Psalms 69 - Quichua Imbabura Bible

Ninan llaquihuan cashpa caparishpa mañashcamiLirio sisa nishca tonopi, candajcunata mandaj candachijuchun, David rurashca Salmomi.

1Taita Dioslla, quishpichihuayari.

Yacucunaca ñuca almata tucuchingapajmi,

jahuacaman quilpahuashca.

2Maipi shayaritapash na ushanalla

turu ucumanmi huashajushcani.

Manllanayai ucu ucu yacucunamanmi huashajushcani.

Ninanda rijuj yacumari apagrihuan.

3Caparijushpapash ña shaijunimari,

ñuca cungapash chaquishcamari.

Ñuca Taita Diosta chapajujpillata,

ñuca ñavipash amsayanmari.

4Yangamanda ñucata millanayachij runacunaca,

ñuca uma ajchatapash yalimari mirashca.

Ñucata fiñajcunaca, ninan ushaita

charijcunamari tucushca.

Yangamanda ñucata tucuchingapaj

munajcunami, chashna tucushca.

¿Napash shuhuashca cashpatachu tigrachisha?

5Taita Dioslla, ñuca juizu illaj

cajtaca, canllata rijsihuanguimi.

Ñuca juchacunaca, cambaj ñaupajpica

na pacallachu.

6Tucuita Mandaj Jatun Dioslla,

canda yariashpa causajcunaca,

ñucamandara pingai tucunman.

Israelcunapaj Taita Dioslla,

canda mañajcunaca, ñucamandara pandarinman.

7Canda juyaimandami, rimai

tucushpa pingai tucurcani.

Ñuca ñavitaca, pandarishcahuan quilpashcashnami cani.

8Ñuca huauquicunapaj ñaupajpipash,

na rijsishca runashnamari carcani.

Ñuca mamapaj churicunapajpash,

na rijsishcashnamari carcani.

9Cambaj huasita ninandapacha juyaimandami huañujurcani.

Pinganayai shimicunata canda rimashpa

nalicachishca shimicunami chugrichihuarca.

10Na micushpa huacajushpami, ñuca

almataca ninanda llaquichircani.

Chaimandami ñucataca, rimashpa pingaichinajurca.

11Cañamutapashmi, ñuca churajunatashna churajurcani.

Chaita ricushpacarin, yarichij

shimicunatami surcunajurca.

12Pueblo pungupi tandanajujcunaca,

ñucata fiñashpami rimanajurca.

Ufiashpa machajcunapash, ñucata candashpami asinajurca.

13Mandaj Dioslla, ashtahuangarin ñucaca,

candallami can llaquina huatacunapi mañajurcani.

Taita Dioslla, canga ninanda llaquijmari capangui.

Canga, na llullashpa quishpichij cashcamanda uyahuayari.

14Cai turumanda llujchihuayari,

ñuca huashajuchunga ama saquihuaichu.

Ñucata na ricunayachij runacunamandapash,

yacu ucucunamandapash cacharichihuayari.

15Ninanda rijuj yacu apachumbash, ama saquihuaichu.

Manllanayai ucu ucu yacucuna

langachumbash, ama saquihuaichu.

Yacuta llujchingapaj allashca jatun utuju

shimita vichashpa langachumbash, ama saquihuaichu.

16Mandaj Dioslla, can llaquinaca aligumari.

Ñuca mañashcata tigrachihuayari.

Canga, ninanda llaquij cashcashnallata ricuhuayari.

17Canda servijmandaca, cambaj

ñavita ama pacapaichu.

Ninan llaquihuanmari cani, ucha uyahuayari.

18Quimirishpa, ñuca almata quishpichihuayari.

Ñucata fiñajcunamanda quishpichihuayari.

19Ñucata rimashpa pingaichijpi, ninanda

pingai tucujujta, ñucata pandachingapaj

rimanajujtaca, canllata yachanguimi.

Ñucata tucui llaquichijcunaca,

cambaj ñaupajpillatami.

20Na cazushpa asishpami, ñuca

shungupica llaquichihuarca.

Chaimandami, ninan llaqui cani.

Maijambash ñucata llaquingapashchari

yashpami causajurcani.

Ashtahuangarin ñucata cushichijca,

pipash na tiarcachu.

Cushichijcunata mascajpipash, shujllapash na tiarcachu.

21Micunapaj randica, jayaj hieltami churamunajurca.

Ñuca yacunayachijpipash, vinagreta

ufiachunmi carahuarca.

22Paicuna jatun micuita rurashcapash,

paicunapaj ñaupajpica lazushna cachun.

Alipaj imata ruranajushcapash,

nitijaringapajlla cachun.

23Paicunapaj ñavitaca, ama ricuchun ñausayachipangui.

Paicunapaj huasha tullucunatapash,

tucui causaipi chujchujujta rurapangui.

24Can fiñarishcataca, paicunapaj

jahuapi talinshna cachamupai.

Can ninanda fiñarishpa llaquichinaca,

paicunata japichun.

25Mandashpa tiajuna paicunapaj huasipash,

llaquinayaita tucuchi tucushca cachun.

Paicunapaj carpacunapipash, pillapash ama causachun.

26Paicunaca, can chugrichishca

runatami catiriashpa llaquichinajurca.

Can ung:uita cachamujpi, nanaihuan

cajtami nalicachishpa parlanajun.

27Paicuna nalita rurashcamandaca,

nalitallata tigrachipairi.

Imatapash cashcatapacha can rurashcata japingapaj,

ama yaicuchunga jarcapailla.

28Paicunaca, causaita causajcunapaj libropi

shutita escribishca libromanda anchuchi tucushca cachun.

Imatapash cashcatapacha rurajcunahuanga,

ama escribichi tucushca cachun.

29Ashtahuangarin ninan llaquihuan causajuj,

imagupash illaj ñucataca, Taita Dioslla,

can quishpichishpa jatarichihuailla.

30Ñucaca, Taita Diospaj shutitaca*, candashpami alicachisha.

Candaca jatunyachishpami alicachisha.

31Shina alicachijpimi Mandaj Diosca, huagrata carashpa

huañuchishcatapash yali cushijunga.

Na cashpaca cachuyu, silluyu shicuta carashpa

huañuchishcatapash yalimi cushijunga.

32Chaita ricushpaca, llaquichi tucushpa

causajcunaca cushijungami.

Taita Diosta mascashpami, cangunapaj

shungupi causaita charinguichi.

33Mandaj Diosca, imagupash

illajcuna mañanajujtaca uyajunmi.

Pai agllashcacuna prezu tianajujpipash,

na yangapi churanllu.

34Paitaca jahua pachapash, cai pachapash,

mama cuchacunapash, chaicunapi tucui imalla

causajcunapashmi, alicachina canguichi.

35Taita Diosmi, Siondaca quishpichinga.

Judá llactapi tiaj pueblocunatapash, cutinmi alichinga.

Chaipi causai callarishpami,

paicunapaj cachun japinajunga.

36Paita servijcunapaj miraicunami,

chai pueblotaca paicunapaj cachun japinajunga.

Paipaj shutita juyajcunami, chaipica causanajunga.