Адкрыццё Яна Раздзел 3 - Кн?г? Святога П?сання - Б?бл?я - Б?бл?я — пераклад Чарня?скага (выданне 2017 года)（BelBC17）

1І анёлу царквы, што ў Сардах, напішы: гэта, вось, кажа Той, Які мае сем духаў Божых і сем зорак: ведаю ўчынкі твае, што маеш імя, што жывы, ды ёсць мёртвы.

2Чувай і ўзмацняй рэшту, якая мелася загінуць, бо не знаходжу ўчынкаў тваіх выкананымі перад Богам Маім.

3 Мц. 24:42; Лк. 12:39; 1Тэс. 5:2; 1Цім. 6:20; 2Пёт. 3:10 Дык памятай, як ты атрымаў і чуў, і захавай, і навярніся. Бо калі не будзеш чуваць, прыйду да цябе, як злодзей, і не будзеш ведаць гадзіны, у якую прыйду да цябе.

4 Як. 1:27; Юды 23 Але, вось, маеш у Сардах некалькі імёнаў, якія не плямілі вопраткі свае, яны будуць хадзіць са Мною ў белі, бо яны дастойныя.

5 Вых. 32:32, 33; Пс. 69:28; Лк. 10:20; Плп. 4:3 Хто пераможа, апранецца ў вопратку белую, і не выкраслю імя яго з кнігі жыцця, і прызнаю імя яго перад Айцом Маім і на віду ў анёлаў Яго.

6Хто мае вуха, пачуй, што Дух кажа цэрквам.

7 Іс. 22:22; Ёў 12:14; Мц. 16:19; Ян. 14:6 І анёлу царквы, што ў Філадэльфіі, напішы: гэта кажа Святы і Праўдзівы, Які мае ключ Давідаў, Які адчыніць, і ніхто не замкне, а замкне, і ніхто не адчыніць.

8 1Кар. 16:9; Клс. 4:3 Ведаю ўчынкі твае. Вось, адкрыў перад табою дзверы, якія ніхто не можа закрыць, бо ты, хоць маеш мала моцы, але захаваў слова Маё і не выракся імя Майго.

9 Іс. 43:4; 49:23; 60:14 Вось, дам табе з сінагогі шатана, з тых, якія сябе называюць юдэямі, а імі не ёсць, але падманваюць; вось, зраблю ім, што прыйдуць і паклоняцца табе ў ногі, і даведаюцца, што Я ўзлюбіў цябе.

10 Мц. 24:21; Рым. 8:25; 2Цім. 2:12; 2Пёт. 2:9 Бо ўхаваў ты слова стойкасці Маёй, і Я цябе ўхаваю ў гадзіну спакушэння, якая прыйдзе на ўвесь свет зводзіць жыхароў на зямлі.

11 1Кар. 3:14; Плп. 4:5 Прыйду хутка. Трымай тое, што маеш, каб ніхто не скраў вянца твайго.

12 Іс. 62:2; 65:15; Гал. 2:9; Геб. 12:22 Хто пераможа, таго ўчыню калонай у святыні Бога Майго, і больш з яе не выйдзе, і напішу на ім імя Бога Майго і імя горада Бога Майго, новага Ерузаліма, які сыходзіць з неба ад Бога Майго, і імя Маё новае.

13Хто мае вуха, пачуй, што Дух кажа цэрквам.

14 Высл. 8:22; 2Кар. 1:20; Клс. 1:15 І анёлу царквы, што ў Лаадыцэі, напішы: гэта кажа Амін, Сведка верны і праўдзівы, Пачатак тварэння Божага.

15Ведаю ўчынкі твае, што ты ані халодны, ані гарачы. О, каб лепш халодным ты быў або гарачым!

16Але за тое, што ты цёплы, а не халодны і не гарачы, Я вывергну цябе з вуснаў Маіх.

17 1Кар. 4:8 Бо кажаш ты: «Багаты я і забяспечаны, і нічога мне не трэба», і не ведаеш, што ты бедны, і найнешчаслівейшы, і ўбогі, і сляпы, і голы.

18 Мц. 13:44; 2Кар. 5:3 Раю табе купіць сабе ў Мяне золата, агнём ачышчанага, каб быў забяспечаны, і белую вопратку, каб апрануўся і каб не паказалася нікчэмнасць галізны тваёй, і масць, каб памазаў вочы свае і бачыў.

19 Высл. 3:12; 1Кар. 11:32; Геб. 12:5 Бо Я тых, якіх люблю, дакараю і караю. Дык будзь руплівым і навярніся.

20 Лк. 12:36; Ян. 10:3 Вось, стаю ў дзвярах і стукаю. Калі хто пачуе голас Мой і адчыніць Мне дзверы, увайду да яго і павячэраю з ім, а ён са Мной.

21 Мц. 19:28; 2Цім. 2:12 Хто пераможа, таму дам сядзець са Мною на Маім пасадзе, як Я перамог і сеў з Айцом Маім на Яго пасадзе.

22Хто мае вуха, пачуй, што Дух кажа цэрквам».