Psalms 147 - Quichua Imbabura Bible

Taita Diostaca, Jerusalenman alita rurashcamandami alicachishca

1Mandaj Diosta alicachinguichi.

Ñucanchi Taita Diosman Salmocunata candanaca, alimari.

Paita alicachinaca ali, juyaillagumari.

2Mandaj Diosmi, Jerusalendaca shayachijun.

Israel llactamanda llujchi

tucushcacunatapash tandachimungami.

3Shungu faquirishcacunataca, paimi alichin.

Chugricunatapash huatachishpami alichin.

4Paica, luzerocuna mashna tiajtapash,

cuentashcallami charin.

Tucui chaicunataca, shutipimi cayan.

5Ñucanchi Jatun Diosca jatumbacha,

ninan ushaita charij Diosmi.

Paipaj yachaica, na tucurinllu.

6Mandaj Diosca, na jariyashcacunataca jatumbimi churan.

Paita na manllajcunataca, ninanda

pingaichishpami alpacaman cumuchin.

7Mandaj Diostaca, candashpa alicachinguichi.

Ñucanchi Taita Diostaca, arpata tocashpa candaichi.

8Paimi, jahua pachataca fuyuhuan quilpan.

Paimi, alpamambash tamiachingapaj alichin.

Paimi, urcucunapi jihuacunata viñachin.

9Paimi, animalcuna micushpa causachumbash caran.

Cuervo nishca animalcunapaj huahuacuna

ninanda caparinajujpipash, paimi caran.

10Paica, caballopaj ushaimandaca na cushijunllu.

Ninan shinlli runamandapash, na cushijunllu.

11Mandaj Diosca, paita manllajcunahuanmi cushijun.

Pai llaquichun shuyajcunahuanmi cushijun.

12Jerusalén, Mandaj Diosta alicachiyari.

Sion shuti pueblolla, cambaj Taita Diosta alicachiyari.

13Cambaj pungucunapaj aldabacunata ashtahuan

shinllita churashcamanda alicachiyari.

Cambaj ucupi causanajuj cambaj

huahuacunataca bendiciarcami.

14Paimi, cambaj llactapica casilla causaita caran.

Micuchumbash ashtahuan ali trigotami,

na munangacaman caranga.

15Paimi, paipaj Shimita cai pachaman cachamun.

Paipaj Shimica, ñapash rinllami.

16Paimi rasutapash, milmatashna urmachin.

Casatapash, uchufatashnami talimun.

17Paimi, rasutaca asha asha shitamun.

Chai chiripica, ¿pita puri ushangayari?

18Chaicunataca, paipaj Shimihuan

rimashpami yacuyachinga.

Chai yacucunaca, paipaj huaira fucujpimi jicharinga.

19Jacobopaj mirai israelcunamanmi,

paipaj Shimicunataca villarca.

Pactachinajuchun pai cushca shimicunatapash,

pai yachachishca shimicunatapashmi curca.

20Maijan llactacunahuambash,

chashnataca na rurarcachu.

Pai yachachishcacunatacarin, paicunaca

na rijsinajurcachu.

Mandaj Diosta alicachinguichi.