Кніга Паўторанага Закону Раздзел 5 - Кн?г? Святога П?сання - Б?бл?я - Б?бл?я — пераклад Чарня?скага (выданне 2017 года)（BelBC17）

1І склікаў Майсей увесь Ізраэль і сказаў ім: «Слухай, Ізраэль, прыказанні, а таксама законы, якія я сёння прамоўлю ў вушы вашыя; навучыцеся ім і спаўняйце іх дзейсна.

2Госпад, Бог наш, заключыў запавет з намі на Гарэбе.

3Не з бацькамі нашымі заключыў Ён гэтую дамову, але з намі, якія тут сёння жывём, з намі ўсімі.

4 Вых. 20:1-17 Тварам у твар гаварыў з вамі Госпад на гары з сярэдзіны агню.

5У той час я як пасрэднік стаяў між Госпадам і вамі, каб вам абвясціць словы Яго, бо вы баяліся агню і не ўзышлі на гару. А Ён сказаў:

6“Я — Госпад, Бог твой, Які вывеў цябе з зямлі Егіпта, з дому няволі.

7Не май другіх багоў перад абліччам Маім.

8 Святар. 26:1; Паўт. Зак. 4:15-18; 27:15 Не рабі сабе ідала і ніякай выявы ўсяго таго, што ў небе высока, і што на зямлі ўнізе, і што ў вадзе пад зямлёю.

9 Вых. 34:6, 7; Ліч. 14:18; Паўт. Зак. 7:9, 10 Не пакланяйся ім і не служы ім, бо Я — Госпад, Бог твой, Бог руплівы апякун, Які карае ліхоту бацькоў ў дзецях да трэцяга і чацвёртага пакалення тых, што ненавідзяць Мяне,

10і аказвае міласэрнасць на многія тысячы тым, што любяць Мяне і спаўняюць прыказанні Мае.

11 Святар. 19:12; 23:9 Не вымаўляй імя Госпада, Бога твайго, дарэмна, бо не будзе непакараным той, хто будзе ўжываць імя Яго марна.

12 Вых. 16:23-30; 31:12-14 Беражы дзень суботні, каб ты святкаваў яго, як загадаў табе Госпад, Бог твой.

13 Вых. 23:12; 31:15; 34:21; 35:2; Святар. 23:3 Шэсць дзён працуй і выконвай усе справы свае.

14А сёмы дзень — гэта субота для Госпада, Бога твайго. Не рабі ў ім аніякай працы ты, і сын твой, і дачка, і паслугач, і паслугачка, і вол, і асёл, і ўсякая жывёла твая, і чужынец, які жыве ў брамах тваіх; хай адпачывае твой паслугач і твая паслугачка, як і ты.

15 Паўт. Зак. 16:12 Памятай, што ты быў рабом у Егіпце, і што вывеў цябе адтуль Госпад, Бог твой, дужай рукою і ўзнятым плячом, таму і загадаў Ён табе, каб бярог ты дзень суботы.

16 Паўт. Зак. 27:16; Мц. 15:4; 19:19; Мк. 7:10; 10:19; Лк. 18:20; Эф. 6:2, 3 Паважай бацьку свайго і маці сваю, як загадаў табе Госпад, Бог твой, каб быў ты даўгавечны і добра табе было на зямлі, якую дасць табе Госпад, Бог твой.

17 Род. 9:6; Святар. 24:17; Мц. 5:21; 19:18; Мк. 10:19; Лк. 18:20; Рым. 13:9; Як. 2:11 Не забівай.

18 Святар. 20:10; Мц. 5:27; 19:18; Мк. 10:19; Лк. 18:20; Рым. 13:9; Як. 2:11 Не чужалож.

19 Святар. 19:11; Мц. 19:18; Мк. 10:19; Лк. 18:20; Рым. 13:9 Не крадзі.

20 Вых. 23:1; Мц. 19:18; Мк. 10:19; Лк. 18:20 Не сведчы фальшыва супраць блізкага свайго.

21 Рым. 7:7; 13:9 Не будзь прагны да жонкі блізкага свайго і не зажадай дома блізкага свайго, ані поля, ані паслугача, ані паслугачкі, ані вала, ані асла, — нічога, што яго”».

22 Вых. 20:18-21 Геб. 12:18, 19 Гэтыя словы гаварыў Госпад да ўсіх вас на гары, з сярэдзіны агню і хмары і змроку моцным голасам, і нічога болей не дадаваў; і напісаў гэта на дзвюх табліцах каменных, якія перадаў мне.

23Вы, вось, як пачулі голас пасярод цемры і калі ўбачылі гару, якая гарэла агнём, прыступілі да мяне ўсе князі пакаленняў і старэйшыя векам,

24і вы казалі: «Вось жа, паказаў нам Госпад, Бог наш, веліч Сваю і магутнасць; мы чулі голас Яго з сярэдзіны агню і пераканаліся сёння, што, калі Бог гаворыць з чалавекам, чалавек застаўся жывы.

25Цяпер жа нашто нам паміраць? Бо праглыне нас гэты вялікі агонь; калі мы яшчэ пачуем голас Госпада, Бога нашага, паўміраем.

26 Паўт. Зак. 4:33 Ці ёсць якое цела, што пачула б голас Бога жывога, Які прамаўляе з сярэдзіны агню, як мы пачулі, і здолела б выжыць?

27Ты прыступіся хутчэй і выслухай усё, што скажа Госпад, Бог наш, і ты перакажаш нам усё, што скажа табе Госпад, Бог наш, і мы, выслухаўшы, зробім гэта».

28 Паўт. Зак. 18:17 Калі пачуў гэта Госпад, дык сказаў мне: «Чуў Я голас слоў гэтага народа, што яны казалі табе. Усё добра яны казалі.

29 Іс. 48:18 Хто дасць ім мець такую памяць, каб яны шанавалі Мяне і бераглі ўсе загады Мае ўвесь час, каб добра ім было і дзецям іх на векі?

30Ідзі і скажы ім: “Вярніцеся ў палаткі вашыя”.

31Ты ж стой тут са Мною, і Я скажу табе ўсе загады і прыказанні, і законы, якім навучыш іх, каб выконвалі іх на зямлі, якую дам ім ва ўласнасць”.

32 Еш. 23:6 Дык беражыце і выконвайце, што загадаў вам Госпад, Бог ваш, не адхіляйцеся ані ўправа, ані ўлева.

33 Паўт. Зак. 4:40 Ва ўсім ідзіце тою дарогаю, якую вызначыў вам Госпад, Бог ваш, каб жылі, і каб было вам добра, ды каб прадоўжыліся дні на зямлі ўласнасці вашай, якую атрымаеце».