2 CRÓNICAS 35 - Quichua Imbabura Bible

Josías shuti runaca, pascua punllapimi jatun micuita rurashca(2 Rey. 23:21-23)

1Josías shuti runaca, Mandaj Diosta yaringapajmi, pascua punllapi jatun micuitaca, Jerusalenbi rurarca. Callari quillapaj chunga chuscu punllapimi, pascua punllapi Diosman animalta cushpa huañuchinajurca.

2Curacunataca, paicuna ruranatallata ruranajuchunmi churarca. Shinallata Mandaj Diospaj huasipi Diospajta ruranacunapipash, ashtahuan alipachami churarca.

3Tucui israelcunata yachachij, Mandaj Diospajtalla ruraj levitacunatami, cashna nijurca: “Diospajlla arcata, ama ashtahuan huandushpa apangapaca, Davidpaj churi jatun mandaj Salomón runa israelcunata mandajushpa, shayachishca huasi ucupi churaichi. Cunanga, cangunata Mandaj Taita Diostapash, pai agllashca israelcunatapash servishpa causaichi.

4Israel llactata jatun mandaj Davidpash, paipaj churi Salomonbash mandashcashnallata, cangunapaj taitacunapaj familiacuna imashna cashcashnallata, huashan huashan shamushpa, Diosta servingapaj alichirichi.

5Israelcunapaj mirai cangunapaj huauquicunapaj familia purata, mashnapi shicanyachishcashnallata levitacunapaj familia puramandapash, mashnapi shicanyachishcashnallata, Diospaj huasipi quedaichi.

6Chai jipaca, pascua punllapi huañuchina llamata huañuchinguichi. Canguna Diospajlla tucushca jipaca, Moiseshuan villachishca shimipi nijunshnallata, cangunapaj huauquicunapash micuchun alichinguichi” nijurcami.

7Chaipi causanajuj gentecunamambash, jatun mandaj Josías runallatami, animal puramanda llamacunata, maltun jari llamacunata, chivocunata curca. Tucuimandaca, quimsa chunga huaranga animalcunatami curca. Quimsa huaranga huagratapashmi curca. Tucui chaicunataca, chaipi tandanajushca gentecuna pascua punllapi micuchunmi, jatun mandajpaj jazindamandallata curca.

8Shinallata pai jatun mandaj churashca mandajcunapashmi, israelcunaman, curacunaman, levitacunaman, paicunapaj munaillata cunajurca. Taita Diospaj huasipi Diosta servij Hilcías, Zacarías, Jehiel shuti curacunapash, chai pascua punllapi micungapajmi, ishcai huaranga sucta patsaj llamata, quimsa patsaj huagrata curacunaman cunajurca.

9Conanías shuti runapash, paipaj huauqui Semaías shuti, Natanael shuti runacunapashmi cunajurca. Shinallata Hasabías, Jeiel, Josabad shuti runacunapashmi cunajurca. Paicunaca, levitacunata mandajcunami carca. Paicunaca, pascua punllapi huañuchingapajmi, picha huaranga llamata, picha patsaj huagrata, levitacunaman cunajurca.

10Chaicunata rurangapaj alichishca jipami curacunaca, paicuna shayarina pushtupillata shayarinajurca. Levitacunapash, jatun mandaj mandashcashnallatami, Diosta servingapaj huashan huashan yaicunajurca.

11Shina yaicushpami, pascua punllapi huañuchina animalcunata huañuchinajurca. Curacunaca, chai animalcunapaj yahuarta levitacuna cujpimi tsirapachinajurca. Levitacunami animalcunataca lluchunajurca.

12Chai jipami, Moisés escribishca libropi nijunshnallata, israelcunapaj familiacuna imashna shicanyashcashnallata, tucuillata rupachina animalcunamanda japishpa, asha asha caranajurca. Huagracunata huañuchishpapash, shinallatami ruranajurca.

13Chai jipami, mandashcapi nijunshnallata, pascua punllapi huañuchishca animalcunapaj aichataca cusanajurca. Ashtahuangarin Diospajlla cachun carashcataca mangacunapi, jatun pailacunapi, sartengunapi yanushpami, tucui gentecunaman ucha caranajurca.

14Chai jipami levitacunaca, paicuna micuna cashcataca, curacunamambash alichinajurca. Aaronbaj mirai curacunaca, tutayangacamanmi animalcunatapash, viracunatapash Diosman cushpa tucuillata rupachinajurca. Levitacunaca paicunapash, Aaronbaj mirai curacunapash, japina cashcatallatami alichinajurca.

