Ліст да Піліпцаў Раздзел 4 - Кн?г? Святога П?сання - Б?бл?я - Б?бл?я — пераклад Чарня?скага (выданне 2017 года)（BelBC17）

1Гэтак, браты мае найдаражэйшыя і вельмі пажаданыя, радасць і вянок мой, стойце так у Госпадзе, улюбёныя.

2Эводыю прашу і Сынтыхею ўмольваю гэтаксама думаць у Госпадзе.

3 Лк. 10:20; Адкр. 3:5 Таксама і цябе прашу, сапраўдны супрацоўніку, дапамагай ім, тым, якія са мною працавалі для Евангелля разам з Клементам і іншымі памочнікамі маімі, імёны якіх упісаны ў кнігу жыцця.

4Радуйцеся ў Госпадзе заўсёды. Яшчэ раз кажу: радуйцеся!

5Ціхасць ваша хай будзе вядомай усім людзям. Госпад блізка.

6 Мц. 6:25; 1Пёт. 5:7; 1Ян. 5:14 Не турбуйцеся ні аб чым, але ў кожнай малітве і просьбе з падзякаю няхай адкрываюцца жаданні вашы перад Богам.

7 Клс. 3:15 І супакой Божы, які вышэй за ўсякае разуменне, хай сцеражэ сэрцы вашы і думкі вашы ў Хрысце Ісусе.

8 Як. 3:17; 1Кар. 13:4 Урэшце, браты, што толькі ёсць праўдзівае, што толькі сумленнае, што толькі справядлівае, што толькі чыстае, што толькі любае, што толькі добрай славы, ці якая цнота, ці што пахвальнае, – тое майце на думцы.

9 Рым. 15:33; 1Тэс. 5:23; Геб. 13:20 І тое рабіце, чаму вы ад мяне навучыліся, што атрымалі, што пачулі і што ўбачылі; і Бог супакою будзе з вамі.

10Дужа ўзрадаваўся я ў Госпадзе, што вы ўжо калісьці зноў пачалі думаць пра мяне, як раней думалі, але былі ў клопатах.

11 1Цім. 6:6; Геб. 13:5 Не кажу я гэтага з прычыны недахопу, бо я навучыўся задавольвацца тым, што ёсць.

12 1Кар. 4:11; 2Кар. 6:10 Умею і ў прыніжэнні быць, умею і ў дастатку; усяму і ва ўсім навучыўся: і наесціся, і галадаць; і мець дастатак, і нястачу.

13 Ян. 15:5; 2Кар. 12:9 Усё магу ў Хрысце, Які ўзмацняе мяне.

14Аднак жа добра вы зрабілі, успамагаючы бядзе маёй.

15 2Кар. 11:8 Вы ж, піліпцы, ведаеце, што на пачатку Евангелля, калі я пакінуў Мацэдонію, ні адна з цэркваў, апрача вас, не ўзяла ўдзелу ў даванні і прыманні;

16вы і ў Тэсалоніку раз ці два прысылалі на мой ужытак.

17 2Кар. 12:14; Ціт. 3:14 Не шукаю я дарункаў, але шукаю плода, які памнажаецца на вашу карысць.

18 Вых. 29:18; 2Кар. 9:12; Геб. 13:16 Я ўсё атрымаў і хапае мне ўсяго; я напоўніўся, атрымаўшы ад Эпафрадыта салодкі водар, які вы даслалі, ахвяру прыемную, мілую Богу.

19 2Кар. 9:8 Хай жа Бог мой споўніць усякае ваша жаданне паводле багацця Свайго ў славе, у Хрысце Ісусе.

20 Гал. 1:5 Богу ж і Айцу нашаму слава на векі вечныя. Амін.

21 1Кар. 16:20 Прывітайце кожнага святога ў Хрысце Ісусе. Вітаюць вас браты, якія са мною.

22 2Кар. 13:12 Вітаюць вас усе святыя, а найбольш тыя, якія з дому цэзара.

23Ласка Госпада нашага Ісуса Хрыста з усімі вамі. Амін.