Psalms 83 - Quichua Imbabura Bible

Israelcunata fiñajcunata tucuchipai nishpa, Diosta mañashcamiAsaf shuti runa rurashca candana Salmomi.

1Taita Dioslla, ama upalla saquipaichu.

Taita Dioslla, ama chulunlla, casilla saquipaichu.

2Ricui, canda fiñajcunaca,

león huacanshnami caparinajun.

Canda na ricunayachijcunaca,

umata alsashcami jariyashca purinajun.

3Can agllashcacunata fiñashpami, umachingapaj

alipacha yarishpa pacalla tapurinajushca.

Can cuidajpi causajcunata llaquichingapajmi,

huashalla yarinajushca.

4Paicunaca cashnami ninajushca:

“Ama llacta tucuchun, tucuchingapaj shamuichi.

Israelcunapaj shutita ama

yarinajuchun tucuchishunchi” ninajushcami.

5Shujllashnalla tucui shungu tandanajushpami,

canda llaquichingapaj ari ninajushca.

6Carpacunapi causanajuj edomitacuna,

ismaelitacuna, moabitacuna,

agarenocunapashmi tandanajushca.

7Shinallata Gebal llactapi causajcuna,

amonitacuna, amalecitacuna, filisteocuna,

Tiro shuti pueblopi causajcunapashmi tandanajushca.

8Shinallata asiriocunapashmi, paicunahuan tandanajushca.

Paicunami Lot runapaj miraicunataca,

rigrashna ayudanajushca. Selah

9Paicunataca madianitacunatashna,

Sísara runatashna rurapairi.

Cisón shuti jatun larca yacu ladopi, Jabín

shuti runata huañuchishcashnallata huañuchipairi.

10Paicunaca, Endor pueblopimi huañurca.

Paicunaca, pambapi shitashca

huanushnami tucurca.

11Paicunapaj soldadocunata mandajcunataca,

Oreb shuti, Zeeb shuti runacunatashna huañuchipairi.

Zeba shuti, Zalmuna shuti runacunatashna,

paicunata mandajcunataca, tucuillata tucuchipairi.

12Paicunaca: “Taita Dios causajuj pushtucunataca,

ñucanchipaj cachun japishunchi” ninajushcami carca.

13Ñuca Taita Dioslla, paicunataca

jatun acapanatashna cachapairi.

Huaira pundapi rijuj fangacunatashna cachapairi.

14Paicunataca, sachata rupachij ninashna,

bosqueta ninanda rupajuj ninashna tucuchipairi.

15Cambaj ninan huaira tamiahuan

catiriashpa, chashna llaquichipairi.

Cambaj jatun acapanahuan manllachipairi.

16Mandaj Dioslla, can Diosta mascanajuchun

paicunapaj ñavitaca, pingaihuan quilpanshna saquipairi.

17Causaita causaicaman pingaichi tucushpa,

musparishpa pandanajuchun.

Alicachi tucushcata huaglichi tucushpa tucurinajuchun.

18Cambaj shutica, Mandaj Dios shuti cajta,

jahua pachapi causajuj can Dioslla, tucui cai

pachata mandajujta yachanajuchun, chashna rurapangui.