospaj altartashnallami rurashca. Chai altartaca, Diosman animalta cushpa tucuillata rurachingapaj, na cashpaca animalta cushpa chaipi huañuchingapaca, na rurashcachu. Ashtahuangarin ñucanchipash, cangunapura cashcata ricuchingapajmi, chai altartaca rurashca’ ninajushunmi.

29Mandaj Diosta na cazunapash, na cashpaca Mandaj Diosta cunan catijushcata saquinapash, ima horallapash ama chashna tucuchun. Diosman animalta cushpa tucuillata rupachingapaj, na cashpaca Diosman imatapash cungapaj, na cashpaca Diosman animalta cushpa rupachingapaca, Mandaj Taita Diospaj altarta, carpa ñaupajpi rurashca jahuaca, napacha shuj altartaca rurashunllu— ninajurcami.

30Rubenbaj, Gadpaj, Manasespaj miraicuna nishca shimicunaca, Finees shuti curapaj uyaipipash, tandanajushca israelcunata mandajcunapaj uyaipipash, curahuan chaipi shayanajuj huaranga huaranga israelcunata mandajcunapaj uyaipipash, tucuimi ali uyarirca.

31Chaimandami, Eleazar shuti curapaj churi Finees shuti runaca, Rubenbaj, Gadpaj, Manasespaj miraicunataca cashna nirca:

—Mandaj Dios ñucanchihuan cajtaca, cunanmi yachashcanchi. Shinallata cangunaca, Mandaj Diosta fiñashpa, paita umachishpa saquingapaca na munashpami, aliguta catircanguichi. Cunanga, Mandaj Diospaj maquimandami, israelcunataca quishpichishcanguichi— nircami.

32Eleazar shuti curapaj churi Finees shuti runapash, caishuj mandajcunapash, Rubenbaj, Gadpaj miraicunata saquishpami, Galaad llactamandaca Canaán llactaman israelcunapajman tigramunajurca. Paicunamanmi, imata parlashcatapash villanajurca.

33Paicuna villashcacunaca, israelcunapipash alimi uyarirca. Chaimandami israelcunaca, Taita Diosta alicachinajurca. Chai punllamandapachami Rubenbaj, Gadpaj miraicuna causanajushca llactata macanajushpa tucuchingapaj vichai ringapaca, na ashtahuan parlanajurca.

34Rubenbaj, Gadpaj miraicuna rurashca altartaca: “Caimi ñucanchi purapica, Mandaj Diosca, Taita Dios cajta ricuchijun” nishpami, “Ed” shutita shutichinajurca.