Síðari kroníkubók 22 - Biblían (2007)

Ahasía konungur í Júda

1Jerúsalembúar gerðu nú Ahasía, yngsta son Jórams, að konungi í hans stað því að ræningjaflokkurinn, sem hafði komið með Aröbunum inn í búðirnar, hafði drepið alla eldri bræðurna. Þannig tók Ahasía ríki, sonur Jórams Júdakonungs.

2Ahasía var tuttugu og tveggja ára þegar hann varð konungur og ríkti eitt ár í Jerúsalem. Móðir hans hét Atalía og var afkomandi Omrí.

3Ahasía breytti eins og ætt Akabs. Móðir hans var ráðgjafi hans svo að hann lifði guðlausu lífi.

4Hann gerði það sem illt var í augum Drottins eins og ættmenn Akabs því að þeir voru ráðgjafar hans eftir fráfall föður hans og það varð honum til falls.

5Hann fylgdi ráðum þeirra og fór með Jóram Akabssyni Ísraelskonungi í stríð gegn Hasael Aramskonungi við Ramót í Gíleað. En Aramearnir særðu Jóram

6svo að hann sneri heim til Jesreel. Þar ætlaði hann að láta gróa sár sín sem Aramearnir höfðu veitt honum við Rama þegar hann barðist gegn Hasael Aramskonungi. En Ahasía Jóramsson Júdakonungur fór niður eftir til að heimsækja Jóram Akabsson í Jesreel af því að hann var veikur.

7En Guð hafði tekið þá ákvörðun að Ahasía færi til Jórams. Þegar hann var kominn þangað fór hann með Jóram á móti Jehú Nimsísyni sem Drottinn hafði látið smyrja til þess að tortíma ætt Akabs.

8Þegar Jehú var að framfylgja dóminum yfir ætt Akabs rakst hann á hirðmenn frá Júda og bræðrasyni Ahasía, sem voru í þjónustu Ahasía, og drap þá.

9Því næst lét hann leita að Ahasía. Hann var gripinn í Samaríu, þar sem hann hafði falið sig, og færður fyrir Jehú sem drap hann. Hann var grafinn af því að menn sögðu: „Hann var sonur Jósafats sem leitaði Drottins af öllu hjarta.“ Nú var enginn eftir af ætt Ahasía sem var fær um að taka við konungdómi.

Atalía drottning Júda

10Þegar Atalía, móðir Ahasía, sá að sonur hennar var dáinn tók hún að tortíma allri konungsættinni í Júda.

11En Jósaba, dóttir konungsins, tók Jóas Ahasíason úr hópi sona konungsins sem átti að drepa. Hún laumaði honum og fóstru hans inn í svefnherbergið. Hún faldi hann svo að Atalía gat ekki drepið hann. Jósaba, dóttir Jórams konungs, eiginkona Jójada prests, var systir Ahasía.

12Hann var falinn hjá henni í húsi Guðs í sex ár á meðan Atalía ríkti yfir landinu.