JOB 33 - Quichua Imbabura Bible

Eliú shuti runaca, Job runagutami juchachishpa rimashca

1Shinamanda cunanga Job, aliguta yarishpa ñuca rimashcata uyahuai. Ñuca rimashcataca, tucuita ali uyahuai.

2Ricui, cunanga ñuca shimita pascashpami rimagrini. Ñuca cungapi tiajuj jallumi rimagrin.

3Aliguta ñuca yarishca yuyaicunami, ñuca shungupi alita yarishcataca ricuchinga. Ñuca shimica, imatalla yachashcatami, na llullashpa rimagrin.

4Ñucataca, Diospaj Espiritumi rurahuarca. Tucui Ushaita Charij Diospaj samaita fucushpami, causaita cuhuarca.

5Can tigrachi ushashpaca, tigrachihuayari. Imatalla rimanata aliguta yarishpaca, shayarilla.

6Can nishcashnallatami ñucaca, Taita Diospaj randi caipi cani. Ñucapash, alpamanda rurai tucushcallatami cani.

7Ricui, ñuca rimashcacunaca, candaca na manllachingachu. Ñuca maquipash, candaca na llaquichingachu.

8Canga, ñuca uyajtapachami rimarcangui. Cashna nijujtami, candaca uyarcani:

9‘Ñucaca, ima mapapash, ima nalipash illajmi cani. Imata juchachinapash, illajmi cani. Ñucapica, ima nalipash na tianllu.

10Ricuichi, Diosmi ñucata fiñashpa, juchachinata mascahuan. Ñucataca, paita fiñajtashnami ricuhuan.

11Ñuca chaquitapash, caspi utujupi churachishpami canichihuarca. Ñuca imatalla rurajujtaca, tucuitami ricuriajurca’ nircanguimi.

12Ricui, chashna nirijushpaca, imatapash cashcatapachaca na nijushcanguichu. Taita Diosca, runata yali cajtami, canman villagrini.

13¿Imashpata paihuan fiñanajushpa rimarijungui? Pai ali yarijushcataca, imatallapash na villangachu.

14Ashtahuangarin Taita Diosca, runataca cutimbash cutimbashmi riman. Shina cajpipash runami, na yuyaita japin.

15Muscuipipash, muscuipishna tuta ricurishpapashmi riman. Runacunata puñui japijpi, camapi puñunajujpimi riman.

16pai ali yuyaita cushcataca, runacunapaj rinripi uyarijta rimashpami ricuchin.

17Runacuna nalita rurajujta saquichingapaj, jariyashpa jatun tucunajujta anchuchingapajmi, chashna ruran.

18Shina rurashpami huañushpa pambai tucuna utujuman paipaj alma rinamandapash, espadapi huañuchi tucunamandapash quishpichinga.

19Shinallata paipaj tucuilla tullucunapi manllanayai nanaihuanmi, camapillata llaquichin.

20Chai nanaihuan cashpami tandatapash, mishquilla micunatapash, tucui shunguhuan millanayachin.

21Paipaj cuerpoca, chaquishpami tucurin. Punda na ricurishca tullucunapash, jahuallami ricurin.

22Paipaj almaca, pambana utujuman rinallami tucun. Paipaj causaica, huañuchij runacunapajman chayanallami tucun.

23Ali rimanata yachaj puramanda agllashca runa paipaj ladopi cashpami, runa imatalla ruranataca, paipaj randi shayarishpa villanman.

24Chai runaca, cashnami ninman: ‘Taita Diosca, paitaca llaquircami. Huañushcata pambana utujuman, urai rinamandapash cacharichircami. Paica, quishpirinatapash tarircami’ ninmanmi.

25Paipaj cuerpoca, llullu huahuapaj aichashna tucushpami, chairalla viñai cashca punllacunaman tigranman.

26Taita Diosta pai mañajpica, paica juyanmanmi. Paipaj ñavitapash, cushijushpami ricunman. Runataca, imatapash cashcatapacha ruraj cachunmi, cutin tigrachinman.

27Diosca, runacunataca ricuriajunmi. Shuj runa: ‘Ñucaca, juchatami rurashcani. Aliguta rurangapaj randica, nalitarami rurashcani. Ima alitapash na japi ushashcanichu’ ninmanmi.

28Paipaj almataca Taita Diosmi, huañushpa pambana utujuman rinamanda quishpichinga. Paipaj causaipash, michapimi causanga.

29Ricuichi Taita Diosca, runapica tucui chaicunatami, ishcaicaman cashpa, quimsacaman cashpapash, chashna ruran.

30Paica, paipaj alma huañushpa pambana utujuman rinata jarcangapaj, causajcunapaj michahuan punchayachingapajmi, chashna ruran.

31Job, ñuca rimashcata aliguta uyahuai. Can upallayajpica, parlashallami.

32Imatapash aliguta yarijushpaca, tigrachihuailla. Na cashpaca rimahuailla. Candaca, imatapash cashcatapacha ruraj cajta ricuchingapajmi munani.

33Na cashpaca canga, ñucata uyahuailla. Can upallajpica, ali yachaitami canman yachachisha” nijurcami.