2 CORINTIOS 3 - Quichua Imbabura Bible

Shuj mushujta ari nishcata, Diospajta rurajcunami canchi

1¿Ñucanchica, cutinllu alicachirishpa, cartacunata escribina canchi? ¿Na cashpaca, huaquinguna alicachishpa escribishcashnachu ñucanchipash, cangunaman ricuchingapaj cartacunata charina canchi? ¿Na cashpaca, cangunatapash ñucanchita alicachishpa escribishca cartacunata mañanachu canchi?

2Cangunallatami, ñucanchi shungupica, cartata escribishcashna canguichi. Chaimandamari, tucui gentecuna rijsishpa, cartata leyinshna aliguta yachanajun.

3Cangunaca, ñucanchi villajpimi, Cristo escribishca cartashna cashpa, tucuicuna ricunalla canguichi. Na tintahuan escribishca cartashnachu canguichi. Ashtahuangarin causajujlla Taita Diospaj Espirituhuan escribishca cartashnami canguichi. Shinallata na tabla rumipica escribishcachu canguichi. Ashtahuangarin cangunapaj shungupimi escribishca canguichi.

4Cristomanda Taita Diosta yariashpa causanajushpami, cashnaca ninchi.

5Imata ruraitapash, ñucanchi ushaihuanllami rurai ushanchi yashpaca, na causanchu canchi. Ashtahuangarin Taita Dios ushaita carajpillami, imagutapash rurai ushanchi.

6Diosllatami, shuj mushujta ari nishcata villachunga, ñucanchiman curca. Chai mushujca, escribishca tiajujtaca na nijunllu. Ashtahuangarin Diospaj Espiritumandami yachachijun. Escribishca letracunaca huañuchijunmi, ashtahuangarin Diospaj Espirituca causachijmi.

7Diospajta ruranapash, huañuiman apajuj tabla rumicunapi escribishca shimicunaca punchapambami carca. Chai shimicunataca, Moisespaj ñavi punchapamba cajpimi israelcunaca, paicunapaj ñavihuan ricuitapash na usharca. Shina punchapamba ricurijushpapash, chaica chinganallatami carca.

8¿Nachu Diospaj Espíritu caramujuj shimicunata villajunaca, ashtahuan punchapamba canga?

9Shinallata ninanda llaquichi tucunapachami nishpa villajuj shimicunapash, punchapambami ricurin. Taita Diosmi imatapash cashcatapacha rurashcatashna chasquin nishpa villajuj shimicarin, ashtahuan yali juyaillagumari.

10Shinallata punda punchapamba chai shimicunata cunambi villajujca, ashtahuan punchapamba shimihuan ricujpica, chaicunaca yangallatami.

11Chai chinganalla shimicunapash, punchapambagumi carca. Ashtahuangarin cunambi villashca shimicunami, ashtahuan punchapamba causajungalla.

12Chaita yariajlla causanajushpami, imatapash na manllashpa villanajunchi.

13Moisesca, chai punchapamba chingajujta israelcuna ama ricuchunmi, paipaj ñavita telahuan quilparishpa punchapamba ricurijushca. Ñucanchica, na chashna quilparijchu canchi.

14Ashtahuangarin imashpa shina quilparijujtapash, israelcunaca na yachai ushashcachu. Chaimandami, Dioshuan punda ari ninajushca Shimitaca leyinajushpapash, telata na anchuchishcashna cajpi, cunan punllacaman na yachai ushanajun. Chai quilpashcataca, Cristollami anchuchin.

15Moisés mandashcataca, cunan punllacamanmi leyinajun. Chashna cashpapash paicunaca, telahuan shunguta quilpashcashna cashpami, na yachajui ushanajun.

16Ashtahuangarin Apunchi Jesuspajman pipash tigrarijpica, paimi chai telataca anchuchinga.

17Apunchi Jesusca, Espiritumi. Apunchi Jesuspaj Espirituhuan causajpica, chaipimi huatashcashnamanda cacharishca.

18Shinamandami ñucanchica, Apunchi Jesús punchapamba cajtaca, espejopi ñavita ricujunshnalla ricunajunchi. Apunchi Jesuspaj Espirituhuanmi, paishnallapacha punchapamba cachun, ñucanchitaca ashtahuan punchayachijun.