Кніга Мудрасці 3 - Кн?г? Святога П?сання - Б?бл?я - Б?бл?я — пераклад Чарня?скага (выданне 2017 года)（BelBC17）

1А душы справядлівых ёсць у руцэ Божай, і не кране іх мука смерці.

2 Іс. 57:1, 2 Вачам неразумных здаецца, што яны памерлі, і зыход іх лічаць яны за няшчасце,

3і адлучэнне ад нас – за знішчэнне; а яны трываюць у супакоі.

4І калі людзі ўбачылі мукі, то жывуць яны надзеяй несмяротнасці;

5 2Кар. 4:17 і па кароткім мучэнні атрымаюць бясконцыя даброты, бо Бог выпрабаваў іх і знайшоў іх вартымі Сябе.

6Ён выпрабаваў іх, як золата ў печы, і прыняў іх, як цэласпальную ахвяру,

7і ў час выпрабавання іх – яны заззяюць, як іскры на ржышчы;

8 1Кар. 6:2 будуць судзіць народы і будуць валадарыць над людзьмі, і Госпад будзе валадарыць над імі вечна.

9Тыя, што ўсклалі надзею на Яго, – зразумеюць праўду, і верныя будуць супачываць пры Ім у міласці, бо ласка і міласэрнасць – для святых Яго і выпрабаванне – для выбраннікаў Яго.

10Бязбожныя ж па намерах сваіх будуць пакараны, бо адцураліся Справядлівага і адышлі ад Госпада.

11Няшчасны бо, хто пагарджае мудрасцю і настаўленнем! І пустая надзея іх, і труды бясплодныя, і няма карысці ў справах.

12Жонкі іх неразумныя, і самыя нягодныя іх дзеці, пракляты іх род!

13 Іс. 54:1 Бо шчасная няплодная, але беззаганная, якая не пазнала беззаконнага ложка; атрымае плод у час наведвання душ.

14 Іс. 56:3-5 І еўнух, хто не спаганіў сваіх рук злачыннасцю ані не думаў нічога благога супраць Госпада, – за вернасць бо дадзены яму будзе асаблівы дарунак ды доля, поўная радасці, у святыні Госпадавай.

15Добрых бо ўчынкаў плод слаўны, і корань мудрасці не ўсыхае.

16А дзеці чужаложнікаў не даб’юцца мэты, і знікне патомства незаконнага ложка.

17Калі і будуць яны доўга жыць – будуць іх мець за нішто, і ў канцы – няслаўная іх старасць;

18і калі рана памруць, будуць без надзеі і без суцяшэння ў дзень прызнання:

19бо страшны ёсць канец грэшнага роду!