Þriðja Mósebók 3 - Biblían (2007)

1Sé gjöf hans heillafórn og hann ætli að færa gjöf af nautpeningi skal hann færa lýtalaust karldýr eða kvendýr fram fyrir auglit Drottins.

2Hann skal leggja hönd sína á höfuð fórnardýrsins og slátra því við inngang samfundatjaldsins. Synir Arons, prestarnir, skulu dreypa blóðinu á allar hliðar altarisins.

3Hann skal færa Drottni hluta af heillafórninni sem eldfórn: netjuna sem hylur iðrin og allan mörinn,

4bæði nýrun ásamt nýrnamörnum, sem er innan á mölunum, og lifrarblaðið sem hann skal skilja frá við nýrun.

5Synir Arons skulu láta þennan hluta líða upp í reyk af altarinu ásamt brennifórninni á viðnum sem er á altariseldinum.

Þetta er eldfórn, Drottni þekkur ilmur.

6Sé gjöfin sem hann færir Drottni að heillafórn tekin af sauðfénaði skal hann færa fram lýtalaust karldýr eða kvendýr.

7Færi hann sauðkind að gjöf skal hann færa hana fram fyrir auglit Drottins,

8leggja hönd sína á höfuð fórnardýrsins og slátra því fyrir framan samfundatjaldið. Synir Arons skulu dreypa blóðinu á allar hliðar altarisins.

9Því næst skal hann færa Drottni hluta af heillafórninni sem eldfórn: mörinn, rófuna alla, og skal taka hana af þétt við rófubeinið, netjuna sem hylur iðrin og allan mörinn,

10bæði nýrun ásamt nýrnamörnum, sem er innan á mölunum, og lifrarblaðið sem hann skal skilja frá við nýrun.

11Presturinn skal láta það líða upp í reyk af altarinu.

Þetta er fæða, eldfórn handa Drottni.

12Sé gjöf hans geit skal hann færa hana fram fyrir auglit Drottins,

13leggja hönd sína á höfuð hennar og slátra henni fyrir framan samfundatjaldið. Synir Arons skulu dreypa blóðinu á allar hliðar altarisins.

14Því næst skal hann færa Drottni hluta af því sem gjöf, eldfórn: netjuna sem hylur iðrin og allan mörinn,

15bæði nýrun ásamt nýrnamörnum, sem er innan á mölunum, og lifrarblaðið sem hann skal skilja frá við nýrun.

16Presturinn skal láta það líða upp í reyk af altarinu.

Þetta er fæða, eldfórn, Drottni þekkur ilmur.

Allur mör er eign Drottins.

17Þetta skal vera ævarandi regla hjá ykkur frá kynslóð til kynslóðar hvar sem þið búið: Þið skuluð hvorki neyta mörs né blóðs.“