1 SAMUEL 29 - Quichua Imbabura Bible

1Filisteocunaca, tucuilla paicunapaj soldadocunatami Afec shuti pueblopi tandachinajurca. Shinallata israelcunapash, Jezreel pueblo tiaj pugyu ladopimi, carpacunata shayachishpa tianajurca.

2Filisteocunata mandajcunaca, paicunapaj soldadocuna patsajpi, huarangapi tandanajushca shayanajujpimi alichirishca cachun ricushpa yalinajurca. Chashna ruranajujpimi Davidpash, paipaj runacunandi, Aquis shuti jatun mandajta cuidashpa huashata catimunajurca.

3Chaita ricushpami, filisteocunata mandajcunaca: —Cai hebreocunaca, ¿imatata caipica ruranajun?— nishpa tapujpi Aquis runaca, filisteocunata mandajcunataca cashna nirca: —Paica, Israel llactata jatun mandaj Saulta servij Davidmari. Paica, tauca punllacunata, huatacunatapashmi ñucahuan causarca. Ashtahuangarin paitaca, ñucapajman shamushca punllamandapacha cunangaman, ima nalita rurashcatapash na ricushcanichu— nircami.

4Shina nijpimi, filisteocunata mandajcunaca fiñarishpa, Aquis runataca cashna ninajurca: —Cai runacuna ñucanchihuan macanajuiman ama richunga, cayacaman nishpa can maipi churashca pushtumanllata tigrachilla. Chai macanajuipi cashpaca, pactara ñucanchita fiñajcunapaj lado tucushpara, cai filisteo runacunapaj umacunata apashpa, paita mandajpaj ñaupajpi ali ricurigrinman.

5¿Nachu cai Davidta: ‘Saulca, huaranga runacunatami huañuchishca. Davidca, chunga huaranga runacunatami huañuchishca’ nishpa candashpa danzanajurca?— ninajurcami.

6Shina nijpimi Aquis shuti runaca, Davidta cayashpa cashna nirca: —Mandaj Diosca causajumbachami. Canga tucuita yali ali runagumi cangui. Shinallata maiman rishpa cutin tigramushpapash, alitallami rurashpa ñuca carpacunapica causajungui. Ñucapajman can shamushca punllamandapacha, cunangaman ima nalita rurajtapash, candaca na ricushcanichu. Ashtahuangarin caishuj mandajcunapaj ñaupajpimi, nali ricuringui.

7Shina cashcamanda filisteocunata mandajcunata, ama ashtahuan fiñachingapaca, casilla aliguta tigrailla— nircami.

8Shina nijpimi Davidca, Aquis runataca cashna nirca: —¿Imatata rurashcani? ¿Cambajman shamushca punllamanda cunangaman canda servij ñucaca, ima nalita rurashcatata ricushcangui? ¿Imashpata jatun mandaj, ñuca amota fiñajcunahuanga, na macanajugrina cani?— nircami.

9Shina nijpimi Aquis runaca, Davidta cashna nirca: —Canga, ñuca ñaupajpica, Taita Diospaj angelgushna aligu cajtami ñucaca yachani. Ashtahuangarin filisteocunata mandajcunami: ‘Paica, cai macanajuiman napacha ñucanchihuan ringachu’ ninajuhuan.

10Shina cashcamanda cayapaca, tutamandata jatarishpa cambash, canhuan shamushca canda mandajpaj servijcunapash, punllayajhuan ripanguichilla— nircami.

11Shina nijpimi Davidca, paipash, paipaj runacunandi filisteocunapaj llactaman ringapaj tutamandata jatarirca. Shinallata filisteocunapash, Jezreel pueblomanmi rinajurca. Amalecitacunatami, Davidca mishashca

Blog
About Us
Message
Site Map

Who We AreWhat We EelieveWhat We Do

Terms of UsePrivacy Notice

2025 by iamachristian.org,Inc All rights reserved.

Home
Gospel
Question
Blog
Help