2 REYES 3 - Quichua Imbabura Bible

Israel llactataca, Joram shuti runami mandajushca

1Jatun mandaj Josafat shuti runaca, chunga pusaj huatata Judá llactata ña mandajujpimi, Acab runapaj churi Joram shuti runaca, Israel llactata mandai callarirca. Paica, chunga ishcai huatatami, Samaria pueblopi mandajurca.

2Paica, Mandaj Diospaj ñaupajpica nalitami rurarca. Shina rurashpapash, na paipaj taitashna, paipaj mamashna rurarcachu. Paica, paipaj taita rurachishca chai rurashcalla Baal shuti dioscunataca anchuchircami.

3Shina cashpapash Nabat shuti runapaj churi Jeroboam runa, israelcunata juchacunata rurachishca, chai juchacunatami rurashpa catijurca. Chai juchacunamandaca, napacha anchurircachu.

Moabitacunata mishanatami, Eliseoca villashca

4Moab llactata jatun mandaj, Mesa shuti runaca, ashtaca animalcunatami charirca. Paica, Israel llactata jatun mandaj Acab shuti runamanmi, patsaj huaranga maltun llamata, nara rutushca patsaj huaranga jari llamata cun carca.

5Shina cashpapash Acab runa huañujpica, Moab llactata jatun mandajca, Israel llactata jatun mandajtaca na cazurcachu.

6Chaimandami jatun mandaj Joram shuti runaca, Samaria pueblomanda rishpa, tucui israelcuna alichirishcata ricushpa yalijurca.

7Chai jipaca, Judá llactata jatun mandaj Josafat shuti runamanmi, cashna nichun cacharca: “Moab llactata jatun mandajmi, ñucata na cazuhuan. Canga, ¿Moab llactapi causajcunahuan macanajungapaj, ñucahuan ringuimanllu?” nichunmi cacharca.

Shina nijpimi Judá llactata jatun mandajca cashna nirca: “Ari, rishallami. Ñucapash, cambash shujllashnallami canchi. Ñuca gentecunapash, cambaj cashcashnallatami, ñuca caballocunapash cambaj cashcashnallatami” nircami.

8Shinallata Josafat runaca: “¿Maijan ñandashi rishun?” nijpimi, Joram shuti runaca: “Edom llactapi tiaj jichushca pamba ñandami rishun” nirca.

9Chai jipaca, Israel llactata jatun mandajpash, Judá llactata jatun mandajpash, Edom llactata jatun mandajpashmi llujshishpa rinajurca. Jichushca pambata muyushpa ña canchis punllata ñanda rinajujpillatami, paicunata catishpa rinajuj soldadocunapajpash, animalcunapajpash yacu tucurirca.

10Chaimandami Israel llactata jatun mandajca, cashna nirca:

—¡Uyaichi! Quimsandi cai jatun mandaj ñucanchitaca, moabitacunapaj maquipi churangapajmi, Mandaj Diosca pushamushca yarin— nircami.

11Shina nijpimi Josafat runaca, cashna nirca:

—Mandaj Dios ima nijtapash tapushpa yachangapaca, ¿nachu caipica, Mandaj Dios ima nishcata villaj tian?— nircami.

Shina nijpimi, Israel llactata jatun mandajta servij puramanda shuj runaca:

—Safat runapaj churi Eliseomi caipi causan. Paica, Eliasta servijmi carca— nirca.

12Shina nijpimi, Josafat runaca:

—Paica, Mandaj Dios ima nishcata villanata charingami— nirca.

Shina nishpami, Israel llactata jatun mandajpash, Josafat runapash, Edom llactata jatun mandajpash Eliseopajman urai rinajurca.

13Chaipimi Eliseoca, Israel llactata jatun mandajtaca cashna nirca:

—Ñucaca canhuanga, ¿imata ricunatata charini? Cambaj taitapaj, cambaj mamapaj villajcunapajman rilla— nircami.

Shina nijpimi Israel llactata jatun mandajca, cashna nirca:

—Na rishachu. Mandaj Diosmi, cai quimsandi jatun mandaj ñucanchitaca, moabitacunapaj maquipi churangapaj tandachimushca— nircami.

