Psalms 118 - Quichua Imbabura Bible

Mandaj Diosmanda quishpirinata chasquishpami, pashi nishpa mañashca

1Mandaj Diosta alicachinguichi, paica aligumi.

Pai llaquinaca, causaita causaipajmi.

2Cunanga, israelcuna: “Dios llaquinaca,

causaita causaipajmi” nichiyari.

3Cunanga, Aaronbaj miraicunapash:

“Dios llaquinaca, causaita causaipajmi” nichiyari.

4Cunanga, Mandaj Diosta manllajcunapash:

“Dios llaquinaca, causaita causaipajmi” nichiyari.

5Ninan llaquihuan cashpaca, Mandaj Diostami mañajurcani.

Mandaj Diosca ñucata uyashpami, ali pushtupi churahuarca.

6Mandaj Diosca ñucahuan cajpimi, maijan

runa ñucata llaquichinatapash na manllasha.

7Mandaj Diosca, ñucahuanmi.

Ñucata ayudaj puracunapaj chaupipimi.

Chashna cajpimi, ñucata na ricunayachij runacunataca,

ñuca munashcashna llaquita apanajujta ricujusha.

8Runata yariashpa causangapaj randica,

Mandaj Diosta yariashpa causanami ashtahuan ali.

9Mandajcunata yariashpa causangapaj randica,

Mandaj Diosta yariashpa causanami ashtahuan ali.

10Tucui llactacunapi causajcunami,

ñuca muyundipi shayarimurca.

Ashtahuangarin ñucarami, Mandaj

Diospaj shutipi tucuchisha.

11Muyundi shayarishpami, ñucataca chapanajurca.

Ashtahuangarin ñucarami, Mandaj

Diospaj shutipi tucuchisha.

12Balun chuspicunashnami chaupipi churahuarca.

Casha rupajunshnami, ninanda fiñanajuhuarca.

Ashtahuangarin ñucarami, Mandaj

Diospaj shutipi tucuchisha.

13Ñuca urmachunmi, shinllita t'angahuarcangui.

Ashtahuangarin Mandaj Diosmi ayudahuarca.

14Ñucata shinllichij, ñuca candana Mandaj Diosmi.

Paimi ñucata quishpichin.

15Imatapash cashcatapacha rurajcunapaj carpacunapica,

ninanda cushijushpa caparinajujpash, quishpichishcamanda

candanajujpashmi uyarin.

Mandaj Diospaj ali lado maquica,

jatun alicunatami ruran.

16Mandaj Diospaj ali lado maquica,

jatun ushaitami charin.

Mandaj Diospaj ali lado maquica,

ninan shinllicunatami ruran.

17Na huañushachu, ashtahuangarin causashami.

Mandaj Dios imatalla rurashcacunatapash parlashami.

18Mandaj Diosca, shinllitapachami llaquichihuarca.

Shina cashpapash huañuchunga, na saquihuarcachu.

19Imatapash cashcatapacha rurangapaj

yaicuna punguta pascapaichi.

Chaita yaicushpami, Mandaj Diosta alicachijusha.

20Cai punguca, Mandaj Diospajmi.

Cai pungutami, imatapash cashcatapacha

rurajcunaca yaicunajunga.

21Ñucata uyashcamandami, candapash alicachijusha.

Canmi ñucataca quishpichihuarcangui.

22Huasichijcuna nalicachishpa shitashca rumillatami,

huasichi callaringapaj huasi pirca tigranapi

churana jatun rumi tucushca.

23Mandaj Diosmi cashnataca rurashca.

Cashna rurashcata ricushpaca manllarinchimi.

24Cunanga, Mandaj Dios alicunata rurashca punllami.

Paihuanmi, ninanda cushijushunchi.

25Mandaj Dioslla, cunanda quishpichihuayari

nishpami ninanda mañapani.

Mandaj Dioslla, cunanda ñucanchitaca tucuipi

alipi llujchihuayari nishpami ninanda mañapani.

26Mandaj Diospaj shutipi shamujca,

bendiciai tucushca cachun.

Mandaj Diospaj huasimandapachami,

cangunataca bendicianchi.

27Mandaj Diosmi, Taita Diospacha.

Paimi, ñucanchiman michaguta curca.

Paiman carashca huañuchina animalcunataca,

altar cachucunapi cabiahuan huataichi.

28Canga, ñuca Taita Diosmi cangui, candami alicachijusha.

Ñuca Taita Dioslla, candallami jatunyachijusha.

29Mandaj Diosta alicachinguichi, paica aligumi.

Pai llaquinaca, causaita causaipajmi.