LEVÍTICO 16 - Quichua Imbabura Bible

Juchamanda animalta Diosman cuna punllatami villajun

1Aaronbaj ishcai churicuna huañushca jipami, Mandaj Diosca Moisesman villarca. Paicunaca, Mandaj Diospajman quimirishcamandami huañurca.

2Mandaj Diosca, Moisestaca cashnami nijurca:

“Cambaj huauqui Aarón ama huañuchunga: ‘Telahuan jarcashca ñucapajlla shicanyachishca ucupi arcata quilpashca ñaupajmanga, ama ima horapash yaicunguillachu’ nishpa villangui. Ñucaca, arcata quilpashca vichaipimi fuyupi ricurisha.

3Aaronga, caicunata apashpami ñucapajlla ucuman yaicunga. Juchamanda cungapaj shuj shicuta, tucuillata rupachingapaj shuj jari llamata apashpami yaicumunga.

4Linota rurashca ñucapajlla shicanyachishca, túnica nishca jahualla churajunata churajushpa, linota rurashca calzonda ucuman churajushpami yaicunga. Shinallata lino cintahuan chumbilishpami umapipash, linota rurashca mitra nishcata churajushpami yaicunga. Chai churajunaca, ñucapajlla shicanyachishcami. Chai churajunacunataca, aliguta armashca jipami churajunga.

5Aaronga, tandanajushca israelcunapaj juchamanda ñucaman cungangapaca, ishcai chivotami japinga. Shinallata ñucaman cushpa tucuillata rupachingapaca, shuj jari llamatami japinga.

6Aaronga, paipaj juchamanda ñucaman cuna jari shicuta apamuchun cachashpami, ñucahuan ali tucungapaca, paipaj juchamandapash, paipaj huasi ucu purapaj juchamandapash cujunga.

7Chai jipami, ishcai jari chivota japishpa, ñucahuan tuparina jatun carpapaj ñaupajpi, Mandaj Dios ñuca ñaupajpi cujunga.

8Chai ishcai chivomandami, Aaronga suerteta ruranga. Maijan chivota, Mandaj Dios ñucaman cunata, maijan chivota Azazel nishcaman cunata yachangapajmi, chai suerteta ruranga.

9Chai suerteta rurajpi Mandaj Dios ñucapaj urmajpimi Aaronga, chai chivota apamuchun cachashpa, chaitaca juchamanda ñucaman cunga.

10Ashtahuangarin suerteta rurajpi Azazel nishcapaj urmashca chivotaca, juchata paipi apachishpa, ñucahuan ali tucungapajmi, Mandaj Dios ñuca ñaupajpajman causajta apamunga. Chai jipami, chai chivotaca Azazelman cushpa, jichushca pambapi cacharichun cachanga.

11Aaronga, paipaj juchamanda ñucaman cuna shicutaca apamuchun cachashpami, ñucahuan ali tucungapaca, paipaj juchamandapash, paipaj huasi ucu purapaj juchamandapash ñucaman cunga. Shinallata paipaj juchamanda cushca shicutaca, cungata muchushpami huañuchinga.

12Chai jipami Aaronga, ninayashpa rupajuj carbonhuan junda inciensota rupachinataca, Mandaj Dios ñuca ñaupajmanda japinga. Shinallata mishquillagu ashnajuj cutashca jambicunatapash, ishcandi maqui jundata japishpami, telahuan jarcashca ñucapajlla shicanyachishca ucuman apamunga.

13Mishquillagu ashnajuj chai jambitaca, Mandaj Dios ñuca ñaupajpi nina jahuapi churashpami rupachijunga. Chai cushnimi, imashna causanata ñuca yachachishca shimicunata alichina arca tapa jahuata quilpanga. Aarón ama huañuchunmi, chashna quilpanga.

14Chai jipami Aaronga, shicupaj yahuarta paipaj maqui dedohuan japishpa, indi llujshimuj ladotalla tapa jahuapi tsirapachinga. Chai tapa ladomanmi, paipaj maqui dedohuan chai yahuarta japishpa, canchiscaman tsirapachinga.

15Chai jipami jari chivotaca, israelcunapaj juchamanda cushpa, cungata muchushpa huañuchinga. Chai chivopaj yahuartapash, telahuan jarcashca ñucapajlla shicanyachishca ucumanmi apamunga. Chai yahuartaca, jari shicupaj yahuarhuan imashna rurashcashnallatami ruranga. Chai yahuartaca, tapa jahuapipash, tapa ñaupajpipachami tsirapachinga.

16Israelcuna mapacunata rurashcamanda, paicuna na cazushpa nalicunata rurashcamanda, tucui juchacunata paicuna rurashcamandapash, shinami ñucapajlla ucutapash, mapa illajta ruranga. Ñucahuan tuparina jatun carpatapash, chashnallatami ruranga. Ñucapaj chai carpaca, paicunapaj chaupipi, paicuna mapayashca chaupipimi shayajun.

