Кніга Псальмаў Псальм 92 (91) - Кн?г? Святога П?сання - Б?бл?я - Б?бл?я — пераклад Чарня?скага (выданне 2017 года)（BelBC17）

1Псальм. Песня. На дзень шабату.

2Як жа добра вызнаваць Госпада і спяваць псальмы імю Твайму, Найвышэйшы!

3Раніцай абвяшчаць Тваю міласэрнасць, і праўду Тваю — уначы.

4 Пс. 33:2 На дзесяціструнным, і на гуслях, са спевам пад цытру.

5Бо пацешыў Ты мяне, Госпадзе, Сваім стварэннем, і я буду радавацца справам рук Тваіх.

6Якія ж велічныя справы Твае, Госпадзе: надзвычай глыбокімі сталіся задумы Твае!

7Неразумны чалавек не спазнае і бязглузды не зразумее гэтага.

8Няхай грэшныя разрастуцца, як трава, і будуць квітнець усе тыя, што чыняць несправядлівасць, аднак гэта будзе на згубу на векі вечныя;

9а Ты, Госпадзе, вечна Найвышэйшы.

10Бо вось, непрыяцелі Твае, Госпадзе, бо вось, непрыяцелі Твае загінуць і расцярушацца ўсе, што чыняць несправядлівасць.

11 1Сам. 2:1 Ты ўзвысіш рог мой, як у адзінарога, атрымаў я багатае намашчэнне алейкам.

12Вока маё з пагардаю глядзела на непрыяцеляў маіх, ды пра загубу ліхотнікаў, што паўстаюць на мяне, пра ліхадзеяў радасна слухала вуха маё.

13Справядлівы будзе квітнець, як пальма; быццам кедр лібанскі, узрасце.

14Пасаджаныя ў Госпадавым доме, у дзядзінцы Бога нашага заквітнеюць.

15Будуць прыносіць плады ў старасці, сакавітыя будуць і поўныя свежасці,

16Каб вясціць, што Госпад справядлівы, прыстанішча маё, і няма несправядлівасці ў Ім.