2 CORINTIOS 8 - Quichua Imbabura Bible

Diospajlla tucushcacunamanmi, culquiguta caranajushca

1Huauquicuna, panicuna, cangunamanmi caita villangapaj munanchi: Macedonia llactapi tandanajuj crijcunataca, Taita Dios ninandami juyashca.

2Paicuna imashna cajta ricungapaj, jatun llaquicuna japijpipash, ninandami cushijunajurca. Imaguta na charishpapash, carana munaitapacha charishpami ninandapacha caranajurca.

3Paicunaca cushijushpami, paicuna carai ushanaguta caranajurca. Ashtahuan yalishpapashmi caranajurca. Chaitaca, ñucapacha ricushpami villajuni.

4Diospajlla causajcunaman carangapajmi, ninanda munanchi nishpami, carachun saquihuaichi nishpa, ñucanchitaca ninanda mañanajurca.

5Ñucanchica, ashagutallami caranga yarcanchimi. Ashtahuangarin paicunaca, Apunchi Jesustarami punda mandahuai nishpa mañanajurca. Shinallata Taita Dios munashcashnami mandahuaichi nishpa, chai jipaca ñucanchitapash mañanajurca.

6Crijcunata ninanda juyashpa canguna carashcata tandachingapaca, Titomi callarirca. Chaimandami tandachinata tucuchipangui nishpa, aliguta yarichishpa paiman mingarcanchi.

7Shinamandami, cangunaca aligutapacha crishpa, Diospaj Shimitapash yachachishpa, aliguta yachajushpa, imatapash cushijuihuan rurashpa, ñucanchitapash juyanguichi. Imashnami tucuipi aliguta causanguichi, shinallata ninanda juyashpa carachumbash munanchi.

8Mandashpaca, na cashna nijunichu. Ashtahuangarin caishujcuna ninanda cushijushpa carashcata canguna yachachunmi, cashnaca nijuni. Shinallata canguna imata carashpapash tucui shunguhuan juyashpa carashcata yachangapajllami munani.

9Ñucanchi Apunchi Jesucristo ninanda juyajujtaca yachanguichimi. Paica, ninan charij cashpapash, cangunata juyaimandami imagupash illaj tucushpa shamurca. Canguna ninanda charijyachunmi, paica chashna tucurca.

10Cangunapaj ali cachunmi, caitaca yarichijuni. Cangunaca, pundallatami carangapaj tandachinata yarircanguichi. Na caranatalla yarishpami, ashtahuangarin paicunata juyanatapash caina huatamanda callarircanguichi.

11Canguna juyaimanda carangapaj callarishcataca, cunanga pactachinami canguichi. Canguna carai usharishcagutaca, aliguta caranguichilla.

12Maijambash tucui shunguhuan carangapaj munashpa, imagutapash charishcata carajpica, Diosmi chasquijun. Ashtahuangarin imatapash na charishpata carachunga, na mañanllu.

13Caita nishpaca, shujcunaca charijyachun, cangunaca imagupash illaj tucuchunga, na cashna nijunichu.

14Ashtahuangarin cunan huatacunapi canguna charishcataca, paicunapaj imagu illajpipash caranguichilla. Shina carajpimi paicunapash, cangunapaj imagu illajpipash caramunga. Chashna causashpami cangunapash, paicunapash chashnallata charinguichi.

15Escribishcapica cashnami nijun: “Ashtacata pallajpash, na yapa charircachu. Ashagutalla pallajpajpash, na illarcachu” nijunmi.

16Cangunata ñuca yariajunshna yarichunmi, Titopaj shungupipash, Diosca churashca. Shinamandami Taita Diostaca, pashi nijuni.

17Titoca, aliguta yarichishcata uyarcapachami. Paipash ninandapacha ringapaj munashpami, paillata cangunapajman ringapaj llujshi callarirca.

18Titohuanga, shuj huauquitapashmi cachamunajunchi. Chai huauquica, ali villaita maipipash aliguta villaj cajpimi, tandanajuj tucui crijcuna paita alicachishca uyarijun.

19Shina alicachishpami, tandanajuj crijcuna llaquishpa carashca culquita ñucanchihuan tandachishpa purichun, paitaca agllarca. Canguna ali munaihuan carashcata ricuchingapajmi, cashnaca tandachishpa purinchi. Chai carashcata chasquijcunaca, Apunchi Jesustami ninanda alicachinga.

20Cai ashtaca carashca culquita caranajujpi, ama ñucanchita yanga juchachinajuchunmi, taucapura tandachinchi.

21Jatun Diospaj ñaupajpipash, gentecunapaj ñaupajpipash, ama juchachi tucungapaj munashpami, cashna aliguta ruranajunchi.

22Paicunahuanga, chai huauquitapashmi cachamunchi. Paitaca, imatapash aliguta rurajujtami, cutin cutin ricurcanchi. Shinallatami cunanga, paica cangunahuan imatapash cushijuihuan aliguta rurangapaj ashtahuan yariajun.

23Titomanda parlashpaca, ñucapaj cumbami, shinallata cangunapaj ali cachunmi, ñucashnallata aliguta rurajun. Caishuj huauquicunamanda parlashpaca, tandanajuj crijcunaman villashpa purishpami, Cristotapash ninan juyaillaguta alicachinajun.

24Paicunataca, canguna aliguta cazunajujta, shinallata ñucanchipash cangunata na yangamanda juyanajujta, tandanajuj crijcunaman ricuchipanguichi ninimi.