Кніга Мудрасці 5 - Кн?г? Святога П?сання - Б?бл?я - Б?бл?я — пераклад Чарня?скага (выданне 2017 года)（BelBC17）

1Тады справядлівы стане з вялікай адвагай перад тымі, што яго крыўдзілі ды пагарджалі яго трудамі,

2бачачы, як затрывожацца жудасным страхам і аслупянеюць на віду неспадзяванага збаўлення,

3каючыся і ўздыхаючы ў турбоце духу, будуць казаць самі да сябе:

4«Гэта той самы, з каго мы калісьці кпілі і падобна ганьбілі. Мы, неразумныя, лічылі жыццё яго за дурное і смерць яго – за ганьбу.

5Як яго залічылі ў сыны Божыя і долю яго – сярод святых?

6Дык мы сышлі з дарогі праўды, і не свяціла нам святло справядлівасці, і сонца не ўзышло нам;

7заблыталіся ў путах беззаконня і загубы і хадзілі па непраходных пустынях, а дарогі Госпадавай не пазналі.

8Чым нам дапамагла пыхлівасць? Або чым нам дапамагло багацце і пустая слава?

9Усё гэта прайшло, як цень, і як вяшчун хуткабежны,

10 Высл. 30:18, 19 і быццам карабель, што плыве праз успененае мора, следу якога не знойдзеш, калі праплыве, ані баразны кіля яго сярод хваляў,

11або як птушка, што лётае ў прасторы, ніякага не пакідае следу шляху, толькі лёгкі вецер, удараны шумам крылаў і рассечаны сілаю свіста, працінаецца ўзварушанымі крыламі, і па гэтым ніякага следу шляху не знаходзіцца;

12або як выпушчаныя ў намечаную мэту стрэлы: раздзеленае паветра зараз жа зноў сходзіцца, так што не пазнаць іх пралёту.

13Так і мы, нарадзіўшыся і пастаянна знікаючы, не змаглі ніякім знакам паказаць цноты; але прапалі мы ў сваім беззаконні».

14 Пс. 1:4 Бо надзея бязбожнага, як мякіна, ветрам раскіданая, ды як лёгкая пена, бурай паразбіваная, і як дым, ветрам разагнаны, і як памяць пра госця, што прыйшоў на адзін дзень.

15А справядлівыя жывуць вечна; і ўзнагарода іх – у Госпадзе, і думка аб іх – ва Узвышняга.

16Дзеля таго атрымаюць яны вянец аздаблення і гожую дыядэму з рукі Госпада. Бо ён правіцаю Сваёю зберажэ іх і плячом Сваім абароніць іх.

17 Іс. 59:17; Эф. 6:10-17 Ён возьме за зброю Сваю апякуючую руплівасць і ўзброіць стварэнне на помсту ворагам,

18як панцырам, узброіцца ў справядлівасць і, як шлем, прыме справядлівы суд;

19як шчыт непераможны, возьме святасць.

20Як меч жа, навострыць гнеў Свой няўмольны, і з Ім разам будзе ваяваць свет супраць неразумных.

21 Пс. 17:15 Панясуцца меткія стрэлы маланак, і паляцяць у цэль з хмараў, як з добра нацягнутага лука,

22і ярасны град будзе выкінуты з гневам, які кідае камяні; узбурацца супраць іх воды марскія, і рэкі няўмольна нахлынуць.

23Падымецца супраць іх дух сілы і, як буралом, змяце іх. І злачыннасць спустошыць усю зямлю, і ліхота перавярне пасады магутных.