Эклезіясціка (Мудрасць Ісуса, сына Сіраха) 46 - Кн?г? Святога П?сання - Б?бл?я - Б?бл?я — пераклад Чарня?скага (выданне 2017 года)（BelBC17）

1 Еш. 1:1-9 Мужны ў баю Ешуа, сын Нуна, пераемнік Майсея ў прароцтвах, які быў адпаведны імю свайму,

2найвялікшы ў збаўленні выбраннікаў Божых, які помсціў нападаўшым ворагам, каб увесці Ізраэль у яго спадчыну.

3Як уславіўся ён, падымаючы рукі свае і накіроўваючы меч свой на горад!

4Хто перад ім так адзначыўся? Ён бо вёў войны Госпадавы.

5 Еш. 10:13 Ці не яго рукою было стрымана сонца ды адзін дзень стаў, быццам два?

6Прызваў Ён Узвышняга Валадара, калі напалі на яго зусюль ворагі; і выслухаў яго вялікі Госпад, бо спаслаў камяністы град надта вялікай сілы.

7 Еш. 10:10-15 Кінуўся ён на варожы народ і, сышоўшы, разграміў праціўнікаў;

8так што пазналі народы сілу зброі Яго, бо вайна іх – супраць Бога, бо наступаў ён за плячамі Магутнага.

9 Ліч. 14:6-10 І ў дні Майсея аказаў ён міласэрнасць, ён і Калеб, сын Ефоны, тым, што сталі супраць сходу, паўстрымалі народ ад грахоў ды супакоілі злую лаянку.

10 Вых. 12:37 Таму яны ўдвух былі вызвалены з ліку шасцісот тысяч пешакоў, і былі ўведзены ў спадчыну, у зямлю, што абцякае малаком і мёдам.

11 Еш. 14:11; Ліч. 14:24 І даў Госпад самому Калебу сілу, якая да старасці ў ім ператрывала, каб узышоў на высокае месца зямлі ды каб там патомства яго атрымала спадчыну;

12каб пераканаліся ўсе сыны Ізраэля, што добрым ёсць – слухаць Госпада.

13Далей аб суддзях, аб кожным па імю, аб тых, у каго сэрца не было сапсавана і якія не адвярнуліся ад Госпада:

14хай памяць аб іх будзе дабраславёна, і хай косці іх дадуць атожылкі з месца свайго,

15і хай імя іх будзе ўзноўлена сынамі гэтых мужоў святых.

16 1Сам. 10:1; 16:13 Умілаваны Госпадам сваім Самуэль, прарок Госпадаў, паставіў царства, ды намасціў валадароў у народзе сваім.

17Па законе Госпадавым судзіў сход, і наведаў Бог Якуба, і праз вернасць сваю быў ён праўдзівым прарокам;

18і праўдзівасць бачання пазнана была па яго словах.

19 1Сам. 7:9, 10 І ён прызваў усемагутнага Госпада, калі ворагі дзеля аблогі абкружылі зусюль, ахвяруючы малочнае ягня.

20І загрымеў з неба Госпад, і ў магутным гуку даў пачуць Свой голас,

21і сцёр кіраўнікоў тырскіх ды ўсіх князёў філістынскіх.

22 1Сам. 12:3 І перад часам супачынку вечнага Ён сведчыў на віду Госпада і Яго Намашчэнца: «Грошай ані нават сандаляў ні ад каго не ўзяў»; і ніхто не змог яго абвінаваціць.

23 1Сам. 28:6-25 І ён прарочыў і па сваёй смерці, і прадказаў цару і паказаў яму смерць яго, і падняў голас свой з зямлі, каб ухіліць народ ад ліхоцця.