17Juchamanda cungapaj ñucapajlla huasiman Aarón yaicumujujpica, ñucahuan tuparina jatun carpapica, maijan runapash na chaipichu canga. Paipaj juchamandapash, paipaj huasi ucu puracunapaj juchamandapash, tandanajushca tucui israelcunapaj juchamandapash, ñucaman cushpa llujshingacaman pipash na chaipi cangachu.

18Chai ucumandaca, Mandaj Diospaj ñaupajpi tiajuj altar ladomanmi llujshinga. Chai altarpimi, juchamanda ñucaman cunga. Shicupaj yahuarta, jari chivopaj yahuarta japishpami, chai altarpaj cachucunapi muyundi javinga.

19Altar jahuapica, chai yahuartallatami paipaj maqui dedohuan japishpa, canchiscaman tsirapachinga. Shina rurashpami, israelcuna juchacunahuan mapayashcataca, mapa illajta rurashpa, ñucapajlla cachun ruranga.

20Ñucapajlla ucutapash, ñucahuan tuparina jatun carpatapash, altartapash, ima mapapash illajta ruraita ña tucuchishpaca, caishuj causaj jari chivotami apamuchun cachanga.

21Aaronga, chai causaj jari chivopaj umapimi, paipaj ishcandi maquita churanga. Shina churashpami, israelcuna nalicunata rurashcatapash, paicuna na cazushpa nalicunata rurashcatapash, paicunapaj tucui juchacunatapash, chivopaj jahuapi churashpa villajunga. Tucui israelcunapaj juchacunata chai chivopaj uma jahuapi shina churashpami, chai jari chivotaca, jichushca pambapi cacharichun, chaipajlla agllashca runata cachanga.

22Chai jari chivomi, israelcuna nalicunata rurashcata paipaj jahuapi apashpa, pipash na causanajuj pambaman ringa. Chai jari chivocunataca, jichushca pambata richunmi saquinga.

23Chai jipami Aaronga, ñucahuan tuparina jatun carpaman shamushpa, ñucapajlla ucuman yaicumungapaj churajushca linota rurashca churajunata llujchinga. Shina llujchishpaca, chaipillatami churanga.

24Chai jipami ñucapajlla huasipi, shuj pushtupi armanga. Paipaj churajunacunata churajushpa canllaman llujshishpami paimandapash, israelcunamandapash, animalta ñucaman cushpa tucuillata rupachijunga. Shinallata paipaj juchamandapash, israelcunapaj juchamandapashmi, animalta ñucaman cushpa huañuchinga.

25Juchamanda cushpa huañuchishca animalpaj virataca, altarpimi rupachinga.

26Shinallata Azazel nishcaman jari chivota apashpa rij runapash, pai churajushcata tajshachun. Shinallata paipash armachun. Chai jipami, carpacunata shayachishca tianajuj pushtuman yaicumunga.

27Shinallata juchamanda cushpa huañuchishca shicutapash, jari chivotapash, carpacunamanda canllamanmi llujchinga. Chai animalcunapaj yahuartami, juchamanda Diosman cungapaj, Diospajlla ucuman apamurca. Shinallata caracunata, aichacunata, huanucunataca, ninapimi rupachinajunga.

28Chaicunata rupachij runaca, pai churajushcacunata tajshachun. Shinallata paipash armachun. Chai jipami, carpacunata shayachishca pushtuman yaicumui ushanga.

29Caitami, tucui causaipi pactachinajuchun ñuca cushca cajpi cashna rurana canguichi: Canchis quillapaj chunga punllapica, imatapash na micushpa, tucui almahuan llaquirishpami, imatapash na rurashpa samana canguichi. Cai llactapillata huacharishca cashpapash, shuj llactamanda shamushpa cangunahuan causajuj runa cashpapash, chashnallatami rurana canguichi.

30Chai punllami, cangunapaj juchamanda animalta Diosman cushpa huañuchinga. Chaimandami cangunaca, Mandaj Diospaj ñaupajpica, tucui juchata anchuchi tucunguichi.

31Chai punllami cangunapaca, imatapash na rurashpa samana punlla canga. Cangunapaj tucui almahuanmi, llaquirina canguichi. Caica, tucui causaipi pactachinajuchun ñuca cushca shimicunami.

32Aceiteta talishpa javi tucushca curami, juchamanda animalta cunga. Paica, taitapaj randi cura cangapajmi, Diospajlla shicanyachi tucushca. Paica, chaipajlla shicanyachishca lino churajunatami churajunga.

33Chaicunata churajushpaca, ñucapajlla shicanyachishca jucha illaj ucutapash, ñucahuan tuparina jatun carpatapash, altartapashmi ima mapapash illajta ruranga. Shinallata curacunapaj juchamandapash, tandanajushca tucuilla israelcunapaj juchamandapashmi, animalcunata cushpa huañuchinga.

34Tucui israelcunapaj juchacunamanda, huatapi huatapi shuj viajeta, animalta Diosman cungapaca, caitami tucui causaipi pactachinajuchun, ñuca cushca shimicuna canga” nijurcami.

Moisesca, Mandaj Dios mandashcashnallatami rurajurca.