15Shinallata Asaf shuti levitapaj miraipura chunga ishcai candajcunapash, paicunapaj pushtupillatami carca. David, Asaf, Hemán shuti runacunapash, Dios ricuchishcata jatun mandajman villaj Jedutún runapash mandashcashnallatami, chaipi carca. Pungupi cuidajcunapash, tucui pungucunapimi cuidanajurca. Paicunaca, paicunapaj huauqui levitacuna paicunaman micunata yanunajujpimi, paicuna Diospajta ruranajushcamandaca, maimambash na anchurinajurca.

16Shinami chai punllapica, Mandaj Diosta servingapaj tucuita alichinajurca. Pascua punllapi cushijushpa micuita rurangapajpash, chai punllapi micungapaj huañuchishca animalcunata, Mandaj Diospaj altarpi tucuillata rupachingapajpash, jatun mandaj Josías mandashcashnallatami alichinajurca.

17Chaipi tandanajushca israelcunaca, chai punllacunapimi pascua punllapi cushijushpa micunajurca. Shinallata levadura illaj tandata micuna jatun fiestatapashmi, canchis punllacaman ruranajurca.

18Israel llactapica, pascua punllapi micuitaca, Dios ima nishcata villaj Samuel huañushcamandapacha, ima horallapash na chashna ruranajurcachu. Israel llactata maijan jatun mandajpash, chai pascua punllataca, jatun mandaj Josías shuti runa rurashcashnaca na rurarcachu. Paica curacunata, levitacunata, tucui Judá llactapi, Israel llactapi, Jerusalenbi causajcunata tandachishpami, chashna rurarca.

19Chai pascua punllapi micuitaca, ña chunga pusaj huatata Josías mandajujpimi ruranajurca.

Josías shuti runa huañushcatami villajun(2 Rey. 23:28-30)

20Tucui chaicunata rurashca jipa, Mandaj Diospaj huasitapash Josías alichishca jipami, Egipto llactata jatun mandaj Necao shuti runaca, Eufrates shuti jatun yacu ladopi tiaj Carquemis shuti pueblopi causajcunahuan macanajungapaj vichai shamurca. Chaimanmi, Josías shuti runaca paihuan macanajungapaj llujshirca.

21Necao shuti runaca, villajcunatami cashna nishpa cacharca: “Judá llactata mandajlla, ¿ñucaca, canhuanga imata ricunatata charini? Cunanga, canhuan macanajungapaca, na shamushcanichu. Ashtahuangarin ñucahuan macanajungapaj munaj huasi ucu puracunahuan macanajungapajmi shamushcani. Taita Diosllatami, ñucataca ucha ri nihuarca. Taita Dios mandashcata jarcanataca saqui, paica ñucahuanmi. Pactarallapash paica candara tucuchinman” nichunmi cacharca.

22Ashtahuangarin Josías runaca, na saquishpa rircachu. Paica, shuj churajunata churajushpami, paihuan macanajugrirca. Necao shuti runa rimashca shimicunataca na cazurcachu. Necao shuti runaca, Taita Dios rimashcatami villajurca. Josías runaca, Meguido shuti pambapi macanajungapajmi shamurca.

23Flechacunata shitajcunami, jatun mandaj Josías runataca, flechacunahuan shitarca. Chaimandami jatun mandajca, paipaj soldadocunataca cashna nirca: “Ninandapacha chugrishcami cani, caimanda anchuchihuaichi” nircami.

24Shina nijpimi paita servijcunaca, chai carretamanda llujchishpa, pai charishca chaishuj carretapi churanajurca. Shina churashpa Jerusalenman apajpimi, paica chaipi huañurca. Paitaca, paipaj ñaupa taitacunata pambashca utuju ladopillatami pambarca. Josías runa huañushcamandaca, Judá llactapi tucui causajcunapash, Jerusalenbi causajcunapashmi ninanda llaquirinajurca.

25Jeremiasca, Josías runa huañushcata yarishpami huacajurca. Candanata yachaj tucui jaricunapash, huarmicunapash cunan punllacamanmi, Josías huañushcamanda yarishpa yarishpa huacana shimicunata candanajun. Israelcunaca, maijan huañui tiajpipash, chai shimicunatallami yarishpa yarishpa huacanajun. Chai shimicunaca, “Huacana Shimicunata” escribishca libropimi tiajun.

26Ashtahuan imatalla Josías runa rurashcapash, Mandaj Dios mandashcapi escribishcashnallata, shujcunata llaquishpa paicunaman alita rurashcapash,

27punda punllacuna, jipa punllacuna pai imatalla rurashcacunapash, Israel llactata, Judá llactata jatun mandajcuna imatalla rurashcacunata escribishca libropimi tiajun.