LEVÍTICO 3 - Quichua Imbabura Bible

Dioshuan ali cangapaj animalcunata carachunmi mandashca

1Dioshuan ali cangapaj cushpa huañuchina animalta apamushpaca, huagra puracunamanda imapash na tucushca jari huagrata, na cashpaca huarmi huagrata, Mandaj Diospaj ñaupajman apamuchun.

2Chai carashca huagrapaj umapi maquita churashpami, Dioshuan tuparina jatun carpa ñaupajpi cungata muchushpa huañuchinga. Yahuartaca, Aaronbaj churi curacunami, altar jahua muyundipi tsirapachinajunga.

3Chai jipami, Dioshuan ali cangapaj cushpa huañuchishca animaltaca, Mandaj Diosman cushpa rupachinshnallata rupachinga. Chunllulicunata quilpashca viratapash, vijsa ucupi tiaj tucui viratapash chashnallatami ruranga.

4Ishcandi riñondapash, chaipillata tiaj viratapash, lomocunapi tiaj viratapashmi rupachinga. Chai riñonhuanllatami, yana shungu jahuapi tiaj chunllulicunapaj viratapash llujchinga.

5Chaicunataca, Aaronbaj churicunami altarpi rupachinajunga. Chaitaca, Diosman cushpa tucuillata rupachingapaj, yamda jahuapi churashca tiajuj animalpaj jahuapi churashpami rupachinajunga. Chaica, Mandaj Diospaj mishquillagu ashnajuchun, rupachishcami canga.

6Ashtahuangarin Mandaj Dioshuan ali cangapaj, llama puracunamanda huañuchina animalta cushpaca, imapash na tucushca jari llamata, na cashpaca huarmi llamata cuchun.

7Maltun llamata cushpaca, Mandaj Diospaj ñaupajpimi cunga.

8Chai llamapaj umapi maquita churashpami, Dioshuan tuparina jatun carpa ñaupajpi cungata muchushpa huañuchinga. Yahuartaca, Aaronbaj churicunami altar jahua muyundipi tsirapachinajunga.

9Chai jipami, Dioshuan ali cangapaj cushpa huañuchishca animaltaca, Mandaj Diosman cushpa rupachinshnallata rupachinga. Chupataca, lomomandapacha tucuillata fitishpami, chunllulicunata quilpashca viratapash, vijsa ucupi tiaj tucui viratapash, shashnallata rupachinga.

10Shinallata ishcandi riñondapash, chaipillata tiaj viratapash, lomocunapi tiaj viratapashmi rupachinga. Chai riñonhuanllatami, yana shungu jahuapi tiaj viratapash llujchinga.

11Chaitaca curami, altar jahuapi rupachinga. Shina micunayaita carashpa rupachishcami, Mandaj Diosman carashpa rupachishca canga.

12Chivota cushpaca, Mandaj Diospaj ñaupajpimi cunga.

13Chai chivopaj umapi maquita churashpami, Dioshuan tuparina jatun carpa ñaupajpi cungata muchushpa huañuchinga. Yahuartaca, Aaronbaj churicunami altar jahua muyundipi tsirapachinajunga.

14Chai jipami, Dioshuan ali cangapaj cushpa huañuchishca animaltaca, Mandaj Diosman cushpa rupachinga. Chunllulicunata quilpashca viratapash, vijsa ucupi tucui viratapashmi chashnallata rupachinga.

15Ishcandi riñondapash, chaipillata tiaj viratapash, lomocunapi tiaj viratapashmi rupachinga. Chai riñonhuanllatami, yana shungu jahuapi tiaj viratapash llujchinga.

16Chaitaca curami, altar jahuapi rupachinga. Shina micunayaita carashpa rupachishcami, Mandaj Diospaca mishquillagu ashnajunga. Tucuilla virami, Mandaj Diospaj canga.

17Cangunaca, maipi causanajushpapash virata, yahuartaca na micunachu canguichi. Tucui causaipi pactachinajuchun cushca shimicunaca, canguna causanajui huatacunapi pactachinajuchun cushcami canga’ nishpa villangui” nijurcami.