Кніга Выслоўяў Саламонавых Раздзел 22 - Кн?г? Святога П?сання - Б?бл?я - Б?бл?я — пераклад Чарня?скага (выданне 2017 года)（BelBC17）

1 Экл. 7:1 Лепш імя добрае, чым вялікае багацце, лепш ласка добрая, чым срэбра і золата.

2 Высл. 29:13 Сустракаюцца багаты і бедны: абодвух іх Творца — Госпад.

3 Высл. 27:12 Разважлівы бачыць ліха і хаваецца; легкаверныя ідуць туды, і ім чыніцца шкода.

4Узнагарода пакорлівасці — страх Госпадаў, багацце і слава, і жыццё.

5Калючкі і пасткі на дарозе нясталага; а хто вартаўнік душы сваёй — далёка адыходзіць ад іх.

6Настаўляй юнака ў пачатку дарогі яго; нават калі састарэе, ён не сыдзе з яе.

7Багаты распараджаецца беднымі; а хто прымае пазычанае — раб таго, хто пазычае.

8Хто сее несправядлівасць, той збярэ ліха, і розга гневу яго скончыцца.

9Будзе дабраславёны той, хто мае добрае вока, бо з хлеба свайго дае беднаму.

10Прагані насмешніка — і знікне разам з ім сварка; спыняцца спрэчкі і ганьба.

11Хто любіць чысціню сэрца, той будзе мець сябрам цара з-за ласкі вуснаў сваіх.

12Вочы Госпадавы берагуць веды, а словы несправядлівага скідваюць.

13 Высл. 26:13 Гультай кажа: «Леў знадворку, прападу я на сярэдзіне вуліцы».

14Глыбокая яма — вусны жонкі чужой; на каго загневаецца Госпад, той упадзе ў іх.

15У сэрцы юнака змяшчаецца бязглуздасць, і розга настаўлення прагоніць яе.

16Ты прыгнятаеш беднага? Сам ён павялічыць сваё багацце. Ты дарыш багацейшаму? Сам збяднееш.

17Нахілі вуха сваё і слухай словы мудрых; а сэрца сваё прыкладзі да маіх ведаў,

18бо будуць яны вельмі прыгожыя, калі зберажэш іх у чэраве тваім, і разальюцца яны на вуснах тваіх.

19Каб была ў Госпадзе надзея твая, я гавару табе сёння аб гэтым.

20Ці не апісваў я табе гэта заўчора ў намерах і ведах,

21каб паказаць табе трываласць слоў праўды, каб адказаў ты таму, хто паслаў цябе?

22Не чыні гвалту беднаму, таму што ён бедны, і не зневажай таго, хто жыве ў галечы,

23бо Госпад будзе разбіраць справу іх і пазбавіць Ён жыцця рабаўнікоў.

24Не будзь сябрам чалавеку гняўліваму і не хадзі з чалавекам нястрыманым,

25каб выпадкова не навучыцца сцежкам яго і не атрымаць спакусы для душы сваёй.

26Не будзь з тымі, што даюць сваю заруку і што прапануюць сябе паручыцелямі за даўгі.

27Бо калі не маеш адкуль пакрываць, то ў чым прычына таго, каб узялі ложак твой з-пад цябе?

28 Паўт. Зак. 19:14; Высл. 23:10 Не перанось межы старадаўнія, якія вызначылі бацькі твае.

29Бачыш чалавека, руплівага ў сваёй справе: будзе ён стаяць перад царамі, а не перад людзьмі простымі.