Jesaja 61 - Biblían (2007)

Fagnaðarboðskapur um frelsi

1Andi Drottins er yfir mér

því að Drottinn hefur smurt mig.

Hann hefur sent mig til að flytja fátækum gleðilegan boðskap,

til að græða þá sem hafa sundurmarin hjörtu,

boða föngum lausn

og fjötruðum frelsi,

2til að boða náðarár Drottins

og hefndardag Guðs vors,

til að hugga þá sem hryggir eru

3og setja höfuðdjásn í stað ösku

á syrgjendur í Síon,

fagnaðarolíu í stað sorgarklæða,

skartklæði í stað hugleysis.

Þeir verða nefndir réttlætiseikur,

garður Drottins sem birtir dýrð hans.

4Þeir munu endurreisa fornar rústir,

reisa það við sem féll fyrir löngu,

endurbyggja eyddar borgir

sem legið hafa í rústum kynslóð eftir kynslóð.

5Framandi menn munu koma og gæta hjarða yðar,

útlendingar vinna á ökrum yðar og í víngörðum

6en þér verðið nefndir prestar Drottins

og kallaðir þjónar Guðs vors.

Þér munuð njóta góðs af auði annarra þjóða

og hljóta vegsemd af fjársjóðum þeirra.

7Þar sem smán þeirra tvöfaldaðist

og háð og spott varð hlutskipti þeirra

skulu þeir fá tvöfalda hlutdeild í landi sínu

og ævarandi gleði mun hlotnast þeim.

8Því að ég, Drottinn, elska réttlæti

en hata rán og svik,

ég mun launa þeim af trúfesti

og gera við þá ævarandi sáttmála.

9Niðjar þeirra verða þekktir meðal þjóðanna

og börn þeirra meðal þjóðflokkanna.

Allir, sem sjá þá, munu skilja

að þeir eru niðjarnir sem Drottinn hefur blessað.

10Ég gleðst yfir Drottni,

ég fagna yfir Guði mínum

því að hann bjó mig klæðum hjálpræðisins,

sveipaði mig skikkju réttlætisins.

Eins og brúðgumi setur upp höfuðdúk sinn

og brúður býr sig skarti sínu

11og eins og jörðin gefur gróðrinum vöxtinn

og garður lætur frækornin spíra

mun Drottinn Guð láta réttlæti dafna

og orðstír frammi fyrir öllum þjóðum.