14Shina nijpimi Eliseoca, cashna nirca:

—Tucuita Mandaj Diosca causajumbachami, ñucaca paipaj ñaupajpimi cani. Judá llactata jatun mandaj Josafat runata na cazuj cashpaca, candacarin ricuitallapash na ricunayachimanllu carcani.

15Ashtahuangarin cunanga, arpata tocaj shuj runata pushamuichi— nircami.

Chai tocaj runa ña tocajujpimi, Mandaj Diospaj ushaica, Eliseopaj jahuaman shamurca.

16Shinamandami Eliseoca, cashna nijurca:

—Mandaj Diosca, cashnami nin: ‘Cai pugru pambapica, yacu jundachun tauca jatun utujucunata ruraichi.

17Ima huairata, ima tamiata canguna na ricujpipash, cai pugru pambapica, ninandapachami yacu jundanga. Shina jundajpimi cangunapash, cangunapaj caballocunapash, cangunapaj animalcunapash yacuta ufianguichi ninmi Mandaj Diosca.

18Chaica, Mandaj Diospaj ñaupajpica, ashagupajllami canga. Shinallata moabitacunatapashmi, cangunapaj maquipi churagrin.

19Chaimandami, jatun pircahuan muyundi jarcashca tucui pueblocunata, juyailla tucui huasicunatapash urmachinguichi. Shinallata tucui ali quirucunatapashmi, fitishpa shitanguichi. Yacu llujshijuj tucui pugyucunatapash quilpashpami saquinguichi. Ali fucuj tucui alpacunatapash, rumicunahuanmi quilpashpa saquinguichi’ ninmi— nijurcami.

20Tutamandata animalta Diosman cushpa huañuchina horaspimi, cashna tucurca: Yacucunaca, Edom llacta ñanda urai shamushpami, chai pambapica ñapash yacu jundarca.

21Moabitacunaca, jatun mandajcuna paicunahuan macanajungapaj vichai shamunajujtaca, tucuicunami yacharca. Chaimandami macanajunata chaira yachajujcunamanda callarishpa tandanajushpaca, Edom llacta linderopi shuyanajurca.

22Cayandi tutamandata moabitacuna jatarishpaca, yacucunapi indi punchalla shitajujpimi, yahuartashnalla pucallata carumanda ricunajurca.

23Chaita ricushpami, cashna ninajurca: “¡Chaica, espadahuan huañuchishca yahuarmari! Chai jatun mandajcunaca, caishuj chaishuj macanajushpami, cumba puracunallata huañuchirishca. Shina cashcamanda cunanga, ¡moabitacuna jacuchi, paicuna imatalla charishcacunata japishunchi!” ninajurcami.

24Ashtahuangarin carpacunata shayachishpa, israelcuna tianajuj pambaman chayajpimi israelcunaca, moabitacunahuan macanajungapaj shayarirca. Shina shayarijpimi moabitacunaca, paicunapaj ñaupajmanda pacajungapaj calparca. Shina calpajpimi, moabitacunataca catishpa huañuchinajurca.

25Pueblocunatapash llaquinayaita tucuchishpami, ali fucuj alpacunapipash tucuicuna rumicunata jundachinajurca. Yacu llujshijuj tucui pugyucunatapashmi quilpanajurca. Tucui ali quirucunatapash shitashpami, Kir-hareset shuti pueblotapash, rumi mundundalla saquinajurca. Huaracahuan macanajujcuna muyundi shayarishpami, chashna tucuchinajurca.

26Moab llactata jatun mandajca, macanajuipi mishai tucujushcata ricushpami, espadahuan macanajunata ali yachaj, canchis patsaj soldadocunata tandachishpa, Edom llactata jatun mandajhuan macanajungapaj rirca. Ashtahuangarin macanajuitaca, na usharcachu.

27Chaimandami, paipaj randi mandangapaj tiarina paipaj punda churita japishpa, paipaj diosman cushpa pirca jahuapi huañuchishpa tucuillata rupachirca. Israelcunahuanga ninandapachami fiñarirca. Chai jipaca, jatun mandajpaj ladomanda anchurishpami, paicunapaj llactaman tigranajurca.