JOB 27 - Quichua Imbabura Bible

Job runaguca, nalicunatami llaquichinga nishcami

1Job runaguca, punda villashcata yarichishpaca, cashnami nijurca:

2“Ñuca japinata quichuj Taita Diosca causajumbachami. Ñuca almata llaquichij, Tucui Ushaita Charij Diosca causajumbachami.

3Ñuca alma ñucapi tiashca punllacunacaman, Taita Dios cushca samai ñuca singapi tiashcacamanga,

4ñuca shimihuanga, napacha ima nalitapash rimashachu. Ñuca jallupash, umachij shimicunataca, napacha rimangachu.

5Cangunataca, ima juchachinapash illajmi canguichi ninaca, ima horaspash ama chayachun. Ashtahuangarin huañungacamanmi, ñucaca ima pandatapash na rimasha.

6Imatapash cashcatapacha ruranataca chaririajunimi, napacha cacharishachu. Ñuca causai tucui punllacunapica, ñuca shunguca napacha juchachihuangachu.

7Ñucata fiñaj runaca, Diosta na manllaj runashna cachun. Ñucata na ricunayachij runapash, nalita ruraj runashna cachun.

8Taita Dios causaita quichujpica, imatalla ninanda shuhuashca cashpapash, Diosta na manllaj runaca, ¿imatashi shuyanga?

9¿Paita jatun llaqui japijpi, ninanda capashpa pai mañajtaca Taita Diosca uyangachu?

10¿Paica, Tucui Ushaita Charij Diosmandaca cushijungachu? ¿Paica, Taita Diostaca tucui punllacuna mañajungallachu?

11Taita Diospaj maquihuan imatalla rurajtaca, ñucami cangunaman ricuchisha. Tucui Ushaita Charij Dios imata yarijujtaca, na pacashachu.

12Uyaichi, cangunaca tucuicunami ricushcanguichi. ¿Imashpata yapapacha yangacuna tucunguichi?

13Diosta na manllaj runaman cunatallata Taita Dios cunapash, nalita rurashpa llaquichijcuna Tucui Ushaita Charij Diosmanda japinapash caicunami:

14Paipaj huahuacuna ninanda mirashpaca, espadapi huañuchi tucungapajllami canga. Paipaj uchilla huahuacunapash, napacha vijsa pactajta micunajungachu.

15Pai puramanda huaquin puchushcapash, ñapash huañushpami pambai tucunga. Sapalla quedaj huarmicunapash, paicunamandaca na huacanajungachu.

16Ñutu alpatashnami, culquitaca mundunanga. Churajunacunataca, turutashnami ashtacata mirachinga.

17Pai chashna mirachishcataca, imatapash cashcatapacha ruraj runami churajunga. Ima nalita na ruraj runacunami, culquitapash chaupirinajunga.

18Paipaj huasipash, polilla huasichishcashnami canga. Cuidaj runa rurashca chugllashnami canga.

19Ninan charij runaca, puñungapaj siririshpaca, na cutin jataringachu. Ñavita pascajpica, imapash na tiangachu.

20Manllanayai yacu shamujpishnami, jatun manllai japinga. Jatun acapana, tuta shamushpami urmachinga.

21Rupajlla huaira jatarishpami apanga. Ninan huairahuan tamia jatarishpami, pai tiajushca pushtumandaca anchuchinga.

22Taita Diosca, pai nalita rurashcata na cungashpami, ninandapacha llaquichinga. Paica, Diospaj maquimandaca pacajungapajmi munanga.

23Paita ricushpaca, maquitami huactarinajunga. Chai pushtumandallatami silbanajunga.

Blog
About Us
Message
Site Map

Who We AreWhat We EelieveWhat We Do

Terms of UsePrivacy Notice

2025 by iamachristian.org,Inc All rights reserved.

Home
Gospel
Question
Blog
Help